મહાદેવ એપ : હવે આ બોલિવૂડ અભિનેત્રીની EDએ કરી પુછપરછ

મુંબઈ, 17 ઓક્ટોબર : અભિનેત્રી તમન્ના ભાટિયાની મુશ્કેલીઓ વધી રહી છે. મહાદેવ સટ્ટાબાજી એપ કેસમાં અભિનેત્રીનું નામ સામે આવ્યું છે. એન્ફોર્સમેન્ટ ડિરેક્ટોરેટ (ED) દ્વારા તેની ગુવાહાટી ઓફિસમાં ફિલ્મ અભિનેત્રીની પૂછપરછ કરવામાં આવી છે. આ કેસમાં તમન્ના ભાટિયાની આરોપી તરીકે નહીં પરંતુ આ એપને પ્રમોટ કરવાના સંદર્ભમાં પૂછપરછ કરવામાં આવી રહી છે. અભિનેત્રી હાલમાં જ ફિલ્મ ‘સ્ત્રી 2’ના કારણે ચર્ચામાં હતી, જેમાં તેનું ગીત ‘આજ કી રાત’ ટ્રેન્ડ કરી રહ્યું હતું.

તમન્ના ભાટિયાની એપને પ્રમોટ કરવા બદલ પુછતાછ કરાઈ

ઇડીએ તમન્ના ભાટિયાને HPZ એપ કૌભાંડમાં પૂછપરછ માટે બોલાવી હતી. તમન્ના લગભગ 1.30 વાગ્યે ગુવાહાટીમાં ED ઓફિસ પહોંચી અને તેની માતા પણ તેની સાથે હતી. આ એપ દ્વારા લોકોને 57,000 રૂપિયાના રોકાણ માટે દરરોજ 4,000 રૂપિયા આપવાનું વચન આપીને કરોડો રૂપિયાની છેતરપિંડી કરવામાં આવી છે. છેતરપિંડી કરવા માટે વિવિધ બેંકોમાં શેલ કંપનીઓના નામે નકલી ખાતા ખોલવામાં આવ્યા હતા જેમાં રોકાણકારો પાસેથી નાણાં ટ્રાન્સફર કરવામાં આવ્યા હતા. મહાદેવ એપના કેટલાક સ્ટાર્સ HPZ સાથે પણ જોડાયેલા છે. અભિનેત્રીએ કથિત રીતે ફેરપ્લે સટ્ટાબાજીની એપ પર ઈન્ડિયન પ્રીમિયર લીગની મેચ જોવાનો પ્રચાર કર્યો છે.

તમન્ના ભાટિયાની માત્ર પૂછપરછ કરવામાં આવી હતી

તમન્ના પર મહાદેવ ઓનલાઈન ગેમિંગ અને સટ્ટાબાજીની એપ્લીકેશનની સપોર્ટિંગ એપ પર IPL મેચોને ગેરકાયદેસર રીતે જોવાને પ્રોત્સાહન આપવાનો આરોપ છે. આ મામલે EDએ સમન્સ પાઠવ્યું હતું. ‘ફેરપ્લે’ એ એક સટ્ટાબાજીનું વિનિમય પ્લેટફોર્મ છે જે વિવિધ રમતો અને મનોરંજન દ્વારા જુગારને પ્રોત્સાહન આપે છે. તે મહાદેવ ઓનલાઈન ગેમિંગ એપની સહાયક એપ્લિકેશન છે જે ક્રિકેટ, પોકર, બેડમિન્ટન, ટેનિસ, ફૂટબોલ કાર્ડ ગેમ્સ જેવી વિવિધ લાઈવ ગેમ્સમાં ગેરકાયદેસર સટ્ટાબાજી માટે પ્લેટફોર્મ પૂરું પાડે છે.

ઇડીએ શ્રદ્ધા કપૂરની પણ પૂછપરછ કરી હતી

મહાદેવ સટ્ટાબાજીની એપ ગયા વર્ષે હેડલાઈન્સ બની હતી જ્યારે તેની જાહેરાતોમાં દેખાતા અભિનેતા રણબીર કપૂર અને શ્રદ્ધા કપૂરને પણ ED દ્વારા પૂછપરછ માટે બોલાવવામાં આવ્યા હતા. સટ્ટાબાજી અને ગેમિંગ એપ્સ પર અલગ-અલગ એજન્સીઓની કાર્યવાહી બાદ બોલિવૂડના ઘણા સ્ટાર્સ સ્કેનર હેઠળ આવ્યા છે. ન્યૂઝ18ના એક જૂના અહેવાલ મુજબ, મહાદેવ સટ્ટાબાજી એપ કૌભાંડમાં બોલિવૂડના 17 સ્ટાર્સ તપાસ હેઠળ છે.

આ પણ વાંચો :- રાજ્યના મુખ્ય સચિવ રાજકુમારના હસ્તે મહેસૂલ વિભાગના ફીડબેક સેન્ટરનું ઉદ્ઘાટન કરાયું