- LG વીકે સક્સેનાએ વિવિધ વિભાગોમાં નોકરી કરનારાઓને હટાવી દીધા
- નોકરીમાં પારદર્શિતા ન હોવાનું આપ્યું કારણ
- નિમણૂંકોમાં SC/ST/OBC ઉમેદવારો માટે અનામત નીતિનું પાલન કરવામાં આવ્યું ન હોવાનું નિવેદન
દિલ્હીના લેફ્ટનન્ટ ગવર્નર વીકે સક્સેનાએ 400 લોકોની સેવાઓ તાત્કાલિક અસરથી સમાપ્ત કરી દીધી છે. આ લોકો દિલ્હી સરકાર સાથે સંકળાયેલા વિવિધ વિભાગો, નિગમો, બોર્ડ અને પીએસયુમાં નોકરી કરતા હતા. નિવેદનમાં કહેવામાં આવ્યું છે કે આ લોકોની તૈનાતીમાં પારદર્શિતાનું પાલન કરવામાં આવ્યું ન હતું, જેના કારણે તેમને હટાવી દેવામાં આવ્યા છે.
LG ઓફિસમાંથી આવ્યું સત્તાવાર નિવેદન
લેફ્ટનન્ટ ગવર્નરના કાર્યાલય દ્વારા જારી કરવામાં આવેલા નિવેદનમાં કહેવામાં આવ્યું છે કે આ નિમણૂંકોમાં SC/ST/OBC ઉમેદવારો માટે અનામત નીતિનું પાલન કરવામાં આવ્યું નથી. આ લોકોને દિલ્હી સરકારના વિવિધ વિભાગો અને એજન્સીઓમાં ફેલો/આસિસ્ટન્ટ ફેલો, સલાહકાર/નાયબ સલાહકાર, વિશેષજ્ઞ/વરિષ્ઠ સંશોધન અધિકારી અને સલાહકાર તરીકે નિયુક્ત કરવામાં આવ્યા હતા.
શું છે આરોપ ?
આમાંના ઘણા ઉમેદવારો આ જગ્યાઓ માટે જરૂરી શૈક્ષણિક લાયકાત પણ પૂર્ણ કરતા નથી. ઘણા એવા ઉમેદવારો છે જેમની પાસે આ પદો માટે પૂરતો અનુભવ પણ નથી. પરંતુ તેમ છતાં તેમની નિમણૂક યોગ્ય ધોરણોને અનુસર્યા વિના કરવામાં આવી હતી. વાસ્તવમાં સેવા વિભાગે એલજી સક્સેનાને વિનંતી કરી હતી કે આ 400 લોકોને તાત્કાલિક અસરથી સમાપ્ત કરી દેવામાં આવે. આ પછી, લેફ્ટનન્ટ ગવર્નરે આ વિનંતીઓ સ્વીકારી અને આ કાર્યવાહી કરી. આ સંદર્ભમાં, સેવા વિભાગે 23 વિભાગો/સ્વાયત્ત સંસ્થાઓ/પીએસયુ પાસેથી માહિતી એકત્રિત કરી હતી કે આ લોકો નિષ્ણાત તરીકે કામ કરી રહ્યા હતા. સેવા વિભાગને જાણવા મળ્યું કે પર્યાવરણ, પુરાતત્વ વિભાગ, દિલ્હી આર્કાઇવ્ઝ, મહિલા અને બાળ વિકાસ મંત્રાલય અને ઉદ્યોગ મંત્રાલય જેવા વિભાગોએ આ લોકોની નિમણૂક કરતા પહેલા સક્ષમ અધિકારી પાસેથી કોઈ મંજૂરી લીધી ન હતી.
દિલ્હી સરકાર સાથે સંકળાયેલા 13 બોર્ડમાં 155 લોકોની નિમણૂક
સેવા વિભાગ દ્વારા કરવામાં આવેલી તપાસમાં જાણવા મળ્યું છે કે પુરાતત્વ વિભાગ, પર્યાવરણ, દિલ્હી આર્કાઇવ્ઝ, મહિલા અને બાળ વિકાસ મંત્રાલય અને ઉદ્યોગ જેવા પાંચ મંત્રાલયોમાં 69 એવા લોકો હતા, જેમની નિમણૂક માટે કોઈ મંજૂરી લેવામાં આવી ન હતી. એ જ રીતે, દિલ્હી સરકાર સાથે સંકળાયેલા 13 બોર્ડમાં 155 લોકોની નિમણૂક કરવામાં આવી હતી, જેમની નિમણૂક માટે જરૂરી મંજૂરી લેવામાં આવી ન હતી. આ સાથે દિલ્હી એસેમ્બલી રિસર્ચ સેન્ટર (DARC), ડાયલોગ એન્ડ ડેવલપમેન્ટ કમિશન ઓફ દિલ્હી (DDCD) અને પ્લાનિંગ વિભાગમાં 187 લોકોની નિમણૂકની માહિતી સેવા વિભાગને આપવામાં આવી ન હતી. જો કે, આરોગ્ય અને પરિવાર કલ્યાણ, ખાદ્ય સુરક્ષા, ઇન્દિરા ગાંધી હોસ્પિટલ અને પરિવહન જેવા ચાર વિભાગોમાં 11 લોકોની નિમણૂક લેફ્ટનન્ટ ગવર્નરની મંજૂરી પછી કરવામાં આવી હતી. લેફ્ટનન્ટ ગવર્નરે નિર્દેશ આપ્યો છે કે તમામ સંબંધિત પક્ષોએ સેવા વિભાગની સૂચનાઓનું પાલન કરવું જોઈએ. જો તેમ કરવામાં નહીં આવે તો સંબંધિત વહીવટી સચિવ સામે વિભાગીય કાર્યવાહી શરૂ કરી શકાય છે.
