ડીસાની જમનાબાઈ પ્રા.શાળાના 14 રૂમોના તાળા તૂટ્યા, પીવાના પાણીના નળ ચોરાયા

પાલનપુર, 02 ઓગસ્ટ 2024 ડીસાની મુખ્ય બજારમાં આવેલી જમનાબાઈ પ્રાથમિક શાળા બ્રાન્ચ સ્કૂલમાં તસ્કરોએ શાળાના તમામ 14 રૂમના તાળા તોડી ચોરીનો પ્રયાસ કર્યો હતો. પરંતુ કંઈ હાથ ન લાગતા છેવટે પાણીના નળની ચકલીઓ ચોરી ગયા હતા. શાળાનો કીમતી સામાન કમ્પ્યુટરો, એલસીડી વગેરે જેમાં હતું તે રૂમનું તાળું ન તૂટતા મોટી ચોરી થતા બચી ગઈ હતી.

પીવાના પાણીની ચકલીઓ ચોરી ગયા હતા
ડીસામાં રીસાલા બજાર વિસ્તારમાં જિલ્લા શિક્ષણ સમિતિ સંચાલિત જમનાબાઈ પ્રાથમિક શાળામાં ગત રાત્રે કોઈ અજાણ્યા તસ્કરોએ શાળામાં ચોરીનો પ્રયાસ કર્યો હતો. તસ્કરોએ શાળાની ઓફિસ સહિત તમામ 14 રૂમોના તાળા તોડ્યા હતા જેમાંથી કંઈ હાથ લાગ્યું ન હતું. જોકે તસ્કરો એ કોમ્પ્યુટર રૂમનું તાળું તોડવાનો પ્રયાસ કર્યો હતો પરંતુ સફળતા મળી ન હતી. જેથી કીમતી સામાન ચોરાયો ન હતો. પરંતુ તસ્કરોને કંઈ હાથ ન લાગતા છેવટે બાળકોને પીવાના પાણીની ચકલીઓ ચોરી ગયા હતા.

પ્રાથમિક શાળામાં ચોરીના પ્રયાસનો આ પ્રથમ બનાવ નથી
જે બનાવ અંગે શાળાના આચાર્ય રમેશભાઈ જોશી એ તાલુકા પ્રાથમિક શિક્ષણ અધિકારી કચેરીએ જાણ કરતાં ડીસા તાલુકા શિક્ષણ અધિકારી અશ્વિનભાઈ પટેલ પણ શાળામાં પહોંચ્યા હતા. જ્યારે પોલીસને જાણ કરાતા પોલીસે આવી તપાસ હાથ ધરી હતી. જમનાબાઈ પ્રાથમિક શાળામાં ચોરીના પ્રયાસનો આ પ્રથમ બનાવ નથી. અહીં અગાઉ પણ ચોરીનો પ્રયાસ થયેલો છે. જેથી પોલીસ દ્વારા આ અંગે સતર્કતા દાખવવામાં આવે તેવી શાળા પરિવારની માંગ છે.

આ પણ વાંચોઃડીસાના રાજપુર વ્હોળામાં લીમડાનું ડાળુ મારીને યુવકની હત્યા કરી, પોલીસે ગુનો નોંધ્યો