‘કોંગ્રેસ છોડી દો નહીંતર….’; બજરંગ પુનિયાને વોટ્સએપ પર મળી ધમકી

નવી દિલ્હી, 8 સપ્ટેમ્બર : દેશના સ્ટાર રેસલર અને હવે કિસાન કોંગ્રેસના કાર્યકારી અધ્યક્ષ બજરંગ પુનિયાને જાનથી મારી નાખવાની ધમકી મળી છે. તેમને આ ધમકી વોટ્સએપ મેસેજ દ્વારા મળી હતી. તેમને વિદેશી નંબર પરથી વોટ્સએપ પર મેસેજ મળ્યો છે જેમાં તેમને જાનથી મારી નાખવાની ધમકી આપવામાં આવી છે.

મેસેજમાં લખવામાં આવ્યું છે કે, બજરંગ, કોંગ્રેસ છોડી દો નહીંતર તમારું અને તમારા પરિવારનું ભલું નહીં થાય, આ અમારો છેલ્લો સંદેશ છે. ચૂંટણી પહેલા અમે બતાવીશું કે અમે શું છીએ. તમે ઇચ્છો ત્યાં ફરિયાદ કરો, આ અમારી પહેલી અને છેલ્લી ચેતવણી છે.

બજરંગ પુનિયાએ સોનીપતના બહલગઢ પોલીસ સ્ટેશનમાં ફરિયાદ નોંધાવી છે. પોલીસ આ મામલે ગંભીરતાથી તપાસ કરી રહી છે.

પુનિયા શુક્રવારે કોંગ્રેસમાં જોડાયા હતા

કુસ્તીબાજ વિનેશ ફોગાટ અને બજરંગ પુનિયાએ શુક્રવારે રાજકીય મેદાનમાં પ્રવેશ કર્યો અને કોંગ્રેસ સાથે હાથ મિલાવ્યા. કોંગ્રેસના રાષ્ટ્રીય મહામંત્રી કે.સી. વેણુગોપાલે વિનેશ અને બજરંગને પાર્ટીની સદસ્યતા આપી. કોંગ્રેસમાં જોડાતાની સાથે જ પાર્ટીએ બજરંગ પુનિયાને મોટી જવાબદારી સોંપી છે.

કોંગ્રેસે બજરંગ પુનિયાને ખેડૂત સેલના રાષ્ટ્રીય કાર્યકારી અધ્યક્ષ બનાવ્યા છે. કોંગ્રેસ દ્વારા જારી કરાયેલા નિમણૂક પત્રમાં કહેવામાં આવ્યું છે કે કોંગ્રેસ અધ્યક્ષ મલ્લિકાર્જુન ખડગેએ તાત્કાલિક અસરથી બજરંગ પુનિયાને અખિલ ભારતીય કિસાન કોંગ્રેસના કાર્યકારી અધ્યક્ષ તરીકે નિયુક્ત કરવાના પ્રસ્તાવને મંજૂરી આપી દીધી છે.

આ પણ વાંચો : ભાજપના ધારાસભ્યના ભત્રીજાએ હોસ્પિટલની વોર્ડનની કરી છેડતી, ચોંકાવનારો મામલો