સીએમ ગેહલોતના નજીકના નેતા ઉમેદવારી પાછી ખેંચી ભાજપમાં જોડાયા

• નામાંકન પરત ખેંચવાના છેલ્લા દિવસે સીએમ અશોક ગેહલોતને મોટો આંચકો લાગ્યો
• જોધપુરના પૂર્વ મેયર અને સીએમ અશોક ગેહલોતના નજીકના રામેશ્વર દધીચે અપક્ષ ઉમેદવાર તરીકે પોતાનું નામાંકન પાછું ખેંચી લીધું અને પછી ભાજપમાં જોડાયા.

રાજસ્થાન: રાજસ્થાનમાં આ દિવસોમાં વિધાનસભા ચૂંટણી (Assembly Elections) માટે પ્રચાર પૂરજોશમાં ચાલી રહ્યો છે. ભાજપ અને કોંગ્રેસ બંને પક્ષોમાં પણ નારાજ નેતાઓને મનાવવાના પ્રયાસો ચાલુ છે. આ દરમિયાન રાજસ્થાનની સુરસાગર બેઠક પરથી અપક્ષ ઉમેદવારી નોંધાવનાર રામેશ્વર દધીચે ગુરુવારે પોતાનું નામ પાછું ખેંચી લીધું હતું અને એટલું જ નહીં ભાજપમાં પણ જોડાઈ ગયા. રામેશ્વર દધીચ જોધપુરના પૂર્વ મેયર છે અને સીએમ અશોક ગેહલોતના નજીકના માનવામાં આવે છે.

રામ મંદિર પીએમ મોદીના કારણે બન્યું

ભાજપમાં જોડાયા બાદ મીડિયા સાથે વાત કરતા દધીચે કહ્યું કે, વડાપ્રધાન નરેન્દ્ર મોદીની નિર્ણય ક્ષમતાના કારણે હું ભાજપમાં જોડાયો છું. હું લાંબા સમયથી તેમના કામથી પ્રભાવિત થયો છું. જો મોદી વડાપ્રધાન ન હોત તો રામ મંદિર (Ram Mandir) ન બની શક્યું હોત.

માત્ર દધીચ જ નહીં પરંતુ કોંગ્રેસના પૂર્વ દૌસા જિલ્લા પ્રમુખ વિનોદ શર્મા પણ ભારતીય જનતા પાર્ટીમાં જોડાયા હતા. જયપુરમાં પૂર્વ મંત્રી રાજપાલ સિંહ શેખાવત જેમણે જોતવાડાથી ભાજપના રાજ્યવર્ધન સિંહ રાઠોડ સામે ઉમેદવારી નોંધાવી હતી, તેમણે પાર્ટી હાઈકમાન્ડ સાથે વાતચીત કર્યા બાદ પોતાનું નામ પાછું ખેંચ્યું છે. આને ભાજપ માટે મોટી રાહત માનવામાં આવી રહી છે. તેઓ કેન્દ્રીય મંત્રી અને પાર્ટીના રાજસ્થાન (Rajasthan) ચૂંટણી પ્રભારી પ્રહલાદ જોશી, કેન્દ્રીય મંત્રી ગજેન્દ્ર સિંહ શેખાવત અને સાંસદ રાજેન્દ્ર ગેહલોતની હાજરીમાં ભાજપમાં જોડાયા હતા. શેખાવતે કહ્યું કે, કોંગ્રેસ અને અન્ય પક્ષોના નેતાઓ ભાજપમાં જોડાઈ રહ્યા છે કારણ કે તેઓ આવી પાર્ટીઓની નીતિઓ અને ખોટા વચનોથી કંટાળી ગયા છે. રણ રાજ્યમાંથી કોંગ્રેસ સરકારની વિદાયનો સમય આવી ગયો છે.

ભાજપના બળવાખોરોએ પણ મુશ્કેલી વધારી

ઘણી જગ્યાએ ભાજપના બળવાખોરોએ પક્ષના ઉમેદવારોની મુશ્કેલીમાં વધારો કર્યો છે. ચિત્તોડગઢથી ચંદ્રભાન સિંહ અક્યા, ડીડવાના યુનુસ ખાન, શેઓથી રવિન્દ્ર ભાટી, ખંડેલાથી બંશીધર બજિયા, કોટાના લાડપુરાથી ભવાની સિંહ શેખાવત, ભીલવાડાના શાહપુરાથી કૈલાશ મેઘવાલ અને બાડમેરમાં પ્રિયંકા ચૌધરી સહિત અન્ય બીજેપી બળવાખોરોએ અપક્ષ ઉમેદવાર તરીકે પોતાનું નામ પાછુ ખેંચ્યું નથી. આ બેઠકો પર ચૂંટણી જંગ ત્રિકોણીય બની ગયો છે.

કોંગ્રેસના બળવાખોરોએ પણ પોતાનાં નામ પાછા ખેંચ્યા નથી

બીજી તરફ મોટી સાદ્રીથી કોંગ્રેસના પૂર્વ ધારાસભ્ય પ્રકાશ ચૌધરી, ડુંગરપુરના ચોરાસીથી મહેન્દ્ર બરજોડ, સરદારશહેરથી રાજકરણ ચૌધરી અને મસુદાથી બ્રહ્મદેવ કુમાવતે ચૂંટણીની રેસમાંથી પોતાના નામ પાછા ખેંચ્યા નથી અને અપક્ષ તરીકે ચૂંટણી લડવાનો નિર્ણય લીધો છે. ગુરુવારે ઉમેદવારી પરત ખેંચવાનો છેલ્લો દિવસ હતો. 200 સભ્યોની રાજસ્થાન વિધાનસભા માટે 25 નવેમ્બરે મતદાન થશે અને મતગણતરી 3 ડિસેમ્બરે થશે.

આ પણ વાંચો, પાકિસ્તાનમાં લશ્કર-એ-તૈયબાના પૂર્વ કમાન્ડર અકરમ ગાઝીની ગોળી મારીને હત્યા