કચ્છ : મુન્દ્રાના પાસેથી પસાર થતી નર્મદા કેનાલમાં ડૂબી જવાથી પાંચ લોકોનાં મોત
કચ્છમાં સોમવારે મોડી સાંજે એક મોટી દુર્ઘટના ઘટી છે. મુન્દ્રાના ગુંદાલા પાસેથી પસાર થતી નર્મદા કેનાલમાં ડૂબી જવાથી પાંચ લોકોનાં મોત નિપજ્યા હોવાની ઘટના સામે આવી છે. સ્થાનિક લોકોએ કેનાલમાંથી તમામ મૃતદેહ બહાર કાઢ્યા હતા. બનાવની જાણ થતાં જિલ્લા વહીવટી તંત્ર પણ દોડતું થયું હતું અને ઉચ્ચ અધિકારીઓ ઘટનાસ્થળે પહોંચી જઈ રાહત બચાવ કામગીરીની સમીક્ષા કરી આ બનાવ કઈ રીતે બન્યો તે દિશામાં તપાસના આદેશ આપવામાં આવ્યા છે.
ખેતમજૂરી કરતા ત્રણ મહિલા અને બે પુરૂષ ડૂબ્યા હતા
આ અંગે મળતી માહિતી મુજબ, ગુંદાલા ગામમાં ખેતમજૂરી કરી ગુજરાન ચલાવતા શ્રમજીવી પરિવારની ત્રણ મહિલા અને બે પુરુષો સહિત પાંચ લોકોના મોત નિપજતા અન્ય પરિવારજનોમાં આક્રંદ છવાયું હતું. પોલીસે આ મામલે વધુ તપાસ હાથ ધરી છે. પોલીસની પ્રાથમિક તપાસમાં મૃતકોમાં રાજેશ ખીમજી, કલ્યાણ દામજી, હીરાબેન કલ્યાણ, રસિલા દામજી અને સવિતાબેનનો સમાવેશ થાય છે.
