કોલકાતા કાંડ : તબીબોની 3 માંગ સરકારે માની લીધી છતાં, સેવા શરૂ નહીં થાય, જાણો કેમ

કોલકાતા, 17 સપ્ટેમ્બર : કોલકાતાની ઘટનામાં મુખ્યમંત્રી મમતા બેનર્જીએ મોટી કાર્યવાહી કરી છે. મુખ્યમંત્રીએ કોલકાતા પોલીસ કમિશનર વિનીત ગોયલ અને ડેપ્યુટી કમિશનર (ઉત્તર) સહિત ચાર અધિકારીઓને હટાવવાની જાહેરાત કરી છે. જેમાં આરોગ્ય વિભાગ સાથે સંકળાયેલા બે અધિકારીઓનો સમાવેશ થાય છે. વિરોધ કરી રહેલા જુનિયર ડોક્ટરોએ મુખ્યમંત્રીના આ નિર્ણયને આવકાર્યો છે અને તેને નૈતિક જીત ગણાવી છે. જોકે, તેઓએ હડતાળ પાછી ખેંચી નથી. જુનિયર ડોકટરોનું કહેવું છે કે જ્યાં સુધી વચનો પૂરા નહીં થાય ત્યાં સુધી અમે અહીં ‘સ્વાસ્થ્ય ભવન’ (સ્વાસ્થ્ય વિભાગના મુખ્યાલય) ખાતે અમારી હડતાળ અને પ્રદર્શન ચાલુ રાખીશું.

આ પણ વાંચો :- ગુજરાતના મુખ્યમંત્રી ભૂપેન્દ્ર પટેલે PM Modiને જન્મદિવસની શુભેચ્છા પાઠવી

આરજી કર મેડિકલ કોલેજની ઘટનાનો વિરોધ કરી રહેલા જુનિયર ડોકટરોએ સોમવારે રાત્રે કહ્યું કે જ્યાં સુધી મુખ્યમંત્રી મમતા બેનર્જી તેમની માંગણીઓ સાથે સંબંધિત તમામ વચનો પૂરા નહીં કરે ત્યાં સુધી તેઓ તેમનો વિરોધ અને હડતાલ ચાલુ રાખશે. હડતાળ પર ઉતરેલા તબીબોએ જણાવ્યું હતું કે તેમની તમામ માંગણીઓ હજુ સુધી સંતોષવામાં આવી નથી. અમે આરોગ્ય સચિવને હટાવવાની પણ માંગ કરી છે.

જુનિયર ડોકટરોએ કહ્યું કે તેઓ આરજી કર અંગે સુપ્રીમ કોર્ટમાં મંગળવારે થનારી સુનાવણીની પણ રાહ જોઈ રહ્યા છે. તેમણે કહ્યું, આ આંદોલનની જીત છે. એ વાત સાચી છે કે રાજ્ય સરકારે અમારી મોટાભાગની માંગણીઓ સ્વીકારી છે. જો કે, આરોગ્ય વિભાગમાં ભ્રષ્ટાચારના મુદ્દાને લઈને ચર્ચા થઈ હતી અને જ્યાં સુધી તેનું નિરાકરણ નહીં આવે ત્યાં સુધી અમે કામ પર પાછા ફરીશું નહીં.

મેડિકલ એજ્યુકેશનના નિયામક (DME) અને આરોગ્ય સેવાઓના નિયામક (DHS) સિવાય સીએમ મમતાએ ડેપ્યુટી કમિશનર (ઉત્તરી વિભાગ)ને પણ હટાવવાની જાહેરાત કરી છે. સીએમએ કહ્યું, સુપ્રીમ કોર્ટમાં સુનાવણી બાદ મંગળવારે સાંજે 4 વાગ્યા પછી નવા પોલીસ કમિશનરના નામની જાહેરાત કરીશું. આ એમઓયુ પર મુખ્ય સચિવ મનોજ પંતે હસ્તાક્ષર કર્યા હતા. આરજી કર હોસ્પિટલ વતી મંત્રણામાં ભાગ લેનાર 42 ડોકટરોના પ્રતિનિધિ મંડળે પણ હસ્તાક્ષર કર્યા હતા.

શું હતી હડતાળિયા તબીબોની પાંચ માંગ?

ઘટનાના આરોપીઓ અને ક્રાઈમ સીન સાથે છેડછાડ કરનારાઓની ધરપકડ કરીને કડક સજા આપવામાં આવે.

આરજી મેડિકલ કોલેજના પૂર્વ પ્રિન્સિપાલ સંદીપ ઘોષ સામે કાર્યવાહી થવી જોઈએ.

આરોગ્ય કર્મચારીઓની સુરક્ષા વધારવી જોઈએ.  હોસ્પિટલમાં સલામતીના પગલાં સુનિશ્ચિત કરવા જોઈએ.

રાજ્યની સરકારી હોસ્પિટલોમાં જોખમી કલ્ચર સદંતર નાબૂદ થવો જોઈએ.

કોલકાતા પોલીસ કમિશનર વિનીત ગોયલ સહિત દોષિત અધિકારીઓને હટાવવા જોઈએ.

કઈ માંગણીઓ સ્વીકારવામાં આવી…

ઘટનાના મુખ્ય આરોપી સંજય રાયની ધરપકડ થઈ ચૂકી છે. મેડિકલ કોલેજના પૂર્વ પ્રિન્સિપાલ સંદીપ ઘોષ અને તાલા પોલીસ સ્ટેશનના એક પોલીસ અધિકારીની પણ પુરાવા સાથે ચેડા કરવાના આરોપમાં ધરપકડ કરવામાં આવી છે.

કોલકાતા પોલીસ કમિશનર અને ડેપ્યુટી પોલીસ કમિશનરને પણ તેમના પદ પરથી હટાવી દેવામાં આવ્યા છે. મેડિકલ એજ્યુકેશનના નિયામક કૌસ્તવ નાઈક અને આરોગ્ય સેવાઓના નિયામકને દૂર કરવામાં આવ્યા હતા.

હોસ્પિટલો અને મેડિકલ કોલેજ કેમ્પસમાં સુરક્ષા સંબંધિત અન્ય મુદ્દાઓ પર વિચાર કરવા માટે મુખ્ય સચિવના નેતૃત્વમાં ટાસ્ક ફોર્સની રચનાની પણ જાહેરાત કરવામાં આવી છે. ટાસ્ક ફોર્સમાં હોમ સેક્રેટરી, ડીજીપી, કોલકાતા પોલીસ કમિશનર અને જુનિયર ડોકટરોના પ્રતિનિધિઓ પણ સામેલ હશે. હોસ્પિટલોમાં ફરિયાદોના નિરાકરણ માટે પણ સિસ્ટમ તૈયાર કરવામાં આવશે. હોસ્પિટલોમાં સીસીટીવી અને વોશરૂમ જેવી સુવિધાઓ માટે 100 કરોડ રૂપિયા મંજૂર કરવામાં આવ્યા છે.

કઈ માંગણીઓ પર મામલો અટવાયેલો છે?

આરોગ્ય વિભાગમાં ચાલતા ભ્રષ્ટાચારનો મુદ્દો ઉકેલવો જોઈએ અને આરોગ્ય વિભાગના પ્રિન્સિપલ સેક્રેટરીને પણ હટાવવા જોઈએ. સરકાર હજુ સુધી તેમને હટાવવા માટે સંમત નથી. જુનિયર તબીબોનું કહેવું છે કે આરોગ્ય વિભાગમાં પ્રિન્સિપલ સેક્રેટરીના આશ્રય હેઠળ ભ્રષ્ટાચાર થાય છે. પરંતુ સરકારે પ્રિન્સિપલ સેક્રેટરીને હટાવ્યા નથી.  જ્યારે મેડિકલના વિદ્યાર્થીઓ ઘણા સમયથી અગ્ર સચિવને હટાવવાની માંગ કરી રહ્યા છે.

રાજ્યની સરકારી હોસ્પિટલોમાં આરોગ્ય કર્મચારીઓની સુરક્ષા વધારવામાં આવે. હોસ્પિટલમાં સુરક્ષાના પગલાં સુનિશ્ચિત કરવા જોઈએ. તબીબોનું કહેવું છે કે અમારો ઉદ્દેશ્ય હોસ્પિટલમાં ભ્રષ્ટાચારનો અંત લાવવાનો છે.  હોસ્પિટલમાં આ ટોળકી સક્રિય છે. હોસ્પિટલોમાં સક્રિય સિન્ડિકેટ્સ અને વિકસી રહેલા ભ્રષ્ટાચાર રેકેટ અંગેની ચર્ચા અધૂરી છે. અત્યાર સુધી અમને આ મામલે માત્ર મૌખિક ખાતરી મળી છે, તેથી અમારી લડાઈ હજી પૂરી થઈ નથી.