કાર પર ભારતીય ધ્વજ લગાવતા પહેલા જાણો આ નિયમો, ફક્ત આ લોકોને જ હોય છે પરવાનગી

• 15 ઓગસ્ટ નજીક આવતા બજારમાં ધ્વજનું વેચાણ શરૂ થઈ ગયું છે અને લોકોએ તેમના ઘરો અને વાહનો ઉપર ભારતીય ધ્વજ લગાવવાનું શરૂ કરી દીધું છે. આવી સ્થિતિમાં, ચાલો જાણીએ કે ધ્વજ ફરકાવવાના નિયમો શું છે

HD ન્યૂઝ ડેસ્ક, 13 ઓગસ્ટ: 15મી ઓગષ્ટ નિમિત્તે આઝાદીની ઉજવણી નિમિત્તે બજારોમાં ઠેર-ઠેર ભારતીય ધ્વજનું વેચાણ થવા લાગ્યું છે. આ સાથે જ વડાપ્રધાન નરેન્દ્ર મોદી દ્વારા શરૂ કરવામાં આવેલા ‘હર ઘર તિરંગા‘ અભિયાનમાં પણ લોકો ઉત્સાહપૂર્વક ભાગ લઈ રહ્યા છે. હવે લોકો વાહનોથી લઈને ઘરો સુધી તિરંગો લગાવી રહ્યા છે. પરંતુ, રાષ્ટ્રધ્વજ ફરકાવવાના કેટલાક નિયમો છે, જે મુજબ ત્રિરંગાને ફરકાવી શકાય છે. તેવી જ રીતે કાર પર તિરંગો લગાવવા અંગે પણ કેટલાક નિયમો છે, જેમાં ભારતના કેટલાક લોકોને જ કાર પર તિરંગો લગાવવાની પરવાનગી આપવામાં આવી છે. આવી સ્થિતિમાં આજે અમે તમને જણાવીશું કે કાર પર કોણ-કોણ લગાવી શકે છે ધ્વજ.

કાર પર ધ્વજ લગાવવાના નિયમો શું છે?

ભારતમાં ત્રિરંગો ફરકાવવા સંબંધિત તમામ નિયમો અને કાયદા ફ્લેગ કોડ 2002 હેઠળ આવે છે. આ ફ્લેગ કોડ 26 જાન્યુઆરી 2002 થી લાગુ છે. 2002 પહેલા, તિરંગો ફરકાવવાના નિયમો એમ્બ્લેમ્સ એન્ડ નેમ્સ (અયોગ્ય ઉપયોગ નિવારણ) અધિનિયમ, 1950 અને રાષ્ટ્રીય સન્માનનું અપમાન નિવારણ અધિનિયમ, 1971 હેઠળ આવતા હતા. આ કોડમાં માત્ર થોડા લોકોને જ કાર પર ધ્વજ લગાવવાની છૂટ છે અને તે સિવાય તેઓ નિયમ મુજબ ધ્વજ પણ લગાવી શકે છે. તમને જણાવી દઈએ કે જે લોકો પાસે ધ્વજ લગાવવાની પરવાનગી છે તેઓ જ્યારે પણ જરૂર લાગે ત્યારે તેમની કાર પર ધ્વજ લગાવી શકે છે. ધ્વજ કારની જમણી બાજુએ હોવો જોઈએ. જો કોઈ મહાનુભાવની સાથે અન્ય દેશના કોઈ મહાનુભાવ હોય તો આ સ્થિતિમાં ભારતનો ધ્વજ કારની જમણી બાજુએ અને અન્ય મહાનુભાવના દેશનો ધ્વજ ડાબી બાજુએ લગાવવો જોઈએ.

ધ્વજ કોણ-કોણ લગાવી શકે?

હવે ચાલો જાણીએ કે કોણ-કોણ ધ્વજ ગાડીમાં લગાવી શકે છે. ભારતના ધ્વજ સંહિતાના નિયમો અનુસાર રાષ્ટ્રપતિ, ઉપરાષ્ટ્રપતિ, રાજ્યપાલ અને લેફ્ટનન્ટ-ગવર્નર, વિદેશી દૂતાવાસના વડા, વડા પ્રધાન, કેબિનેટ પ્રધાન, કેન્દ્રીય રાજ્ય પ્રધાન, મુખ્ય પ્રધાન, અન્ય કેબિનેટ પ્રધાનો પોતાની ગાડી પર ધ્વજ ફરકાવી શકે છે. ધ્વજ આ ઉપરાંત લોકસભાના અધ્યક્ષ, રાજ્યસભાના ઉપાધ્યક્ષ, રાજ્ય વિધાન પરિષદોના અધ્યક્ષ, વિધાનસભાના અધ્યક્ષ વગેરે ધ્વજ ફરકાવી શકે છે.

કયા નિયમો બદલાયા છે?

અગાઉ નિયમો અનુસાર માત્ર હાથથી વણેલા અને કાંતેલા ઊન, સુતરાઉ કે રેશમ ખાદીમાંથી બનેલો ધ્વજ ફરકાવી શકાતો હતો અને હવે મશીનથી બનેલો કોટન, ઊન કે રેશમ ખાદીનો ત્રિરંગો પણ ફરકાવી શકાશે. આ સિવાય પોલિએસ્ટરથી બનેલો ત્રિરંગો પણ ફરકાવી શકાય છે. જ્યારે પહેલા સૂર્યોદયથી સૂર્યાસ્ત સુધી ધ્વજ ફરકાવી શકાતો હતો અને હવે રાત્રે પણ ધ્વજ ફરકાવી શકાય છે.

આ પણ વાંચો: Googleની મોટી ઇવેન્ટ: નવા ફોનથી લઈને સ્માર્ટ ઘડિયાળો થશે લોન્ચ