KL રાહુલ નહીં બને દિલ્હી કેપિટલ્સના કેપ્ટન? જાણો ટીમના માલિક પાર્થ જિંદાલે શું કહ્યું

• મેગા ઓક્શન બાદ હવે ઘણી ટીમો સામે સૌથી મોટો પડકાર ટીમનો કેપ્ટન બનાવવાનો છે

નવી દિલ્હી, 29 નવેમ્બર: ઈન્ડિયન પ્રીમિયર લીગ (IPL) 2025ની મેગા ઓક્શન બાદ હવે ઘણી ટીમો સામે સૌથી મોટો પડકાર ટીમનો કેપ્ટન બનાવવાનો છે. આ અંગે સોશિયલ મીડિયા પર અનેક પ્રકારની ચર્ચાઓ થઈ રહી છે. દિલ્હી કેપિટલ્સના કેપ્ટન તરીકે અક્ષર પટેલ પણ મજબૂત દાવેદાર છે. શું KL રાહુલ પણ ટીમની કેપ્ટનશીપ સંભાળી શકે છે? આ પ્રશ્ન પર ટીમના માલિક પાર્થ જિંદાલે પણ સ્પષ્ટતા કરી છે. હાલમાં રોયલ ચેલેન્જર્સ બેંગલુરુ, કોલકાતા નાઈટ રાઈડર્સ, દિલ્હી કેપિટલ્સ, પંજાબ કિંગ્સ, લખનઉ સુપર જાયન્ટ્સ જેવી ટીમો છે જે કેપ્ટનની શોધમાં છે. માત્ર સનરાઇઝર્સ હૈદરાબાદ (પેટ કમિન્સ), ચેન્નાઇ સુપર કિંગ્સ (ઋતુરાજ ગાયકવાડ) અને ગુજરાત ટાઇટન્સ (શુભમન ગિલ)ની ટીમો પાસે કેપ્ટન છે.

દિલ્હી કેપિટલ્સે અક્ષર પટેલ (16.50 કરોડ), કુલદીપ યાદવ (13.25 કરોડ), ટ્રિસ્ટન સ્ટબ્સ (10 કરોડ) અને અભિષેક પોરેલ (4 કરોડ)ને રિટેન કર્યા હતા. IPL ઓક્શનમાં દિલ્હીએ KL રાહુલને 14 કરોડ રૂપિયામાં ખરીદ્યો હતો. દિલ્હીની ટીમમાં KL રાહુલ, ફાફ ડુ પ્લેસિસનો કેપ્ટનશીપ મટિરિયલ છે. અક્ષર પટેલ પણ કેપ્ટનશીપનો દાવેદાર છે. પરંતુ અત્યાર સુધી દિલ્હી કેપિટલ્સ ટીમની કેપ્ટનશીપને લઈને સસ્પેન્સ છે.

ટીમના માલિક પાર્થ જિંદાલે શું કહ્યું?

ટીમના માલિક પાર્થ જિંદાલે આ મુદ્દે સમગ્ર સ્થિતિ સ્પષ્ટ કરી છે. પાર્થ જિંદાલે કહ્યું કે, કેપ્ટનશિપ વિશે વાત કરવી એ હજુ થોડું વહેલું ગણાશે. અક્ષર પટેલ ઘણા લાંબા સમયથી ફ્રેન્ચાઇઝી સાથે છે. તે છેલ્લી સાઇકલમાં વાઇસ-કેપ્ટન હતો, તેથી અમને હજુ સુધી ખબર નથી કે તે અક્ષર હશે કે કોઈ બીજું… હજુ ઘણું બધું થવાનું બાકી છે. મેં KL રાહુલ સાથે વાત કરી હતી પરંતુ હજુ સુધી હું તેને મળ્યો નથી. હું તેમને પર્સનલી ખૂબ સારી રીતે ઓળખું છું, હું તેની પાસેથી (તેમની વિચારસરણી) સમજીશ, અને આ વાત તેના પર નિર્ભર કરે છે કે કોચિંગ ગ્રુપ શું કરે છે? આખરે તે જ છે જે કિરણ (ગ્રાંધી, સહ-માલિક) અને હું કરવા માંગીએ છીએ. આ માટે પુષ્કળ સમય છે.

દિલ્હી કેપિટલ્સ ટીમનો હિસાબ:

• અત્યાર સુધીનો ખર્ચઃ 119.80 કરોડ રૂપિયા
• કેટલું બાકી: 20 લાખ રૂપિયા
• ખરીદેલ ખેલાડીઓ: 23/25
• વિદેશી ખરીદેલ: 7/8

આ પણ જૂઓ: WTC ફાઇનલ માટે આ 5 ટીમો રેસમાં, જૂઓ ભારત કેમ પહોંચી શકશે