અમૃતપાલ સામેની કાર્યવાહીથી ખાલિસ્તાનીઓ નારાજ, CM માનની પુત્રીને આપી ધમકી
- અમેરિકામાં રહેતી પહેલી પત્ની, પુત્રીને ધમકી
- સીરત માને એક સોશિયલ મીડિયા પોસ્ટમાં આપી જાણકારી
- પરિવારે ખાલિસ્તાનીઓને કરી અપીલ
‘વારિસ પંજાબ દે’ના ચીફ અમૃતપાલ સિંહ અને તેના સહયોગીઓ વિરુદ્ધ દેશભરમાં થઈ રહેલી કાર્યવાહીથી ખાલિસ્તાનીઓ નારાજ છે. ખાલિસ્તાનીઓ એટલા ગુસ્સે છે કે તેઓ વિદેશમાં રહેતા નિર્દોષ ભારતીય વિદ્યાર્થીઓને નિશાન બનાવવાથી પણ બચતા નથી. તેમના ગુસ્સાનો ભોગ અમેરિકાના સિએટલમાં રહેતા પંજાબના મુખ્યમંત્રી ભગવંત માનનો પરિવાર પણ બન્યો છે. ભગવંત માનની પહેલી પત્ની ઈન્દ્રપ્રીત કૌર, તેમની પુત્રી સીરત માન અને પુત્ર દિલશાન માનને સતત ધમકીઓ મળી રહી છે. સીરત માને એક સોશિયલ મીડિયા પોસ્ટમાં જણાવ્યું હતું કે તેને, તેના ભાઈ દિલશાનને ઓનલાઈન હેરાન કરવામાં આવી રહ્યો છે. અમેરિકાના સ્થાનિક ગુરુદ્વારા તરફથી આ ધમકીઓ આપવામાં આવી રહી છે.
શું કહ્યું માનની પુત્રીએ ?
સીરત કૌરે એક પોસ્ટમાં કહ્યું કે છેલ્લા કેટલાક દિવસોથી મને અને મારા ભાઈને ઓનલાઈન ધમકીઓ મળી રહી છે. અમને ફોન કરીને ધમકીઓ આપવામાં આવી રહી છે. મારો પરિવાર અમારી સુરક્ષાને લઈને ચિંતિત છે. તેમણે ખાલિસ્તાનીઓને અપીલ કરી હતી કે અમૃતપાલ અને તેમના વહીવટીતંત્રના કોઈપણ નિર્ણયમાં તેમનો પરિવાર સામેલ નથી.
પટિયાલાના વકીલે પોસ્ટ શેર કરી
પટિયાલા સ્થિત વકીલ હરમીત બ્રારે પોતાની ફેસબુક ટાઈમલાઈન પર સીરત કૌર માનની આ પોસ્ટ શેર કરી છે. સિરાતે આ પોસ્ટમાં કહ્યું છે કે હું કહેવા માંગુ છું કે પંજાબના મુખ્યમંત્રી અમૃતપાલ સાથે જોડાયેલા કોઈ નિર્ણયમાં અમારો પરિવાર ખાસ સામેલ નથી. મને સમજાતું નથી કે અમને શા માટે નિશાન બનાવવામાં આવી રહ્યા છે. અમે અમારી સુરક્ષાને લઈને ખૂબ જ ચિંતિત છીએ.
‘વિદેશમાં રહેતા ભારતીયો નિશાના પર’
દરમિયાન ભગવંત માનના બાળકોને નિશાન બનાવી રહેલા ખાલિસ્તાની તત્વો પર નિશાન સાધતા અકાલ તખ્તના વડા ગિયાની હરપ્રીત સિંહે કહ્યું કે મને ગઈકાલે એક ફોન આવ્યો હતો. મુખ્યમંત્રી ભગવંત માનનો પરિવાર અને તેમના બાળકો અમેરિકામાં છે. તેમને હેરાન કરવામાં આવી રહ્યા છે. આ ખોટું છે. જ્યારે આપણે કહીએ છીએ કે આપણા યુવાનો નિર્દોષ છે તો તેઓ પણ નિર્દોષ છે. તેમનો શું વાંક છે. તેમાં મુખ્યમંત્રીના બાળકોનો કોઈ દોષ નથી. તેમને નિશાન બનાવવું મૂર્ખતા છે. છોકરીને હેરાન કરવી એ આપણો ધર્મ નથી.
