ચૂંટણી પરિણામ પછીની રણનીતિ માટે આજે ઈન્ડી ગઠબંધનની બેઠક, કેજરીવાલ આપશે હાજરી

• દિલ્હીમાં આજે ઈન્ડી ગઠબંધનની બેઠક
• ઈન્ડી ગઠબંધનના ટોચના નેતાઓ આપશે હાજરી
• મમતા બેનર્જી, સ્ટાલિન અને મહેબુબા મુફ્તી હાજર નહીં રહે

દિલ્હી, 01 જૂન: વિપક્ષી ઈન્ડી ગઠબંધનના નેતાઓ આજે લોકસભા ચૂંટણીમાં તેમના પ્રદર્શનનું મૂલ્યાંકન કરવા તેમજ ચૂંટણી પરિણામો પછી તેમની રણનીતિ બનાવવા માટે એક બેઠક યોજવાના છે. આ બેઠકમાં આમ આદમી પાર્ટીના વડા અરવિંદ કેજરીવાલપણ ભાગ લેશે, જેમણે 2 જૂને આત્મસમર્પણ કરવાનું છે. આ બેઠકમાં સપા સુપ્રીમો અખિલેશ યાદવ પણ ભાગ લેવાના છે. કેજરીવાલ આજે સાંજે કોંગ્રેસ અધ્યક્ષ મલ્લિકાર્જુન ખડગેના ઘરે યોજાનારી આ મહત્વપૂર્ણ બેઠકમાં પંજાબના સીએમ ભગવંત માન અને AAP સાંસદ સંજય સિંહ સાથે હાજરી આપશે. પંજાબમાં મતદાન પ્રક્રિયાની જવાબદારી સંભાળ્યા બાદ સીએમ માન દિલ્હી પહોંચશે. જો કે, મતદાનમાં તેમના ટોચના નેતાઓની વ્યસ્તતાને કારણે, તૃણમૂલ કોંગ્રેસ આ બેઠકમાં ભાગ લઈ શકશે નહીં. તેમના સિવાય તમિલનાડુના સીએમ સ્ટાલિન પણ બેઠકમાં ભાગ લઈ શકશે નહીં અને તેમના સ્થાને ટીઆર બાલુ આજે બેઠકમાં ભાગ લેશે. જમ્મુ-કાશ્મીરના ભૂતપૂર્વ મુખ્યપ્રધાન મહેબુબા મુફ્તી પણ આ બેઠકમાં હાજર રહેવાના નથી.

આ પણ વાંચો: ઈન્ડી ગઠબંધની 1 જૂને બેઠક બોલાવવા પાછળ ખડગે અને કોંગ્રેસની રણનીતિ શું છે?

પ્રદર્શન અંગે થશે ચર્ચા

બેઠક દરમિયાન વિપક્ષી નેતાઓ ચૂંટણી પરિણામો પહેલા તેમની વ્યૂહરચના પર ચર્ચા કરશે અને સાત તબક્કાની ચૂંટણીમાં તેમના પ્રદર્શનનું મૂલ્યાંકન પણ કરશે. વિપક્ષી ગઠબંધન દાવો કરી રહ્યું છે કે તે ભાજપની આગેવાની હેઠળના રાષ્ટ્રીય લોકતાંત્રિક ગઠબંધન (NDA)ને કેન્દ્રમાં સત્તામાં પાછા ફરતા અને પોતાની સરકાર બનાવવાથી રોકવામાં સફળ રહેશે.

ઈન્ડી ગઠબંધનની રચના બાદ તેની સાથે કુલ 28 પાર્ટીઓ સંકળાયેલી હતી, પરંતુ લોકસભાની ચૂંટણી પહેલા બિહારના મુખ્યમંત્રી નીતિશ કુમારની આગેવાની હેઠળના જનતા દળ (યુનાઈટેડ) અને પશ્ચિમ ઉત્તર પ્રદેશમાં પ્રભાવ ધરાવતા રાષ્ટ્રીય લોકદળ જેવા કેટલાક પક્ષો ભાજપના નેતૃત્વ હેઠળના એનડીએમાં જોડાયા હતા.

કેજરીવાલ આવતી કાલે કરશે આત્મસમર્પણ

કેજરીવાલને દિલ્હી લિકર પોલિસી સંબંધિત કથિત મની લોન્ડરિંગ કેસમાં સુપ્રીમ કોર્ટમાંથી 1 જૂન સુધી વચગાળાના જામીન આપવામાં આવ્યા હતા, જેનો સમય ગાળો પૂરો થતા કેજરીવાલે આવતી કાલે આત્મસમર્પણ કરવું પડશે. સૂત્રો દ્વારા જાણવા મળ્યું છે કે આ બેઠક લોકસભા ચૂંટણીમાં તેના પ્રદર્શનને ધ્યાનમાં રાખીને ઈન્ડી ગઠબંધનના ભાવિ પગલાઓની સમીક્ષા અને ચર્ચા કરવા માટે બોલાવવામાં આવી છે. દિલ્હીના સીએમ અરવિંદ કેજરીવાલ, બિહારના પૂર્વ નાયબ મુખ્યમંત્રી તેજસ્વી યાદવ, સમાજવાદી પાર્ટીના નેતા અખિલેશ યાદવ અને અન્ય સહિત વિપક્ષી ગઠબંધનના તમામ પક્ષોના વડાઓને બેઠકમાં આમંત્રણ આપવામાં આવ્યું હતું.

આ પણ વાંચો: મમતા બેનર્જી ઈન્ડી ગઠબંધનની 1 જૂને યોજાનાર બેઠકમાં નહીં આપે હાજરી, જાણો કારણ