કેજરીવાલ નહીં આવી શકે જેલની બહાર, કોર્ટે જામીન અરજી ફગાવ્યા

• દિલ્હી દારૂ કૌભાંડ કેસમાં હાઈકોર્ટે મોટો ચુકાદો આપ્યો છે. કોર્ટે દિલ્હીના સીએમ અરવિંદ કેજરીવાલને જામીન આપ્યા નથી. હવે કેજરીવાલ હાલ જેલમાંથી બહાર આવી શકશે નહીં

દિલ્હી, 25 જૂન: દિલ્હી હાઈકોર્ટે દિલ્હી દારૂ કૌભાંડ સંબંધિત ભ્રષ્ટાચારના કેસમાં મુખ્યમંત્રી અરવિંદ કેજરીવાલના જામીન પર રોક લગાવી દીધી છે. દિલ્હી હાઈકોર્ટે આ મામલામાં મોટો નિર્ણય સંભળાવતા કેજરીવાલના જામીન પર સ્ટે યથાવત રાખ્યો છે. આ નિર્ણય બાદ કેજરીવાલ હાલ તિહાર જેલમાં જ રહેશે. કોર્ટે આજે સ્પષ્ટપણે કહ્યું છે કે અરવિંદ કેજરીવાલના જામીન પરનો સ્ટે ચાલુ રહેશે. EDએ તેમના જામીન રદ કરવા સામે હાઈકોર્ટમાં અરજી કરી હતી, જેના પર હાઈકોર્ટે સુનાવણી પૂરી ન થાય ત્યાં સુધી જામીન પર સ્ટે ચાલુ રાખવાનો નિર્ણય આપ્યો છે.

જસ્ટિસ સુધીર કુમાર જૈને આ કેસની સુનાવણી કરી

દિલ્હી હાઈકોર્ટમાં જસ્ટિસ સુધીર કુમાર જૈનની સિંગલ બેન્ચે આજે આ કેસની સુનાવણી કરી અને પોતાનો ચુકાદો સંભળાવ્યો હતો. કેજરીવાલને 20 જૂનના રોજ નીચલી અદાલતે જામીન આપ્યા હતા, ત્યારબાદ EDએ આ જામીનના નિર્ણય સામે હાઈકોર્ટમાં અરજી કરી હતી અને જામીન રદ કરવાની માંગ કરી હતી. 21 જૂને દિલ્હી હાઈકોર્ટે કેજરીવાલના જામીન પર વચગાળાનો સ્ટે મૂકી દીધો હતો અને નિર્ણય સુરક્ષિત રાખ્યો હતો.

કોર્ટના નિર્ણય સામે કેજરીવાલ સુપ્રીમ કોર્ટમાં જશે

હાઈકોર્ટના આદેશ પર આમ આદમી પાર્ટીનું નિવેદન પણ પ્રકાશમાં આવ્યું છે. પાર્ટીએ કહ્યું છે કે તે કોર્ટના નિર્ણય સાથે અસંમત છે. આમ આદમી પાર્ટીએ કહ્યું છે કે હાઈકોર્ટના નિર્ણયને સુપ્રીમ કોર્ટમાં પડકારવામાં આવશે.

આ પણ વાંચો: દેશના ઈતિહાસમાં પ્રથમ વખત સ્પીકર માટે થશે ચૂંટણી, ઓમ બિરલા સામે કોંગ્રેસે કે. સુરેશને ઉતાર્યા