કર્ણાટક ઈલેક્શન: CM પદને લઈ ક્યાં અટકે છે વાત? પાર્ટીએ શિવકુમારને શું ઓફર કરી?

કર્ણાટકના આગામી મુખ્યમંત્રીના નામ પર સસ્પેન્સ યથાવત છે. કોંગ્રેસમાં સતત ચર્ચા ચાલી રહી છે, પરંતુ હજુ સુધી મુખ્યમંત્રીના નામ પર કોઈ સહમતિ બની શકી નથી. બુધવારે (17 મે) પણ સવારથી જ બેઠકોનો ધમધમાટ ચાલુ રહ્યો હતો. અગાઉ સિદ્ધારમૈયાના નામને ફાઈનલ કરવાની ચર્ચાઓ તેજ હતી, પરંતુ હવે સૂત્રોનું કહેવું છે કે ડીકે શિવકુમાર તૈયાર નથી થઈ રહ્યા. પાર્ટીએ તેમને મનાવવા માટે એક ઓફર પણ આપી છે, પરંતુ શિવકુમાર તેનાથી સંતુષ્ટ નથી.

કોંગ્રેસે શું ઓફર આપી ડીકે શિવકુમારને?
ચાલો તમને જણાવીએ કે કોંગ્રેસે ડીકે શિવકુમારને શું ઓફર કરી છે અને તેમની શું માંગ છે. કર્ણાટક કોંગ્રેસના અધ્યક્ષ ડીકે શિવકુમારે બુધવારે પૂર્વ કોંગ્રેસ અધ્યક્ષ રાહુલ ગાંધી સાથે લગભગ એક કલાક સુધી ચર્ચા કરી હતી. સૂત્રોએ જણાવ્યું કે રાહુલ ગાંધી અને કોંગ્રેસના નેતૃત્વએ ડીકે શિવકુમારને ડેપ્યુટી સીએમ પદ તેમજ 6 મોટા મંત્રાલયોની ઓફર કરી છે.

શું છે ડીકેની માંગ?
આ ઉપરાંત તેમને અઢી વર્ષ પછી મુખ્યમંત્રી પદ આપવાનું પણ વચન આપવામાં આવ્યું છે. બીજી તરફ, શિવકુમારની માંગ છે કે રાજ્યમાં એક જ ડેપ્યુટી સીએમ હોવો જોઈએ, જણાવી દઈએ કે કર્ણાટકમાં એકથી વધુ ડેપ્યુટી સીએમની ચર્ચા છે. ડેપ્યુટી CM બાદ જ સીએમ બનાવવા જોઈએ. સીએમ બનાવવાની જાહેરાત અત્યારે જ થવી જોઈએ, જેથી કરીને ટીકે સહદેવ સિંહ જેવી સ્થિતિ પાછળથી ન બને.

દરમિયાન રાજકીય વર્તુળોમાં પણ અનેક સવાલો ઉઠી રહ્યા છે. જેમ કે સીએમનું નામ નક્કી કરવામાં કોંગ્રેસ સામે કેવી મુશ્કેલી ઉભી થઈ છે. નામની જાહેરાતને લઈને કોંગ્રેસને શું ચિંતા છે. આ બધા પ્રશ્નોના જવાબો માટે, મુખ્ય પ્રધાન પદના બંને મુખ્ય દાવેદારો સિદ્ધારમૈયા અને શિવકુમારની તાકાત અને નબળાઈનું વિશ્લેષણ કરવું જરૂરી છે.

શું છે સિદ્ધારમૈયાનું મજબુત પાસુ?
સૌથી પહેલા વાત કરીએ પૂર્વ સીએમ સિદ્ધારમૈયાની શક્તિની. સિદ્ધારમૈયા કર્ણાટકમાં બહોળો પ્રભાવ ધરાવે છે અને કોંગ્રેસના ધારાસભ્યોના મોટા વર્ગમાં તેઓ ખૂબ જ લોકપ્રિય છે. તેમને મુખ્યમંત્રી (2013-18) તરીકે સરકાર ચલાવવાનો અનુભવ પણ છે. તેઓ 13 બજેટ રજૂ કરવાનો અનુભવ ધરાવતા સક્ષમ પ્રશાસક પણ છે. તેઓ રાહુલ ગાંધીના નજીકના ગણાય છે. તેમને દેખીતી રીતે તેમનો ટેકો પણ છે.

શું છે સિદ્ધારમૈયાની નબળાઈ?
સિદ્ધારમૈયાની નબળાઈ વિશે વાત કરીએ તો, તેઓ સંગઠનાત્મક સ્વરૂપમાં પાર્ટી સાથે વધુ જોડાણ ધરાવતા નથી. તેમના નેતૃત્વમાં કોંગ્રેસ સરકાર 2018માં ફરી સત્તામાં આવી શકી નથી. કોંગ્રેસના જૂના નેતાઓના એક વર્ગ દ્વારા તેમને હજુ પણ બહારના વ્યક્તિ તરીકે ગણવામાં આવે છે. તેઓ અગાઉ જેડીએસમાં હતા. ઉંમર પણ એક પરિબળ હોઈ શકે છે. સિદ્ધારમૈયા 75 વર્ષના છે.

શું છે ડીકે શિવકુમારની તાકાત?
હવે વાત કરીએ ડીકે શિવકુમારની. શિવકુમારની શક્તિઓમાં મજબૂત સંગઠનાત્મક ક્ષમતા અને પક્ષને ચૂંટણી જીતવામાં મદદ કરવામાં મુખ્ય ભૂમિકા ભજવવાનો સમાવેશ થાય છે. તેઓ પક્ષ પ્રત્યેની તેમની વફાદારી માટે જાણીતા છે. મુશ્કેલ સમયમાં તેમને કોંગ્રેસના મુખ્ય મુશ્કેલીનિવારક માનવામાં આવે છે. પ્રમુખ વોક્કાલિગા સમુદાય, તેના પ્રભાવશાળી સંતો અને નેતાઓનું સમર્થન પણ તેમને પ્રાપ્ત છે. ઉપરાંત, તેઓ ગાંધી પરિવાર, ખાસ કરીને સોનિયા ગાંધી અને પ્રિયંકા ગાંધી વાડ્રા સાથે નિકટતા ધરાવે છે. ઉંમર તેમની તરફેણમાં છે. તેમની પાસે લાંબો રાજકીય અનુભવ છે અને તેમણે વિવિધ વિભાગો પણ સંભાળ્યા છે.

શું છે ડીકે શિવકુમારની કમજોરી?
જે વાતો શિવકુમારની વિરુદ્ધ થઈ રહી છે. તે છે- IT, ED અને CBIમાં તેમની સામેના કેસ, તિહાર જેલમાં સજા, સિદ્ધારમૈયા કરતાં ઓછી લોક ચાહના અને અનુભવ, એકંદરે તેમનો પ્રભાવ જૂના મૈસુર પ્રદેશ સુધી મર્યાદિત છે. ઉપરાંત, તેઓને અન્ય સમુદાયો તરફથી વધુ સમર્થન નથી. શિવકુમાર કરતાં મોટી સંખ્યામાં ધારાસભ્યો સિદ્ધારમૈયાને સમર્થન આપે તેવી શક્યતા છે. બીજી તરફ રાહુલ ગાંધીનું સિદ્ધારમૈયાને સ્પષ્ટ સમર્થન છે.

આ પણ વાંચો: મેટ્રોમાં અશ્લીલ હરકતો કરનાર યુવકની શોધખોળ, દિલ્હી પોલીસે જાહેર કર્યો ફોટો