આ શું ખાવાનુ બનાવ્યું છે….? ગુસ્સે ભરાયેલા પતિએ કુહાડીથી પત્નીની હત્યા કરી

ઝારખંડના ગુમલા જિલ્લાના નવતોલી ગામમાં મંગળવારે બપોરે એક ભયાનક ઘટના બની. જમવાના નાના વિવાદમાં પતિએ તેની પત્નીની કુહાડીથી ક્રૂરતાપૂર્વક હત્યા કરી દીધી. પોલીસે ઘટનાસ્થળે પહોંચીને મૃતદેહને કબજે કર્યો અને પોસ્ટમોર્ટમ માટે મોકલી આપ્યો.

જમવાની બાબતે વિવાદ

પ્રાપ્ત માહિતી અનુસાર, મંગળવારે સંદીપ ઓરાંવ તેની પત્ની સરોજ ઓરાંવ સાથે જમવા બેઠો હતો. આ દરમિયાન, આ શું ખાવાનુ બનાવ્યું છે, મારે નથી ખાવુ જેવા મામુલી શબ્દોથી વિવાદ શરૂ થયો. આ દલીલ ધીમે ધીમે વધતી ગઈ, જેના પરિણામે શારીરિક ઝઘડો વધ્યો. ગુસ્સે ભરાયેલા સંદીપે ઘરમાં રાખેલી કુહાડી ઉપાડી અને તેની પત્નીના માથા અને ગળા પર વારંવાર ઘા કર્યા, જેનાથી તેનું મોત નીપજ્યું.

સંદીપને દોરડાથી બાંધી દીધો

ઘટના બાદ તરત જ ગામમાં અફડાતફડી મચી ગઈ હતી. અવાજ સાંભળીને આસપાસના લોકો ઘટનાસ્થળે દોડી આવ્યા અને આરોપી સંદીપને પકડીને દોરડાથી બાંધી દીધો. ગ્રામજનોએ તાત્કાલિક ટોટો પોલીસ સ્ટેશનને જાણ કરી. માહિતી મળતાં જ પોલીસની ટીમ ઘટનાસ્થળે પહોંચી ગઈ અને આરોપીને કસ્ટડીમાં લીધો. પોલીસે મૃતક સરોજ ઓરાંવના મૃતદેહનો કબજો લઈ પોસ્ટમોર્ટમ માટે હોસ્પિટલમાં મોકલી આપ્યો છે અને કેસની તપાસ શરૂ કરી છે.

પતિ-પત્ની વચ્ચે વારંવાર ઝઘડો થતો હતો

સ્થાનિક ગ્રામજનોના જણાવ્યા મુજબ, સંદીપ છેલ્લા કેટલાક સમયથી માનસિક રીતે બીમાર હતો અને તેની સારવાર ચાલી રહી હતી. એવું જાણવા મળ્યું છે કે સંદીપ અને સરોજ ઘણીવાર ઝઘડા કરતા હતા. સરોજે તેના પહેલા પતિના મૃત્યુ પછી લગભગ પાંચ વર્ષ પહેલાં સંદીપ સાથે બીજા લગ્ન કર્યા હતા. આ દંપતીને ત્રણ વર્ષનો પુત્ર પણ છે. ગ્રામજનોનું કહેવું છે કે માનસિક બીમારી અને ઘરેલું તણાવ આ ભયાનક ઘટનાનુ કારણ છે. યુવતીની હત્યાથી ગામમાં શોકની લાગણી છવાઈ ગઈ છે.

આ પણ વાંચો: ગર્લફ્રેન્ડના પરિવારે માર માર્યા બાદ યુવકે કરી આત્મહત્યા, SC/ST કલમો હેઠળ કેસ નોંધાયો