ઝાંસી : આગની તપાસ માટે હાઈપાવર સમિતિની રચના, 7 દિવસમાં સરકારને રિપોર્ટ સોંપશે

ઝાંસી, 16 નવેમ્બર : ઉત્તર પ્રદેશના ઝાંસી જિલ્લામાં મેડિકલ કોલેજના બાળકોના વોર્ડમાં લાગેલી આગની ઘટનાની તપાસ માટે ઉત્તર પ્રદેશ સરકારે શનિવારે એક સમિતિની રચના કરી છે. યુપી આરોગ્ય વિભાગની એક ઉચ્ચ સત્તા તપાસ સમિતિની રચના કરવામાં આવી છે. તેમાં ડીજી મેડિકલ એજ્યુકેશનની અધ્યક્ષતામાં 4 સભ્યો સામેલ થશે. આ ઘટના અંગે, ડાયરેક્ટર મેડિકલ એન્ડ હેલ્થ, એડિશનલ ડાયરેક્ટર ઈલેક્ટ્રીકલ મેડિકલ હેલ્થ સર્વિસીસ, ડીજી ફાયર દ્વારા નામાંકિત અધિકારીઓ પણ સભ્ય તપાસ કરશે અને આગામી 7 દિવસમાં કેસનો વિગતવાર તપાસ અહેવાલ સરકારને સુપરત કરશે.

ઝાંસીમાં સ્થિત બુંદેલખંડ ક્ષેત્રની સૌથી મોટી સરકારી હોસ્પિટલોમાંની એક મહારાણી લક્ષ્મીબાઈ મેડિકલ કોલેજના NICU વોર્ડમાં શુક્રવારે રાત્રે લગભગ 10.45 વાગ્યે આગ લાગી હતી. પ્રારંભિક કારણ ઇલેક્ટ્રિકલ શોર્ટ સર્કિટ હોવાનું માનવામાં આવે છે. આ ઘટનામાં 10 નવજાત બાળકો દાઝી ગયા હતા. ઘણા બાળકો ઘાયલ થયા હોવાનું પણ કહેવાય છે. મેડિકલ કોલેજે જણાવ્યું કે અકસ્માત સમયે 52 થી 54 બાળકો એનઆઈસીયુમાં દાખલ હતા, જેમાંથી 10ના મોત થયા છે અને 16ની સારવાર ચાલી રહી છે.

ઝાંસીના અધિક પોલીસ અધિક્ષક (શહેર) જ્ઞાનેન્દ્ર કુમાર સિંહે પીટીઆઈને જણાવ્યું હતું કે શનિવારે સાત શિશુઓનું પોસ્ટમોર્ટમ કરવામાં આવ્યું હતું, જ્યારે ત્રણનું પોસ્ટમોર્ટમ થઈ શક્યું નથી કારણ કે તેમના માતા-પિતાની હજુ સુધી ઓળખ થઈ નથી. હોસ્પિટલમાં અગ્નિશામક સાધનોની મુદત પૂરી થઈ ગઈ હોવાના અહેવાલોને પણ સરકારે ફગાવી દીધા હતા.

મહત્વનું છે કે, યુપીની યોગી સરકારે મૃતકોના પરિવારને 5 લાખ રૂપિયા અને ઘાયલોને 50 હજાર રૂપિયાની આર્થિક સહાયની જાહેરાત પણ કરી છે મેડિકલ કોલેજમાં મૃતકોના પરિવારજનોને પ્રધાનમંત્રી રાષ્ટ્રીય રાહત ફંડમાંથી 2 લાખ રૂપિયાની સહાયની જાહેરાત કરવામાં આવી છે અને ઘાયલોને 50,000 રૂપિયા આપવામાં આવશે.

આ પણ વાંચો :- ભાજપ અને કોંગ્રેસને ચૂંટણી પંચની નોટિસ, નડ્ડા-ખડગે પાસેથી માંગ્યો જવાબ, જાણો સમગ્ર મામલો