કુવાડવામાં સ્ત્રીના કપડાં પહેરી તસ્કર આવ્યાની ચર્ચા

કુવાડવામાં પરોઢીએ સ્ત્રીના કપડાં પહેરી તસ્કર આવ્યાની ચર્ચા તેજ બની છે. આ ઘટનાના દાવા સાથેના સીસીટીવી ફુટેજ પણ સામે આવ્યા છે જેમાં શંકાસ્પદ કાર દેખાઈ રહી છે. વહેલી સવારે મંદિરે દર્શને ગયેલા માજી મહિલા સરપંચ જોઈ જતા પડકારો કરતા શંકાસ્પદ વ્યક્તિ કારમાં નાસી છૂટ્યો હતો. કુવાડવામાં અગાઉ પણ એક જ રાતમાં ત્રણ-ચાર દુકાનોના તાળા તૂટ્યા હોવાની ઘટના બની હતી.

આ અંગે ગ્રામજનોએ જણાવેલ કે આજે તા. 3/6/22ને શુક્રવારે વહેલી સવારે રમેશભાઈ ઢોલરીયા – માજી સરપંચના ઘર પાસે સ્ત્રીના કપડાં પહેરીને કોઈ પુરુષ જેવી દેખાતી વ્યક્તિ સ્વિફ્ટ કારમાં આવી હતી અને મહાદેવના મંદિરમાં ઘુસી હતી. ત્યાં એક વૃદ્ધ બેન મંદિરે દર્શન કરતાં હતાં તેને આ વ્યક્તિએ જયશ્રી કૃષ્ણ પણ કહ્યું હતું. આ વ્યક્તિને જોઈ તે વૃદ્ધ મહિલા ડરી ગયા હતા.

ત્યાં જ માજી સરપંચ નીમુબેન રમેશભાઈ ઢોલરિયા પણ મંદિર તરફ આવી રહ્યા હતા તેણે આ વ્યક્તિને જોઈ જોરથી પડકારો કર્યો હતો. દેકારો થતા સ્ત્રીના કપડાં પહેરી આવેલો પુરુષ દોડતો પોતાની સ્વિફ્ટ કાર લઈ નાસી જાય છે. આ અંગે ભાજપ અગ્રણી કાળુભાઇ મહેતાએ માહિતી આપી ગ્રામજનોને સાવચેત રહેવા અપીલ કરી હતી.