જમ્મુ અને કાશ્મીર: સુરક્ષાદળોની મોટી કાર્યવાહી, સતત બીજા દિવસે વધુ 2 આતંકી ઠાર

ઉત્તર કાશ્મીરના બારામુલા જિલ્લાના વાનીગામ પેઈન ક્રિરી વિસ્તારમાં આતંકવાદીઓ હોવાની ચોક્કસ માહિતીના આધારે કાર્યવાહી કરતા, સુરક્ષા દળોએ આજે વહેલી સવારે ઘેરાબંધી કરી અને સર્ચ ઓપરેશન શરૂ કર્યું હતું.

જમ્મુ-કાશ્મીરમાં બે આતંકવાદીઓ ઠાર

જમ્મુ-કાશ્મીરના બારામુલ્લા જિલ્લામાં આજે સવારે સુરક્ષા દળો સાથેની અથડામણમાં બે આતંકવાદીઓ માર્યા ગયા હતા.પોલીસે આ માહિતી આપી હતી કે ઉત્તર કાશ્મીરના બારામુલા જિલ્લાના વાનીગામ પેઈન ક્રિરી વિસ્તારમાં આતંકવાદીઓની હાજરી અંગેની ચોક્કસ માહિતી પર કાર્યવાહી કરતા, સુરક્ષા દળોએ આજે વહેલી સવારે સર્ચ ઓપરેશન શરૂ કર્યું હતું.પોલીસે કહ્યું કે સર્ચ ઓપરેશન એન્કાઉન્ટરમાં ફેરવાઈ ગયું જ્યારે આતંકવાદીઓએ દળોની સર્ચ પાર્ટી પર ગોળીબાર કર્યો, જેના પછી સુરક્ષા દળોએ જવાબી કાર્યવાહી કરી. અધિકારીએ જણાવ્યું કે જવાબી કાર્યવાહીમાં બે આતંકવાદીઓ માર્યા ગયા.

સ્થળ પરથી હથીયારો મળી આવ્યા

અધિકારીએ જણાવ્યું કે, એન્કાઉન્ટર સ્થળ પરથી એક AK-47 રાઈફલ અને પિસ્તોલ સહિત ગુનાહિત સામગ્રી, હથિયારો અને દારૂગોળો મળી આવ્યો હતો. તેમણે જણાવ્યું કે છેલ્લા 24 કલાકમાં ખીણમાં આ બીજી અથડામણ છે.

લશ્કર-એ-તૈયબા સાથે સંકળાયેલા હતા બંન્ને આતંકવાદી

કાશ્મીરના એડીજીપીએ જણાવ્યું કે બંને સ્થાનિક આતંકવાદી છે, જે આતંકવાદી સંગઠન લશ્કર-એ-તૈયબા સાથે સંકળાયેલા હતા. તેમની ઓળખ શોપિયાં જિલ્લાના શાકિર માજિદ નઝર અને હનાન અહેમદ શેહ તરીકે થઈ છે. બંને માર્ચ 2023માં જ આતંકવાદમાં જોડાયા હતા.વધુ તપાસ ચાલુ છે.

અગાઉ પણ બે આતંકવાદીઓને કર્યા હતા ઠાર

જણાવી દઈએ કે આ પહેલા બુધવારે સુરક્ષા દળોએ કુપવાડા જિલ્લાના માછિલ સેક્ટરમાં નિયંત્રણ રેખા (એલઓસી) પાસે આતંકવાદીઓ દ્વારા ઘૂસણખોરીના પ્રયાસને નિષ્ફળ બનાવ્યો હતો અને આ અથડામણ દરમિયાન બે આતંકવાદીઓ માર્યા ગયા હતા. શ્રીનગરમાં, સંરક્ષણ પ્રવક્તા કર્નલ આમરોન મૌસાવીએ અહીં કહ્યું કે કુપવાડાના વરિષ્ઠ પોલીસ અધિક્ષકે ગુપ્ત માહિતી આપી હતી કે નિયંત્રણ રેખા પારથી માછિલ સેક્ટર તરફ આતંકવાદીઓ ઘૂસણખોરી કરવાનો પ્રયાસ કરી શકે છે. આ પછી, જવાનોને સોમવારથી જ એલર્ટ કરવામાં આવ્યા હતા.

 આ પણ વાંચો : ખુશીઓ માતમમાં ફેરવાઈ! લગ્નમાં જઈ રહેલો પરિવાર રોડ અકસ્માતનો ભોગ બન્યો