જમ્મુ કાશ્મીરના ડોડામાં સેનાએ ચાર આતંકીને ઠાર કર્યા, એક કેપ્ટન પણ શહીદ થયા

જમ્મુ-કાશ્મીર- 14 ઓગસ્ટ :  જમ્મુ-કાશ્મીરના ડોડામાં સેના દ્વારા ચાર આતંકીને ઠાર કરવામાં આવ્યા છે. સેનાને 4 લોહીના ડાઘાવાળી બેગ પણ મળી આવી હતી. એવો અંદાજ તો પહેલે થી જ હતો કે ચાર આતંકવાદીઓ કાં તો ઘાયલ થયા છે અથવા માર્યા ગયા છે.  ત્યારપછી સેનાનું એન્કાઉન્ટર અને સર્ચ ઓપરેશન પણ ચાલુ જ હતું.

કેપ્ટન પણ શહીદ થઈ ગયા
અધિકારીઓએ જણાવ્યું કે શિવગઢ-અસાર પટ્ટામાં છુપાયેલા વિદેશી આતંકવાદીઓની શોધમાં, સુરક્ષા દળો અને પોલીસે વિસ્તારને ઘેરી લીધો અને સંયુક્ત સર્ચ ઓપરેશન શરૂ કર્યું અને આ દરમિયાન ગાઢ જંગલ વિસ્તારમાં તેમની વચ્ચે એન્કાઉન્ટર શરૂ થયું. આતંકવાદીઓ સાથેની અથડામણમાં કેપ્ટન દીપક સિંહ ગંભીર રીતે ઘાયલ થયા હતા, ત્યારબાદ તેમને સૈન્ય હોસ્પિટલમાં લઈ જવામાં આવ્યા હતા, જ્યાં તેમણે અંતિમ શ્વાસ લીધા હતા. એન્કાઉન્ટર સ્થળ પરથી લોહી ભરેલી ચાર કોથળીઓ મળી આવી છે. આના પરથી સમજી શકાય છે કે એન્કાઉન્ટરમાં ચાર આતંકવાદીઓ માર્યા ગયા છે. આ ઉપરાંત ત્યાંથી M-4 કાર્બાઈન પણ મળી આવી છે.

આતંકવાદીઓ અહીંથી આવ્યા હતા
એડિશનલ ડાયરેક્ટર જનરલ ઑફ પોલીસ (ADGP) આનંદ જૈને બપોરે લગભગ 2 વાગ્યે પત્રકારોને જણાવ્યું હતું કે આ વિસ્તારમાં હજુ પણ ઓપરેશન ચાલુ છે. સેનાએ અધિકારીના મૃત્યુ પર ઊંડી સંવેદના વ્યક્ત કરી અને કહ્યું કે સેના શહીદના પરિવારની સાથે છે. સેનાએ કહ્યું કે ‘વ્હાઈટ નાઈટ કોર્પ્સ’ની તમામ રેન્ક બહાદુર કેપ્ટન દીપક સિંહના સર્વોચ્ચ બલિદાનને સલામ કરે છે. અધિકારીઓએ જણાવ્યું કે ગત સાંજે સુરક્ષા દળો અને આતંકવાદીઓ વચ્ચે ગોળીબાર થયા બાદ આતંકવાદીઓ ઉધમપુર જિલ્લાના પટનીટોપ પાસેના જંગલમાંથી ડોડામાં પ્રવેશ્યા હતા.

રાત્રે પણ એન્કાઉન્ટર થયું હતું
અધિકારીઓના જણાવ્યા અનુસાર, સુરક્ષા દળોને મંગળવારે સાંજે લગભગ 6 વાગે ઉધમપુરમાં આતંકવાદીઓની હાજરીની જાણકારી મળી હતી. અડધા કલાક પછી બંને વચ્ચે એન્કાઉન્ટર શરૂ થયું. સુરક્ષાદળોએ રાતભરમાં તો ચારેબાજુથી વિસ્તારને ઘેરી લીધો હતો. અધિકારીઓએ જણાવ્યું કે સુરક્ષા દળોએ આજે ​​સવારે ફરી સર્ચ ઓપરેશન શરૂ કર્યું. આજે સવારે લગભગ 7.30 વાગ્યે આતંકવાદીઓ અને જવાનો વચ્ચે ફરી ગોળીબાર શરૂ થયો હતો.

અહીં પહેલા માર્યા ગયા આતંકવાદીઓ
સુરક્ષા દળોએ રવિવારે પણ બે એન્કાઉન્ટરમાં આતંકવાદીઓને ઠાર કર્યા હતા. એક કિશ્તવાડના નૌનત્તાના દૂરના જંગલ વિસ્તારમાં અને બીજો ઉધમપુરના બસંતગઢ વિસ્તારમાં. આ એન્કાઉન્ટર બાદ આતંકીઓ ડોડાની પહાડીઓમાં ભાગી ગયા હતા. ડોડા જિલ્લાના ગંડોહ વિસ્તારમાં 26 જૂને થયેલા એન્કાઉન્ટરમાં ત્રણ આતંકવાદીઓ માર્યા ગયા હતા. આ આતંકીઓ પાકિસ્તાનના આતંકી સંગઠન જૈશ-એ-મોહમ્મદ (JEM) સાથે જોડાયેલા હોવાની આશંકા છે.

આ પણ વાંચો : SBI-PNB સાથેના તમામ વ્યવહારો તાત્કાલિક બંધ કરો: કર્ણાટક સરકારનો મોટો આદેશ