જમ્મુ કાશ્મીર વિધાનસભા ચૂંટણી : BJPની છઠ્ઠી યાદી જાહેર, 5 મુસ્લિમોને આપી ટિકિટ

જમ્મુ, 8 સપ્ટેમ્બર : ભારતીય જનતા પાર્ટીએ જમ્મુ-કાશ્મીર વિધાનસભા ચૂંટણી માટે ઉમેદવારોની છઠ્ઠી યાદી જાહેર કરી છે. આ યાદીમાં કુલ 10 નામ છે, જેમાંથી પાંચ મુસ્લિમ ઉમેદવારો છે. પાર્ટીએ કઠુઆ વિધાનસભા સીટ પરથી ડો.ભારત ભૂષણને મેદાનમાં ઉતાર્યા છે.

મુસ્લિમ ઉમેદવારોની વાત કરીએ તો કરનાહથી ઇદ્રિસ કર્નાહી, હંદવાડાથી ગુલામ મોહમ્મદ મીર, સોનાવારીથી અબ્દુલ રશીદ ખાન, બાંદીપોરાથી નસીર અહેમદ લોન, ગુરેઝથી ફકીર મોહમ્મદ ખાનને ટિકિટ આપવામાં આવી છે.

અન્ય ઉમેદવારોમાં આર.એસ. પઠાનિયાને ઉધમપુર પૂર્વથી, ડો. ભારત ભૂષણને કઠુઆથી, રાજીવ ભગતને બિશ્નાહથી, વિક્રમ રંધાવાને બહુમાંથી અને સુરિંદ ભગતને મારહથી મેદાનમાં ઉતારવામાં આવ્યા છે.

જમ્મુ અને કાશ્મીર, કયા પ્રદેશમાં કેટલી બેઠકો

કેન્દ્રશાસિત પ્રદેશ જમ્મુ અને કાશ્મીરમાં કુલ 90 વિધાનસભા બેઠકો છે. કાશ્મીરમાં 47 અને જમ્મુ ક્ષેત્રમાં 43 બેઠકો છે. સીમાંકન પહેલાના સમયગાળાની વાત કરીએ તો, 2014ની ચૂંટણી સુધી, ત્યાં 87 બેઠકો હતી, જેમાંથી 37 બેઠકો જમ્મુમાં અને 46 બેઠકો કાશ્મીરમાં હતી. લદ્દાખમાં પણ ચાર બેઠકો હતી.  રાજ્યની સ્થિતિ બદલાયા બાદ લદ્દાખ અલગ કેન્દ્રશાસિત પ્રદેશ બની ગયો છે. આ પછી થયેલા સીમાંકનમાં જમ્મુમાં છ અને કાશ્મીરમાં એક સીટ વધી છે.

અમિત શાહે ઢંઢેરો બહાર પાડ્યો હતો

ઉલ્લેખનીય છે કે શુક્રવારે જ ભાજપે જમ્મુ-કાશ્મીર વિધાનસભા ચૂંટણી માટે પોતાનો મેનિફેસ્ટો જાહેર કર્યો હતો. કેન્દ્રીય ગૃહમંત્રી અમિત શાહે પાર્ટીનો મેનિફેસ્ટો બહાર પાડ્યો. તેમણે કહ્યું કે જમ્મુ અને કાશ્મીરનો વિસ્તાર આઝાદીથી અમારી પાર્ટી માટે મહત્વપૂર્ણ રહ્યો છે. અમે તેને સાથે રાખવા માટે ઘણા પ્રયત્નો કર્યા છે. તેમણે કહ્યું કે કલમ 370 ઈતિહાસ બની ગઈ છે, તે ક્યારેય પાછી ના આવી શકે.  કારણ કે આ એ વિચારધારા હતી જે યુવાનોના હાથમાં પત્થરો મૂકતી હતી.

અમિત શાહે કહ્યું કે વાતચીત અને બોમ્બ વિસ્ફોટ એકસાથે થઈ શકે નહીં.  પાકિસ્તાન સાથે વાતચીતના પક્ષમાં નથી.  અમિત શાહે કહ્યું કે મેં પહેલા જ કહ્યું છે કે રાજ્યની સ્થિતિ પુનઃસ્થાપિત કરવામાં આવશે.  આ અંગે કોઈ મૂંઝવણ ન હોવી જોઈએ.