ISRO ના અવકાશયાત્રીઓને NASA દ્વારા અપાશે તાલીમ : અમેરિકી NSA
નવી દિલ્હી, 17 જૂન : ભારત અને અમેરિકા વચ્ચે અવકાશમાં પરસ્પર સહયોગને પ્રોત્સાહન આપવાની વ્યૂહરચના પર ચર્ચા કરવામાં આવી હતી. યુએસએ કહ્યું કે ભારતીય અવકાશ સંશોધન સંસ્થા (ઇસરો) ના અવકાશયાત્રીઓને જોન્સન સ્પેસ સેન્ટરમાં નાસા દ્વારા તાલીમ આપવામાં આવશે. અમેરિકા અને ભારતના રાષ્ટ્રીય સુરક્ષા સલાહકારો (NSAs) જેક સુલિવાન અને અજીત ડોભાલ વચ્ચે નવી દિલ્હીમાં વાતચીત થઈ હતી.
લુનર ગેટવે પ્રોગ્રામમાં ભાગ લેવા પર ચર્ચા
યુએસ અને ભારતીય NSA વચ્ચેની વાટાઘાટો બાદ બહાર પાડવામાં આવેલ હકીકત પત્રકમાં જણાવાયું છે કે બંને પક્ષો લુનર ગેટવે પ્રોગ્રામમાં ભાગ લેવાની તકો પણ શોધી રહ્યા છે. લુનર ગેટવે પ્રોગ્રામનો ધ્યેય ચંદ્રની આસપાસ સ્પેસ સ્ટેશન બનાવવાનો છે. બંને દેશોના NSA વચ્ચેની વાટાઘાટોમાં લુનર ગેટવે પ્રોગ્રામમાં ભારતની સહભાગિતા માટેની તકો પણ શોધવામાં આવી હતી. આ સાથે અન્ય સ્પેસ ટેક્નોલોજીમાં સહયોગના વિકલ્પો પર પણ ચર્ચા કરવામાં આવી હતી.
અવકાશ સહયોગને મજબૂત કરવા પર ભાર
બંને દેશોના NSA એ ઇન્ટરનેશનલ સ્પેસ સ્ટેશનમાં NASA અને ISRO અવકાશયાત્રીઓ વચ્ચેના પ્રથમ સંયુક્ત પ્રયાસ અંગે પણ ચર્ચા કરી હતી. કહેવામાં આવ્યું છે કે ઈન્ટરનેશનલ સ્પેસ સ્ટેશન ભારત અને અમેરિકાના સંયુક્ત અવકાશ સંશોધનમાં એક સીમાચિહ્નરૂપ સાબિત થશે. બંને દેશોએ અંતરિક્ષ સહયોગને મજબૂત કરવા પર પણ ભાર મૂક્યો હતો. અગાઉ મે મહિનામાં પેન્ટાગોનમાં બંને દેશો વચ્ચે સ્પેસ ડાયલોગનું આયોજન કરવામાં આવ્યું હતું. આ દરમિયાન આર્ટિફિશિયલ ઈન્ટેલિજન્સ સહિત દ્વિપક્ષીય આદાનપ્રદાન અંગે ચર્ચા થઈ હતી.
