ઈઝરાયેલની સેનાના હુમલાથી ઈરાનને મોટું નુકસાન થયું : PM નેતન્યાહુ

નવી દિલ્હી, 27 ઓક્ટોબર : ઈઝરાયેલના પીએમ નેતન્યાહુએ ઈરાન પરના તાજેતરના હુમલાઓને સફળ જાહેર કર્યા છે. તેમણે કહ્યું કે ઈઝરાયેલની સેનાના હુમલાથી ઈરાનને મોટું નુકસાન થયું છે. અમે ઈરાન પર અમારા હુમલાથી અમારો ઉદ્દેશ્ય હાંસલ કરવામાં સફળ થયા છીએ. અમારી સેના દ્વારા કરવામાં આવેલ હુમલો ખૂબ જ સચોટ અને શક્તિશાળી હતો.

વધુમાં નેતન્યાહુએ કહ્યું કે આ હુમલામાં અમે ઈરાનના મિસાઈલ પ્રોડક્શન સેન્ટરને નિશાન બનાવીને તેને નષ્ટ કરી દીધું. આ હુમલા અંગે અગાઉ ઈરાને કહ્યું હતું કે ઈઝરાયેલના હુમલામાં તેને વધારે નુકસાન થયું નથી. શનિવારની સવારે, ઇઝરાયેલી વાયુસેનાએ ઇરાની પ્રદેશો પર મોટા પ્રમાણમાં હુમલો કર્યો, તેમની સંરક્ષણ ક્ષમતાઓ અને મિસાઇલોના ઉત્પાદનનો નાશ કર્યો જેનો ઉપયોગ આપણા દેશ સામે થઈ શકે છે.

નેતન્યાહુએ અમેરિકાનો આભાર માન્યો હતો

માઉન્ટ હર્ઝલ સમારોહમાં પોતાના મુદ્દા પર ભાર મૂકતા નેતન્યાહુએ કહ્યું કે ઈરાન પર અમારો હુમલો ચોક્કસ અને શક્તિશાળી હતો. આ સાથે અમે અમારા તમામ લક્ષ્યો હાંસલ કર્યા છે. પીએમએ આ હુમલામાં મદદ કરવા માટે અમેરિકા અને તેના તમામ સહયોગી દેશોનો પણ આભાર માન્યો હતો.

જોકે અમેરિકન તરફથી કહેવામાં આવ્યું હતું કે તે આ હુમલાઓમાં સામેલ નથી પરંતુ તેને હુમલા પહેલા જાણ કરવામાં આવી હતી. પીએમએ કહ્યું કે છેલ્લા એક વર્ષમાં ઈઝરાયલે પોતાનો ઈતિહાસ ફરીથી લખ્યો છે. અમે ઈરાન અને તેના પ્રોક્સી જૂથો સાથે આ યુદ્ધમાં અમારા અસ્તિત્વ માટે લડ્યા છીએ.

ખમેનાઈએ હુમલા વિશે શું કહ્યું?

ઈરાનના સર્વોચ્ચ નેતા ખમેનાઈએ ઈઝરાયેલના હુમલા પર રવિવારે કહ્યું કે ઈઝરાયેલ દ્વારા થયેલા નુકસાનને ન તો અતિશયોક્તિ કરવી જોઈએ અને ન તો ઓછું આંકવું જોઈએ. આપણે તેની વાસ્તવિકતા જણાવવી જોઈએ. ખમેનીએ કહ્યું કે દેશની સરકાર નક્કી કરશે કે આ હુમલા બાદ ઈરાનની પ્રતિક્રિયા શું હશે. તે જ સમયે ઈરાનના વિદેશ મંત્રાલયે પણ ઈઝરાયેલના આ હુમલાઓને આંતરરાષ્ટ્રીય કાયદાનું ઉલ્લંઘન ગણાવ્યું હતું.

આ પહેલા શનિવારે ઈઝરાયેલે 1 ઓક્ટોબરે ઈરાન પર થયેલા હુમલાના જવાબમાં તેના પર હવાઈ હુમલો કર્યો હતો. ઈરાનની રાજધાની તેહરાનમાં સાયરન સતત વાગતી રહી. જોકે શરૂઆતમાં ઈરાને કહ્યું હતું કે આ હુમલામાં કોઈ નુકસાન થયું નથી. ઈરાને કહ્યું કે આ હુમલામાં વધારે નુકસાન થયું નથી પરંતુ બાદમાં ઈરાને સ્વીકાર્યું કે હુમલામાં તેના બે સૈનિકો માર્યા ગયા છે. ઈરાને સ્વીકાર્યું હતું કે ઈઝરાયેલ દ્વારા કરવામાં આવેલા હવાઈ હુમલામાં તેના સૈન્ય મથકોને નિશાન બનાવવામાં આવ્યા હતા.