ઈસ્કોનના સંત ચિન્મય કૃષ્ણદાસના જામીન વધુ એકવાર બાંગ્લાદેશ કોર્ટે નકાર્યા

ચટ્ટગાંવ, 2 જાન્યુઆરી : હિન્દુ સંત ચિન્મય કૃષ્ણ દાસ છેલ્લા એક મહિનાથી વધુ સમયથી બાંગ્લાદેશની જેલમાં બંધ છે. ગુરુવારે ચટ્ટગાંવ મેટ્રોપોલિટન સેશન્સ જજની કોર્ટમાં તેના જામીનની સુનાવણી હાથ ધરવામાં આવી હતી, પરંતુ કોર્ટે તેના જામીન ફગાવી દીધા હતા.

આ મામલે કોર્ટમાં 30 મિનિટ સુધી સુનાવણી થઈ હતી. જેમાં કોર્ટે બંને પક્ષોને સાંભળ્યા હતા. તેનો અર્થ સ્પષ્ટ છે કે ચિન્મય દાસે વધુ સમય જેલમાં વિતાવવો પડશે. અગાઉ 11 ડિસેમ્બરે બાંગ્લાદેશની એક અદાલતે પ્રક્રિયાગત ખામીઓને કારણે દાસની પ્રાથમિક જામીન અરજી ફગાવી દીધી હતી.

દરમિયાન ચિન્મય દાસના વકીલની ખરાબ તબિયતના કારણે તેમની જામીન અરજી પર સુનાવણીમાં અન્ય 11 વકીલોએ ભાગ લીધો હતો. કોલકાતા ઇસ્કોનના વીપી રાધા રમણે કહ્યું કે આ ખૂબ જ દુઃખદ સમાચાર છે.  આપણે જાણીએ છીએ કે આખી દુનિયા આ જોઈ રહી હતી.  બધાને આશા હતી કે નવા વર્ષમાં ચિન્મય પ્રભુને આઝાદી મળશે. પરંતુ 42 દિવસ બાદ પણ આજે સુનાવણીમાં તેમના જામીન નામંજૂર કરવામાં આવ્યા હતા.

તેમણે કહ્યું કે બાંગ્લાદેશ સરકારે ખાતરી કરવી જોઈએ કે તેમને ન્યાય મળે. મહત્વનું છે કે, એડવોકેટ ચિન્મય કૃષ્ણ દાસને છાતીમાં દુખાવાને કારણે મંગળવારે સાંજે કાર્ડિયોલોજી વિભાગમાં દાખલ કરવામાં આવ્યા હતા.  શારિરીક બિમારીના કારણે તેઓ 2 જાન્યુઆરીના રોજ ચિટગાંવ કોર્ટમાં રાજદ્રોહના કેસમાં જેલમાં બંધ ચિન્મય કૃષ્ણની સુનાવણીમાં હાજર રહ્યા ન હતા.

ચિન્મય દાસ પર શું છે આરોપ

ચિન્મય દાસની ધરપકડ પર ઢાકા પોલીસે તેમના પર લાગેલા આરોપો વિશે કહ્યું હતું કે દાસ પર બાંગ્લાદેશના રાષ્ટ્રધ્વજનું અપમાન કરવાનો આરોપ છે. બીએનપીના પૂર્વ નેતા ફિરોઝ ખાને ચિન્મય દાસ પર આ આરોપો લગાવ્યા છે. ખાને આરોપ લગાવ્યો હતો કે 25 ઓક્ટોબરે ચટગાંવમાં હિન્દુ સમુદાયની રેલી યોજાઈ હતી.

અહીં ચિન્મય દાસ અને અન્ય 18 લોકોએ બાંગ્લાદેશના રાષ્ટ્રધ્વજનું અપમાન કર્યું હતું. જો કે, રસપ્રદ વાત એ છે કે તે સમયે બીએનપીના નેતા રહેલા ફિરોઝ ખાનને પક્ષ વિરોધી ગતિવિધિઓના આરોપમાં આરોપ લગાવ્યાના થોડા દિવસોમાં જ બીએનપીમાંથી હાંકી કાઢવામાં આવ્યા હતા.  બીજી તરફ પોલીસે આ મામલે તપાસ શરૂ કરી છે અને બે લોકોની ધરપકડ કરી છે.

આ પણ વાંચો :- તમારા નહીં પણ પત્નીના નામે કરો FDમાં રોકાણ, મળે છે આટલા ફાયદા