ચેમ્પિયન્સ ટ્રોફી બાદ શરૂ થશે IPL 2025, એક સાથે 3 સિઝનની તારીખો જાહેર

નવી દિલ્હી, 22 નવેમ્બર : ભારત અને ઓસ્ટ્રેલિયા વચ્ચે ટેસ્ટ સીરીઝ શરૂ થઈ ગઈ છે અને તેના બે દિવસ બાદ જ IPL 2025 સિઝનની મેગા ઓક્શન સાઉદી અરેબિયાના જેદ્દાહમાં યોજાશે. આ બે દિવસીય હરાજીની દરેક લોકો આતુરતાથી રાહ જોઈ રહ્યા છે. IPLની આગામી સિઝનની તારીખ હરાજી શરૂ થાય તે પહેલા જ જાહેર થઈ ગઈ છે.

આઈપીએલ 2025ની સિઝન ક્યારે શરૂ થશે અને કેટલો સમય ચાલશે તેનો ખુલાસો થયો છે. IPL 2025 સિઝન છેલ્લી કેટલીક સિઝનની સરખામણીમાં ખૂબ જ વહેલી શરૂ થશે. એક રિપોર્ટ અનુસાર, આગામી સીઝન 14 માર્ચથી શરૂ થશે અને ટૂર્નામેન્ટ 25 મે સુધી ચાલશે. એટલે કે ચેમ્પિયન્સ ટ્રોફીની ફાઈનલ પછી તરત જ ટૂર્નામેન્ટ શરૂ થશે. ચેમ્પિયન્સ ટ્રોફીની ફાઈનલ 9 માર્ચે રમાશે.

એક સાથે 3 સિઝનની તારીખોની જાહેરાત

ESPN-Cricinfoના રિપોર્ટ અનુસાર, BCCIએ IPL 2025ની સિઝનની તારીખ જાહેર કરીને તમામ IPL ફ્રેન્ચાઇઝીઓને એક ઈમેલ મોકલ્યો છે. માત્ર આગામી સિઝન જ નહીં પરંતુ તેના પછીની અન્ય બે સિઝન 2026 અને 2027ની તારીખો જાહેર કરવામાં આવી છે.

જો કે રિપોર્ટમાં જણાવવામાં આવ્યું છે કે બોર્ડે આને માત્ર ટુર્નામેન્ટ વિન્ડો ગણાવી છે, એવું માનવામાં આવે છે કે ટુર્નામેન્ટ એ જ તારીખો પર આયોજિત કરવામાં આવશે.  2026 સીઝન 15 માર્ચથી શરૂ થશે અને 31 મે સુધી ચાલશે, જ્યારે 2027 સીઝન પણ 14 માર્ચથી શરૂ થશે અને 30 મે સુધી ચાલશે.

આગામી ત્રણ વર્ષની તારીખ જાહેર

આ વખતે ટૂર્નામેન્ટ ચેમ્પિયન્સ ટ્રોફી પછી તરત જ શરૂ થશે.  ચેમ્પિયન્સ ટ્રોફી 19 ફેબ્રુઆરીથી 9 માર્ચ સુધી પાકિસ્તાનમાં યોજાવાની છે. IPL 2025 સીઝન તેના 5 દિવસમાં શરૂ થશે. IPLની છેલ્લી સિઝન 23 માર્ચે શરૂ થઈ હતી, પરંતુ આ વખતે ટૂર્નામેન્ટ 9 દિવસ પહેલા શરૂ થઈ રહી છે. આનું એક મોટું કારણ ટૂર્નામેન્ટ મેચો દરમિયાન ટીમોને મહત્તમ સમય આપવાનું જણાય છે કારણ કે આઈપીએલના થોડા જ દિવસો બાદ લંડનના લોર્ડ્સમાં વર્લ્ડ ટેસ્ટ ચેમ્પિયનશિપની ફાઈનલ રમાશે, જેના માટે ટીમ ઈન્ડિયા હજુ પણ રેસમાં છે. ત્યારે આ ફાઈનલ પછી, ટીમ ઈન્ડિયા અને ઈંગ્લેન્ડ વચ્ચે 18-19 જૂન દરમિયાન 5 ટેસ્ટ મેચની શ્રેણી પણ શરૂ થશે.

આ પણ વાંચો :- હરદીપ સિંહ નિજ્જર કેસમાં PM મોદી, જયશંકર કે ડોભાલ વિરુદ્ધ કોઈ પુરાવા નહીં : કેનેડા