IPL 2025 : આ વખતે મેગા ઓક્શને તોડ્યા તમામ રેકોર્ડ, જાણો કેટલા કરોડ ખર્ચાયા

જેદ્દાહ, 26 નવેમ્બર : વર્ષ 2025માં રમાનારી ઈન્ડિયન પ્રીમિયર લીગ એટલે કે આઈપીએલની સીઝન પહેલા સાઉદી અરેબિયાના જેદ્દાહ શહેરમાં 24 અને 25 નવેમ્બરે એક મેગા ઓક્શનનું આયોજન કરવામાં આવ્યું હતું. જેમાં તમામ ફ્રેન્ચાઈઝી પોતપોતાની રણનીતિ સાથે પહોંચી હતી.

ચાહકો તેમના ઘણા મનપસંદ ખેલાડીઓને આગામી સિઝનમાં અન્ય ટીમો માટે રમતા જોશે, જ્યારે ઘણા ખેલાડીઓ ફરીથી તેમની જૂની ટીમનો ભાગ બની ગયા છે.  IPL મેગા ઓક્શન 2025માં આ વખતે ખર્ચવામાં આવેલી રકમે ચોક્કસપણે દરેકના હોશ ઉડાવી દીધા, જેણે ફરી એકવાર સાબિત કર્યું કે આ સમગ્ર ક્રિકેટ જગતની સૌથી મોંઘી T20 લીગ શા માટે છે. આ વખતે મેગા ઓક્શનમાં રિષભ પંત અને શ્રેયસ અય્યર સૌથી મોંઘા ખેલાડી તરીકે વેચાયા હતા.

આ વખતે મેગા ઓક્શનમાં આટલા કરોડનો ખર્ચ થયો

આ વખતે આઈપીએલ મેગા ઓક્શનમાં ઘણા મોટા ખેલાડીઓ પણ ભાગ લઈ રહ્યા હતા, જેમના વિશે પહેલાથી જ અનુમાન લગાવવામાં આવી રહ્યું હતું કે ફ્રેન્ચાઈઝી તેમના પર મોટી રકમ ખર્ચવા તૈયાર છે અને તે જ જોવા મળ્યું હતું. જ્યારે લખનૌ સુપર જાયન્ટ્સે ઋષભ પંતને તેમની ટીમનો ભાગ બનાવવા માટે રૂ. 27 કરોડ ખર્ચ્યા હતા.

જ્યારે પંજાબ કિંગ્સે શ્રેયસ અય્યરને મેળવવા માટે રૂ. 26.75 કરોડ ખર્ચ્યા હતા. આ વખતે મેગા ઓક્શનમાં કુલ રૂ. 639.15 કરોડનો ખર્ચ થયો હતો, જે અગાઉના તમામ રેકોર્ડ તોડીને IPLના ઈતિહાસમાં કોઈપણ હરાજીમાં ખર્ચવામાં આવેલી સૌથી વધુ રકમ છે.

કુલ 182 ખેલાડીઓની બોલી લગાવવામાં આવી

આ વખતે આઈપીએલ મેગા ઓક્શનમાં કુલ 577 ખેલાડીઓને શોર્ટલિસ્ટ કરવામાં આવ્યા હતા, જેમાંથી 182 ખેલાડીઓની બોલી લગાવવામાં આવી હતી, જેમાંથી 62 ખેલાડીઓ વિદેશી છે.

આ વખતે હરાજીમાં, ચેન્નાઈ સુપર કિંગ્સ, ગુજરાત ટાઇટન્સ અને પંજાબ કિંગ્સ તેમની ટીમમાં સૌથી વધુ ખેલાડીઓને સામેલ કરવામાં સફળ રહ્યા, જે 25 છે. આ વખતે આઈપીએલની હરાજીમાં ઘણા મોટા નામ હતા જેમાં કોઈ પણ ફ્રેન્ચાઈઝીએ રસ દાખવ્યો ન હતો, જેમાં સૌથી મોટું નામ ડેવિડ વોર્નર હતું.

આ પણ વાંચો :- વન નેશન વન સબસ્ક્રિપ્શન : શું છે આ યોજના જેને મોદી સરકારે આપી છે લીલી ઝંડી, વિદ્યાર્થીઓને થશે ફાયદો?