મુંબઈ, 11 એપ્રિલ : ઈન્ડિયન પ્રીમિયર લીગ (IPL) 2024માં મુંબઈ ઈન્ડિયન્સ (MI) અને રોયલ ચેલેન્જર્સ બેંગ્લોર (RCB) વચ્ચે મેચ રમાઈ રહી છે. આ મેચ મુંબઈના વાનખેડે સ્ટેડિયમમાં રમાઈ રહી છે, જેમાં MIના કેપ્ટન હાર્દિક પંડ્યાએ ટોસ જીતીને પ્રથમ બોલિંગ કરવાનો નિર્ણય કર્યો હતો. જવાબમાં RCBએ 197 રનનો ટાર્ગેટ આપ્યો હતો. મેચમાં RCB તરફથી કેપ્ટન ફાફ ડુ પ્લેસિસે 40 બોલમાં 61 રન બનાવ્યા હતા. જ્યારે રજત પાટીદારે 26 બોલમાં 50 રન બનાવ્યા હતા. આ પછી અંતમાં દિનેશ કાર્તિકે 23 બોલમાં 53 રનની અણનમ ઇનિંગ રમી હતી. મુંબઈ તરફથી જસપ્રીત બુમરાહે 21 રનમાં સૌથી વધુ 5 વિકેટ લીધી હતી. ગેરાલ્ડ કોએત્ઝી, આકાશ માધવાલ અને શ્રેયસ ગોપાલને 1-1 સફળતા મળી હતી.
મુંબઈ અને બેંગલુરુએ અત્યાર સુધી માત્ર 1-1 મેચ જીતી
ફાફ ડુ પ્લેસિસની કપ્તાનીવાળી બેંગલુરુની ટીમ તેની છેલ્લી 3 મેચ હારી ગઈ છે. તેણે અત્યાર સુધી 5માંથી માત્ર એક જ મેચ જીતી છે. બીજી તરફ હાર્દિક પંડ્યાની કપ્તાનીવાળી મુંબઈની ટીમ પણ 4માંથી માત્ર એક જ મેચ જીતી શકી છે. આવી સ્થિતિમાં આ મેચ જીતીને બંને ટીમ પોઈન્ટ ટેબલમાં પોતપોતાની સ્થિતિ સુધારવા ઈચ્છશે.
મુંબઈ ઈન્ડિયન્સ હંમેશા RCB પર ભારે રહ્યું છે
જો કે, રોહિત શર્માની મુંબઈ હંમેશા વિરાટ કોહલીની ટીમ બેંગલુરુ કરતા શ્રેષ્ઠ રહી છે. બંને ટીમો વચ્ચે અત્યાર સુધીમાં 34 મેચ રમાઈ છે, જેમાં મુંબઈએ 20માં જીત મેળવી છે. જ્યારે બેંગલુરુ 14માં જીત્યું છે. પરંતુ જો આપણે છેલ્લી 5 મેચો પર નજર કરીએ તો આમાં આરસીબીનો હાથ ઉપર હોવાનું જણાય છે. આરસીબીએ છેલ્લી 5 મેચમાંથી 4માં જીત મેળવી છે.
