IPL 2023 : ચેન્નાઈએ જાડેજાને રિટેન કરતાં કેપ્ટનશીપ પર ઊઠ્યાં સવાલ, જાણો આ પૂર્વ ક્રિકેટરે શું કહ્યું
IPL 2023 માટે તમામ ટીમોએ તેમના રિટેન કરાયેલા ખેલાડીઓના નામની જાહેરાત કરી દીધી છે. હવે તમામ ટીમો 23મી ડિસેમ્બરે કોચીમાં યોજાનારી મીની હરાજીમાં કેટલાક ખેલાડીઓને ખરીદીને પોતાની ટીમ તૈયાર કરશે. બધાને ચોંકાવનારી ચેન્નાઈની ટીમે રવિન્દ્ર જાડેજાને પોતાની ટીમમાં જાળવી રાખ્યો છે. એવું માનવામાં આવતું હતું કે ચેન્નાઈ અને જાડેજા વચ્ચે બધું બરાબર નથી અને આ વખતે ચેન્નાઈની ટીમ જાડેજાને રિટેન નહીં કરે. જો કે, આવું થયું નથી અને જાડેજા હજુ પણ ટીમનો ભાગ છે.
આ પણ વાંચો : IPL-2023 : તમારી મનપસંદ ટીમમાંથી આ ખેલાડીઓ થયા રિટેન અને રિલીઝ, જાણો સમગ્ર યાદી
જાડેજા કે ધોની ?
જાડેજા અને ધોની બંને ચેન્નાઈની ટીમમાં છે. આવી સ્થિતિમાં સવાલ ઉઠી રહ્યો છે કે ટીમની કમાન કોણ સંભાળશે. શું જાડેજા પર ફરીથી વિશ્વાસ કરવામાં આવશે કે પછી ધોની ટીમની કમાન સંભાળશે. આ અંગે પૂર્વ ભારતીય ક્રિકેટર પ્રજ્ઞાન ઓઝાનું કહેવું છે કે જ્યાં સુધી મહેન્દ્ર સિંહ ધોની ચેન્નાઈ ટીમ માટે રમી રહ્યો છે ત્યાં સુધી અન્ય કોઈ ખેલાડી ટીમનો કેપ્ટન બની શકે નહીં.
Million Memories. Million More! #Restart ????#WhistlePodu #Yellove ???????? @imjadeja pic.twitter.com/8T2bFZkIk4
— Chennai Super Kings (@ChennaiIPL) November 16, 2022
આખરે કોણ બનશે કેપ્ટન ?
ઓઝાએ કહ્યું, “જ્યાં સુધી એમએસ ધોની રમી રહ્યો છે ત્યાં સુધી કોઈ બીજો કેપ્ટન ન હોઈ શકે. ગયા વર્ષે તે વધુ સ્પષ્ટ થઈ ગયું. જો તમે મને આ પ્રશ્ન એક વર્ષ પહેલાં પૂછ્યો હોત, તો મારો જવાબ અલગ હોત.પરંતુ હું CSK વિશે જે પણ જાણું છું, જો આ એમએસ ધોનીનું IPL માં છેલ્લું વર્ષ છે, તો તેઓ એવા વ્યક્તિને કેપ્ટનશિપ સોંપવા માંગશે, જે આગામી 5 થી 6 વર્ષ સુધી આ ભૂમિકા ભજવી શકે અને ટીમમાં સ્થિરતા લાવી શકે. આ ટીમ ઘણા બધા ફેરફારોમાં માનતી નથી અને તેથી તે લાંબા ગાળાના કેપ્ટનની શોધ કરશે. ચેન્નઈ એક દિવસીય ટ્રેડિંગ ટીમ નહીં પણ બ્લુ-ચિપ એટલે કે ભરોસાપાત્ર ટીમ છે.
IPL 2022માં શું થયું હતું ?
IPL 2022 માં, ધોનીએ અચાનક કેપ્ટનશીપ છોડવાની જાહેરાત કરી અને રવિન્દ્ર જાડેજાને ટીમની કમાન સોંપવામાં આવી હતી. જોકે, કેપ્ટન તરીકે જાડેજાનું પ્રદર્શન ખૂબ જ ખરાબ રહ્યું હતું. સુકાની હોવા છતાં તે બોલ અને બેટમાં સારું પ્રદર્શન કરી શક્યો નહોતો. આ પછી તેણે પણ કેપ્ટનશિપ છોડી દીધી અને ધોનીએ ફરીથી ટીમની કમાન સંભાળી હતી. આ પછી જાડેજા ઘણી મેચ રમ્યો નહોતો. એવું કહેવામાં આવ્યું હતું કે તે ઈજાગ્રસ્ત છે, તેથી તે રમી રહ્યો નથી. આ પછી જાડેજાએ ચેન્નાઈને લગતી ઘણી પોસ્ટ પણ ડિલીટ કરી દીધી હતી. આ પછી એવું માનવામાં આવતું હતું કે CSK અને જાડેજા વચ્ચે અણબનાવ છે અને તે આવતા વર્ષે ટીમનો ભાગ નહીં હોય, પરંતુ આ વર્ષે આવું કંઈ જ થયું નથી.
