કેદની સજા પામેલા બાંગ્લાદેશના વચગાળાના વડાપ્રધાન હવે ભ્રષ્ટાચારના આરોપોમાંથી મુક્ત!

• શેખ હસીનાના રાજીનામા બાદ બાંગ્લાદેશમાં વચગાળાની સરકારની રચના કરવામાં આવી છે અને મોહમ્મદ યુનુસને આ સરકારના વડા તરીકે નિયુક્ત કરવામાં આવ્યા છે. હવે કોર્ટે તેમને ભ્રષ્ટાચારના કેસમાં મોટી રાહત આપી છે. જાણો શું હતો મામલો?

ઢાકા, 12 ઓગસ્ટ: એક મીડિયા રિપોર્ટ અનુસાર બાંગ્લાદેશની વચગાળાની સરકારના વડા તરીકે શપથ લીધાના ત્રણ દિવસ બાદ એટલે કે રવિવારે ભ્રષ્ટાચાર વિરોધી આયોગ દ્વારા દાખલ કરાયેલા ભ્રષ્ટાચારના કેસમાં મોહમ્મદ યુનુસને નિર્દોષ જાહેર કરવામાં આવ્યા છે. ઢાકાની સ્પેશિયલ જ્યુડિશિયલ કોર્ટ-4ના ન્યાયાધીશ મોહમ્મદ રબીઉલ આલમે ભ્રષ્ટાચાર વિરોધી કમિશનની અરજી સ્વીકારી હતી, જે કોર્ટમાં દાખલ કરવામાં આવી હતી, જેમાં ફોજદારી કાર્યવાહી કોડની કલમ 494 હેઠળ કેસની કાર્યવાહી પાછી ખેંચવાની માંગ કરવામાં આવી હતી. ડેઈલી સ્ટાર અખબારે ભ્રષ્ટાચાર એજન્સીને ટાંકીને આ વાત કરી છે.

7 ઓગસ્ટના રોજ ઢાકાની અદાલતે યુનુસ અને ગ્રામીણ ટેલિકોમના ત્રણ ટોચના અધિકારીઓ અશરફુલ હસન, એમ શાહજહાં અને નૂરજહાં બેગમને શ્રમ કાયદાના ઉલ્લંઘનના કેસમાં નિર્દોષ જાહેર કર્યા હતા. 84 વર્ષીય અર્થશાસ્ત્રી યુનુસે ગુરુવારે વચગાળાની સરકારના મુખ્ય સલાહકાર તરીકે શપથ લીધા અને શપથ લેતા જ તેમને મોટી રાહત મળી ગઈ છે.

કોણ છે નૂરજહાં બેગમ?

નૂરજહાં બેગમ, જે આ ભ્રષ્ટાચાર કેસમાં પણ આરોપી હતી, તે 16 સભ્યોની સલાહકાર પરિષદની સભ્ય છે જે યુનુસને રાજ્યની બાબતો ચલાવવામાં મદદ કરશે. યુનુસનો શેખ હસીનાની સરકાર સાથે અસ્પષ્ટ કારણોસર લાંબા સમયથી ઝઘડો ચાલતો હતો, 2008માં સત્તામાં આવ્યા પછી સત્તાવાળાઓએ તેમની સામે અનેક કેસોની તપાસ શરૂ કરી હતી.

શેખ હસીનાના શાસનકાળ દરમિયાન મોહમ્મદ યુનુસ વિરુદ્ધ નોંધાયા હતા ડઝનબંઘ કેસ

બાંગ્લાદેશી સત્તાવાળાઓએ 2011 માં વૈધાનિક ગ્રામીણ બેંકની પ્રવૃત્તિઓની સમીક્ષા શરૂ કરી અને યુનુસને સરકારી નિવૃત્તિ નિયમનના ઉલ્લંઘનના આરોપસર તેના સ્થાપક મેનેજિંગ ડિરેક્ટર તરીકે દૂર કરવામાં આવ્યા હતા. શેખ હસીનાના શાસનકાળ દરમિયાન મોહમ્મદ યુનુસ વિરુદ્ધ ડઝનબંધ કેસ નોંધાયા હતા.

કોર્ટે યુનુસને સંભળાવી હતી છ મહિનાની જેલની સજા

આ પૈકીના એક કેસમાં જાન્યુઆરીમાં કોર્ટે યુનુસને શ્રમ કાયદાનું ઉલ્લંઘન કરવા બદલ છ મહિનાની જેલની સજા ફટકારી હતી. ઘણા લોકોનું માનવું છે કે 2007માં જ્યારે દેશમાં સેના સમર્થિત સરકાર ચાલી રહી હતી અને હસીના જેલમાં હતી ત્યારે યુનુસે રાજકીય પક્ષ બનાવવાની જાહેરાત કરી હતી, જેનાથી હસીના નારાજ થઈ હતી.

આ પણ વાંચો: બાંગ્લાદેશમાં હિંદુઓના હત્યાકાંડના વિરોધમાં ઢાકા, બ્રિટન, કેનેડા સહિત ઠેરઠેર વિરોધ પ્રદર્શનો