ગુડ મોર્નિંગને બદલે હવે સ્કૂલનાં બાળકો બોલશે ‘જય હિંદ’, આ રાજ્યમાં લેવાયો નિર્ણય
- શાળાઓમાં સરકારના ગુડ મોર્નિંગને બદલે જય હિંદ બોલાવાના નિર્ણયનો અમલ 15 ઓગસ્ટ 2024થી શરૂ થશે
હરિયાણા, 09 ઓગસ્ટ: ભારત 15મી ઓગસ્ટ 2024ના રોજ તેનો 78મો સ્વતંત્રતા દિવસ ઉજવવા જઈ રહ્યું છે. દેશભરમાં આ દિવસની તૈયારીઓ જોરશોરથી ચાલી રહી છે. દરમિયાન, સ્વતંત્રતા દિવસને ધ્યાનમાં રાખીને હરિયાણા સરકારે મોટો નિર્ણય લીધો છે. હરિયાણાની નાયબ સિંહ સૈની સરકારે કહ્યું છે કે હવે રાજ્યની શાળાઓમાં વિદ્યાર્થીઓએ સવારે ગુડ મોર્નિંગને બદલે જય હિન્દ બોલવું પડશે. સરકારના આ નિર્ણયનો અમલ 15 ઓગસ્ટ 2024થી શરૂ થશે. આવો જાણીએ હરિયાણા સરકારે આ નિર્ણય પાછળ શું કારણ આપ્યું છે.
કેમ લેવાયો નિર્ણય?
હરિયાણા સરકાર દ્વારા જારી કરાયેલા પરિપત્રમાં કહેવામાં આવ્યું છે કે આ સ્વતંત્રતા દિવસથી તમામ શાળાઓમાં ગુડ મોર્નિંગની જગ્યાએ જય હિંદ બોલવામાં આવશે. શાળા શિક્ષણ નિયામકના આદેશમાં કહેવામાં આવ્યું છે કે આ પગલાનો હેતુ વિદ્યાર્થીઓમાં “દેશભક્તિ અને રાષ્ટ્રીય ગૌરવની ઊંડી ભાવના જગાડવાનો” છે.
સુભાષ ચંદ્ર બોઝે આપ્યો હતો જય હિંદનો નારો
હરિયાણા સરકારના આદેશમાં કહેવામાં આવ્યું છે કે જય હિંદનો નારા સુભાષ ચંદ્ર બોઝે ભારતના સ્વાતંત્ર્ય સંગ્રામ દરમિયાન આપ્યો હતો. ભારતની સશસ્ત્ર દળોએ પણ જય હિંદને સલામી તરીકે સ્વીકારી હતી. સરકારે કહ્યું છે કે હવે શાળાઓમાં ગુડ મોર્નિંગને બદલે જય હિંદ બોલવામાં આવશે. આનાથી વિદ્યાર્થીઓ દરરોજ રાષ્ટ્રીય એકતાની ભાવના સાથે પ્રેરિત થશે. આ સાથે દેશના સમૃદ્ધ ઈતિહાસ પ્રત્યે આદર પણ વ્યક્ત કરી શકાય છે.
આ પણ વાંચો: વક્ફ કાયદામાં સુધારા માટે JPCની કરી રચનાઃ ઓવૈસી સહિત 31 સાંસદ સામેલ
