અમદાવાદમાં લેન્ડિંગ દરમિયાન ઈન્ડિગો ફ્લાઈટને ટેલ સ્ટ્રાઈક, તમામ મુસાફરો સુરક્ષિત

અમદાવાદમાં લેન્ડિંગ દરમિયાન એક ઈન્ડિગો ફ્લાઈટને ટેઈલ સ્ટ્રાઈકનો સામનો કરવો પડ્યો હતો. બેંગલુરુથી અમદાવાદની આ ફ્લાઈટ સુરક્ષિત રીતે ઉતરી ગઈ છે અને તેને ગ્રાઉન્ડેડ જાહેર કરવામાં આવી છે. ફ્લાઈટમાં સવાર તમામ મુસાફરો સુરક્ષિત છે. ઈન્ડિગોએ આ મામલે વિગતવાર તપાસના આદેશ આપ્યા છે.

ઈન્ડિગોએ એક નિવેદન જારી કરીને જણાવ્યું હતું કે બેંગલુરુથી અમદાવાદ જઈ રહેલી ઈન્ડિગોની ફ્લાઈટ 6E6595 અમદાવાદમાં ઉતરતી વખતે ટેલ સ્ટ્રાઈકનો શિકાર બની હતી. જરૂરી આકારણી અને સમારકામ માટે વિમાનને અમદાવાદ એરપોર્ટ પર ગ્રાઉન્ડેડ જાહેર કરવામાં આવ્યું હતું. એરલાઈન્સે કહ્યું કે સંબંધિત અધિકારીઓ દ્વારા આ ઘટનાની તપાસ કરવામાં આવી રહી છે.

દિલ્હી એરપોર્ટ પર પણ આવી ઘટના બની

તાજેતરમાં ઈન્ડિગોની ફ્લાઈટ સાથે આવી જ બીજી ઘટના બની હતી. 11 જૂને દિલ્હીના ઈન્દિરા ગાંધી ઈન્ટરનેશનલ એરપોર્ટ પર ઉતરતી વખતે ઈન્ડિગો પ્લેનનો પાછળનો ભાગ જમીન સાથે અથડાઈ ગયો હતો. આ પછી, એવિએશન સેફ્ટી રેગ્યુલેટર DGCAએ ઘટનાની તપાસના આદેશ આપ્યા. DGCAના એક વરિષ્ઠ અધિકારીએ PTIને જણાવ્યું કે DGCAના આદેશ પર એરલાઈને ક્રૂ મેમ્બર્સને પણ ઉડાન ભરવા પર રોક લગાવી દીધી છે. ઈન્ડિગોએ એક નિવેદનમાં આ ઘટનાની પુષ્ટિ કરી હતી.

વિમાનનો પાછળનો ભાગ ક્ષતિગ્રસ્ત થયો

અધિકારીએ જણાવ્યું હતું કે 11 જૂને ઈન્ડિગો એરક્રાફ્ટ A321 Neo કોલકાતાથી દિલ્હીની ફ્લાઈટ નંબર 6E-6183 ચલાવી રહ્યું હતું અને દિલ્હીમાં ઉતરતી વખતે તેની પૂંછડીની બાજુ જમીન સાથે અથડાઈ હતી. ડીજીસીએના અધિકારીએ કહ્યું કે દિલ્હીમાં ઉતરાણ સુધી ફ્લાઇટ સામાન્ય હતી અને તેના રનવે 27ની નજીક પહોંચતી વખતે ક્રૂને સમજાયું કે તેઓ સામાન્ય કરતાં વધુ સમય લઈ રહ્યા છે. તેમણે જણાવ્યું કે જમીન સાથે અથડાવાને કારણે વિમાનનો પાછળનો ભાગ ક્ષતિગ્રસ્ત થયો હતો.