ભારતની LCA MK1A મિસાઈલ પરમાણુ ધમકી આપનાર પાકિસ્તાનની ચિંતા વધારશે

• 2024 સુધીમાં 83 LCA માર્ક 1A તેજસ મિસાઇલોની ડિલિવરી કરવામાં આવશે
• ટૂંક સમયમાં તેને વાયુસેનામાં સામેલ કરવામાં આવશે.
• આ એરફોર્સના તેજસનું એડવાન્સ વર્ઝન છે.

નવી દિલ્હી, 11 ડિસેમ્બર: ભારત હવે સ્વદેશી LCA માર્ક 1A તેજસથી પાકિસ્તાનનું ટેન્શન વધારશે. તેને રાજસ્થાનના બિકાનેરમાં નલ એર બેઝ પર તૈનાત કરવામાં આવશે. સ્વદેશી માર્ક 1Aને 2024ની શરૂઆતમાં ભારતીય વાયુસેનામાં સામેલ કરવામાં આવશે. બીજી તરફ પાકિસ્તાન અબાબીલ અને શાહીન જેવી બેલેસ્ટિક મિસાઈલના નામે પરમાણુ ધમકીઓ આપતું રહ્યું છે, પરંતુ હવે તેની ચિંતા વધશે. તાજેતરમાં પાકિસ્તાને તેની બેલિસ્ટિક મિસાઈલ એશિયા અબાબીલનું પરીક્ષણ કર્યું છે, જેનો હેતુ ભારતીય S-400 મિસાઈલ સંરક્ષણનો સામનો કરવાનો છે.

2024માં ભારતીય વાયુસેના પાસે 83 LCA MK1A તેજસ હશે, જેની ડીલ વર્ષ 2021માં 6 બિલિયન (અમેરિકન ડોલર)માં કરવામાં આવી હતી. તેનું નિર્માણ હિન્દુસ્તાન એરોનોટિક્સ લિમિટેડ (HAL) દ્વારા કરવામાં આવી રહ્યું છે અને હવે 97 વધુ LCA MK1A તેજસ ખરીદવા પર પણ વિચાર કરવામાં આવી રહ્યો છે. પાકિસ્તાનની સરહદ પર વધી રહેલી નાપાક ગતિવિધિઓને કારણે ભારતે તેને જડબાતોડ જવાબ આપવા માટે સરહદ પર એકથી વધુ મિસાઈલ તૈનાત કરવાનો નિર્ણય લીધો છે. વડા પ્રધાન નરેન્દ્ર મોદીએ પણ તાજેતરમાં બેંગ્લોરમાં LCA MK1A તેજસમાં ઉડાન ભરી હતી. પીએમ મોદીએ પણ તેના ખૂબ વખાણ કર્યા હતા. એરફોર્સમાં સામેલ તેજસનું આ એડવાન્સ વર્ઝન છે.

શું છે પાકિસ્તાનનો મિસાઈલ પ્રોગ્રામ?

પાકિસ્તાન મુશ્કેલ સમયમાંથી પસાર થઈ રહ્યું છે, તેમ છતા પણ શસ્ત્રો બનાવવામાં વ્યસ્ત છે. જ્યાં મોંઘવારી આસમાનને આંબી રહી છે અને લોકોને એક-એક પૈસાની જરૂર છે, ત્યાં પાકિસ્તાન લોકોની સ્થિતિ પર ધ્યાન આપવાને બદલે હથિયારો પાછળ પૈસા ખર્ચવામાં વ્યસ્ત છે. જ્યારે ભારતની વધતી અર્થવ્યવસ્થા અને તેની શક્તિની વાત આવે છે, ત્યારે પાકિસ્તાન તેની આર્થિક દુર્દશા વિશે વાત કરવાને બદલે પરમાણુ શક્તિની વાત કરે છે. છેલ્લા એક વર્ષમાં તેણે અનેક મિસાઈલોના પરીક્ષણો કર્યા છે, જેનો હેતુ ભારતની સૈન્ય શક્તિને ભેદવાનો છે. આ માટે 18 ઓક્ટોબરે પાકિસ્તાને તેની મધ્યમ શ્રેણીની બેલેસ્ટિક મિસાઈલ અબાબીલનું બીજું પરીક્ષણ કર્યું હતું. તેનો હેતુ ભારતના S-400 સંરક્ષણનો સામનો કરવાનો છે. આ અંગે નિષ્ણાતોનું માનવું છે કે, દક્ષિણ એશિયામાં આ પહેલો પ્રાગ્રામ છે જે પરીક્ષણના તબક્કામાં પહોંચી ગયો છે. મિસાઇલને બહુવિધ સ્વતંત્ર રીતે લક્ષિત રી-એન્ટ્રી વ્હીકલ (MIRVs)નું વહન કરવા માટે ડિઝાઇન કરવામાં આવી છે.

અગાઉ ગયા વર્ષે પણ પાકિસ્તાને બીજી મધ્યમ રેન્જની બેલેસ્ટિક મિસાઈલ શાહીન IIIનું પરીક્ષણ કર્યું હતું. જનરલ અસીમ મુનીરે આર્મી ચીફ તરીકેનો કાર્યભાર સંભાળ્યા બાદ પાકિસ્તાનનું આ પ્રથમ મિસાઈલ પરીક્ષણ હતું. આ પરીક્ષણ એવા સમયે કરવામાં આવ્યું હતું, જ્યારે પાકિસ્તાનના કાર્યપાલક વડાપ્રધાન અનવર ઉલ હક કાકર ચીનના પ્રવાસે ગયા હતા.

પાકિસ્તાને પંજાબ પ્રાંતમાં શા માટે કર્યું પરીક્ષણ?

પાકિસ્તાને સિંધ અથવા બલૂચિસ્તાનને બદલે પંજાબ પ્રાંતને પરીક્ષણ માટે પસંદ કર્યો હતો. મેક ઇન ઇન્ડિયા અભિયાન હેઠળ ભારતની સૈન્ય આત્મનિર્ભરતા વધી રહી છે. પાકિસ્તાન ભારતની સૈન્ય શક્તિમાં ઘૂસવાની ક્ષમતા મેળવવાનો પ્રયાસ કરી રહ્યું છે. પાકિસ્તાન એ હકીકતને ક્યારેય છુપાવતું નથી કે તેના મિસાઈલ અને પરમાણુ કાર્યક્રમો માત્ર ભારતને રોકવા માટે જ બનાવવામાં આવ્યા છે. પાકિસ્તાની વિશ્લેષકો દલીલ કરે છે કે, MIRV ક્ષમતા ભારતના ઉભરતા બેલેસ્ટિક મિસાઈલ સંરક્ષણમાં પ્રવેશવાની શક્યતાઓને વધારીને સ્થિરતા અને પ્રતિરોધકતા વધારશે.

આ પણ વાંચો, દિલ્હીમાં હવે મેટ્રો બાદ બસની ટિકિટ પણ વોટ્સએપ દ્વારા બુક કરી શકાશે