RBIના અંદાજ કરતા આર્થિક વિકાસની ગતિ સારી, 2023-24ના બીજા ક્વાર્ટરમાં GDP 7.6%

વર્તમાન નાણાકીય વર્ષ 2023-24ના બીજા ક્વાર્ટરમાં જુલાઈથી સપ્ટેમ્બર વચ્ચે દેશની અર્થવ્યવસ્થા 7.6 ટકાના દરે વૃદ્ધિ પામી છે. આ નાણાકીય વર્ષના પ્રથમ ત્રિમાસિક ગાળામાં એપ્રિલથી જૂન દરમિયાન જીડીપી 7.8 ટકા હતો. જ્યારે ગત નાણાકીય વર્ષ 2022-23ના બીજા ત્રિમાસિક ગાળામાં જીડીપી 6.2 ટકા હતો. RBIએ બીજા ક્વાર્ટરમાં જીડીપી 6.5 ટકા રહેવાનો અંદાજ મૂક્યો હતો. આનો અર્થ એ થયો કે બીજા ક્વાર્ટરમાં દેશની અર્થવ્યવસ્થા RBIના અંદાજ કરતાં વધુ ઝડપે વૃદ્ધિ પામી છે.

GDP 41.74 લાખ કરોડ રૂપિયા રહ્યો

આંકડા અને કાર્યક્રમ અમલીકરણ મંત્રાલય દ્વારા બીજા ક્વાર્ટરના GDPના આંકડા જારી કરવામાં આવ્યા છે. ડેટા અનુસાર, નાણાકીય વર્ષ 2023-24 ના બીજા ક્વાર્ટરમાં જીડીપી 41.74 લાખ કરોડ રૂપિયા પર પહોંચી ગઈ છે, જે ગયા નાણાકીય વર્ષના બીજા ક્વાર્ટરમાં 38.17 લાખ કરોડ રૂપિયા હતી.

સેક્ટરોની હાલત

NSO દ્વારા જાહેર કરવામાં આવેલા આંકડા જણાવે છે કે નાણાકીય વર્ષ 2023-24 ના બીજા ક્વાર્ટરમાં મેન્યુફેક્ચરિંગ સેક્ટરનો વિકાસ દર 13.9 ટકા રહ્યો છે, જે ગયા નાણાકીય વર્ષના બીજા ક્વાર્ટરમાં -3.8 ટકા હતો. કૃષિ ક્ષેત્રનો વિકાસ દર બીજા ક્વાર્ટરમાં 1.2 ટકા હતો જ્યારે 2022-23ના બીજા ક્વાર્ટરમાં તે 2.5 ટકા હતો. બાંધકામ ક્ષેત્રનો વિકાસ દર 13.3 ટકા રહ્યો છે જ્યારે ગયા વર્ષના બીજા ક્વાર્ટરમાં તે 5.7 ટકા હતો.

તેવી જ રીતે, વેપાર, હોટેલ, પરિવહન, સંદેશાવ્યવહાર અને પ્રસારણ સંબંધિત સેવાઓનો વૃદ્ધિ દર 4.3 ટકા રહ્યો છે, જે 2022-23 ના બીજા ક્વાર્ટરમાં 15.6 ટકા હતો. નાણાકીય, રિયલ એસ્ટેટ અને વ્યાવસાયિક સેવાઓનો વિકાસ દર 6 ટકા રહ્યો છે, જે ગયા વર્ષના બીજા ક્વાર્ટરમાં 7.1 ટકા હતો. વીજળી, ગેસ અને પાણી પુરવઠા અને અન્ય ઉપયોગિતા સેવાઓનો વિકાસ દર ચાલુ નાણાકીય વર્ષના બીજા ત્રિમાસિક ગાળામાં 10.1 ટકા રહ્યો છે, જે ગયા વર્ષના સમાન સમયગાળામાં 6 ટકા હતો.