ડાયાબિટીસના દર્દીઓ માટે ભારતમાં બની પહેલી બાયોબેંક, શુગર પેશન્ટને શું થશે લાભ?
- ઈન્ડિયન કાઉન્સિલ ઑફ મેડિકલ રિસર્ચ અને મદ્રાસ ડાયાબિટીસ રિસર્ચ ફાઉન્ડેશનએ મળીને ચેન્નઈમાં ભારતની પ્રથમ ડાયાબિટીસ બાયોબેંક બનાવી
HD ન્યુઝ ડેસ્કઃ ભારતમાં ડાયાબિટીસના દર્દીઓની સંખ્યા ઝડપથી વધી રહી છે. અત્યાર સુધી માત્ર વૃદ્ધ લોકો જ ડાયાબિટીસનો શિકાર બનતા હતા, પરંતુ હવે યુવાનો આ રોગનો સૌથી વધુ ભોગ બની રહ્યા છે. બગડતી જીવનશૈલી અને ખાનપાનની આદતોને કારણે યુવાનોમાં ડાયાબિટીસનું જોખમ વધી રહ્યું છે. આને ધ્યાનમાં રાખીને, ઈન્ડિયન કાઉન્સિલ ઑફ મેડિકલ રિસર્ચ (ICMR) અને મદ્રાસ ડાયાબિટીસ રિસર્ચ ફાઉન્ડેશન (MDRF) એ મળીને ચેન્નઈમાં ભારતની પ્રથમ ડાયાબિટીસ બાયોબેંક બનાવી છે. આ બાયોબેંકનો ઉદ્દેશ્ય ડાયાબિટીસ પર વધુને વધુ સંશોધન કરવાનો અને આ રોગની યોગ્ય સારવાર શોધવાનો છે. શું તમે જાણો છો કે આ બાયોબેંકથી શું ફાયદો થશે?
ડાયાબિટીસ બાયોબેંકથી શું ફાયદો થશે?
આ બાયોબેંકનો ઉદ્દેશ્ય ડાયાબિટીસના કારણો જાણીને તેનો હાઈટેક રિસર્ચના માધ્યમથી ઈલાજ કરવાનો છે. ડાયાબિટીસને લઈને અહીં તમામ પ્રકારના સંશોધન કરવામાં આવશે. જેના કારણે ડાયાબિટીસની સારવાર સરળ બનાવી શકાય છે. એમડીઆરએફના અધ્યક્ષ ડૉ. વી. મોહન કહે છે કે બાયોબેંક ડાયાબિટીસને તેના પ્રારંભિક તબક્કામાં ઓળખીને સારવારને બહેતર બનાવવા માટે નવા બાયોમાર્કરની ઓળખ કરવામાં મદદ કરશે. આ કારણે ભવિષ્યમાં રિસર્ચ માટે જરૂરી ડેટા મળી શકશે.
અસરકારક સારવાર શોધવામાં મદદરૂપ
બાયોબેંક બનાવવાથી ડાયાબિટીસને નિયંત્રિત કરવામાં અને યોગ્ય સારવાર અંગે સંશોધન કરવામાં મદદ મળશે. આ સાથે ડાયાબિટીસ સામેની વિશ્વની લડાઈમાં ભારતની ભૂમિકા પણ મહત્ત્વપૂર્ણ બનશે. ભારત આ બાયોબેંક દ્વારા અન્ય દેશોને પણ મદદ કરી શકે છે અને આપણા સહયોગી દેશોની પણ મદદ લઈ શકે છે. આ રિપોઝિટરી હાઇ-ટેક સેમ્પલ સ્ટોરેજ અને ડેટા-શેરિંગ ટેકનોલોજીનો ઉપયોગ કરીને સસ્તી અને અસરકારક સારવાર શોધવામાં મદદ કરશે.
ડાયાબિટીસ બાયોબેંકનો અભ્યાસ શું કહે છે?
ડાયાબિટીસ બાયોબેંકનો પ્રથમ અભ્યાસ ICMR-INDIAB છે, જેમાં 31 રાજ્યો અને કેન્દ્રશાસિત પ્રદેશોના 1.2 લાખથી વધુ લોકોનો સમાવેશ થાય છે. ભારતમાં ડાયાબિટીસ એક મહામારીની જેમ છે, જેનાથી 10 કરોડથી પણ વધુ લોકો પ્રભાવિત છે. મોટાભાગના વિકસિત રાજ્યોમાં ડાયાબિટીસના દર્દીઓની સંખ્યા ઝડપથી વધી રહી છે. ICMR-YDR અભ્યાસ મુજબ આ પ્રકારની પ્રથમ રાષ્ટ્રીય રજિસ્ટ્રી છે, જે ડાયાબિટીસ પર ધ્યાન કેન્દ્રિત કરે છે અને ખૂબ જ ઝડપથી શરૂ કરવામાં આવી છે.
બીજા અભ્યાસમાં યુવાનોમાં ડાયાબિટીસની ઘટનાઓ પર નજર રાખવામાં આવી હતી. આ અભ્યાસમાં દેશભરમાંથી 5,500 થી વધુ લોકોને સામેલ કરવામાં આવ્યા હતા. એવું જાણવા મળ્યું હતું કે યુવાનોમાં ટાઇપ 1 અને ટાઇપ 2 ડાયાબિટીસના કેસ વધુ જોવા મળે છે. આવી સ્થિતિમાં દેશના યુવાનોને આ ખતરનાક અને અસાધ્ય રોગથી બચાવવામાં ડાયાબિટીસ બાયોબેંકની ભૂમિકા ખૂબ જ મહત્ત્વની બની શકે છે.
HD ન્યુઝના વોટ્સએપ ગ્રુપમાં જોડાવા માટે ક્લિક કરોઃ
