ભારતે લગભગ એક વર્ષ બાદ અફઘાનિસ્તાન સાથે સ્થગિત રાજદ્વારી સંબંધો પુનઃસ્થાપિત કર્યા છે. કાબુલમાં ભારતીય દૂતાવાસે સોમવાર, 15 ઓગસ્ટથી તેની કામગીરી ફરી શરૂ કરી છે. ગયા વર્ષે ઓગસ્ટમાં તાલિબાને અફઘાનિસ્તાન પર કબજો કર્યા બાદ ભારતીય દૂતાવાસે કાબુલમાં તેની ઓફિસને સ્થગિત કરી દીધી હતી. અને અધિકારીઓએ પણ કાબુલ છોડી દીધું હતું.
અફઘાનિસ્તાનના વિદેશ મંત્રાલયના પ્રવક્તા અબ્દુલ કહાર બલ્કીએ જણાવ્યું હતું કે ભારતનું રાજદ્વારી કોન્સ્યુલેટ 13 ઓગસ્ટે કામ ફરી શરૂ કરવાના ઉદ્દેશ્ય સાથે કાબુલ પહોંચ્યું હતું. અમે ભારતીય રાજદ્વારીઓનું સ્વાગત કરીએ છીએ. તેમણે અફઘાનિસ્તાનમાં સંપૂર્ણ સહયોગ અને સુરક્ષાની ખાતરી આપી હતી.
ભારત તરફથી આ આશા વ્યક્ત કરી હતી
તાલિબાનની આગેવાનીવાળી સરકાર ભારત સહિત તમામ પડોશી દેશો સાથે સારા સંબંધો બાંધવા આતુર હોવાનું જણાવતા બલ્કીએ કહ્યું કે અફઘાનિસ્તાનમાં દેશ દ્વારા હાથ ધરવામાં આવેલા વિવિધ પ્રોજેક્ટ અધૂરા છે. અમને આશા છે કે ભારત અફઘાનિસ્તાનના વિકાસ માટે ફરી કામ શરૂ કરશે.
ચીની લશ્કરી થાણાની રચનાને નકારી કાઢી
ભારત દ્વારા હાથ ધરાયેલા પ્રોજેક્ટ્સની પ્રગતિ અંગેના પ્રશ્નના જવાબમાં તેમણે કહ્યું હતું કે, “ભારત દ્વારા અફઘાનિસ્તાનમાં ઘણા પ્રોજેક્ટ હાથ ધરવામાં આવ્યા છે, કેટલાક અડધા પૂર્ણ થયા છે અને અન્ય અડધાથી વધુ પૂર્ણ થઈ ગયા છે.” ચીન અફઘાનિસ્તાનમાં લશ્કરી થાણું બનાવી રહ્યું છે તેવા અહેવાલોને રદિયો આપતાં બલ્કીએ કહ્યું કે તાલિબાન કેબિનેટ પડોશી દેશો સાથે રાજદ્વારી અને આર્થિક સંબંધો જાળવી રાખવાનું છે. અમે અમારી જમીનનો રાજકીય હેતુઓ માટે ઉપયોગ થવા દઈશું નહીં.
વિદેશ મંત્રીએ ગઈકાલે માહિતી આપી હતી
વિદેશ મંત્રી એસ જયશંકરે કહ્યું કે ભારતીય રાજદ્વારીઓની એક ટીમ અફઘાનિસ્તાનની મુલાકાત લીધી છે અને પડોશી દેશ સાથેના તેના ઐતિહાસિક સંબંધોને ધ્યાનમાં રાખીને ભારત લોકો વચ્ચેના સંબંધો જાળવી રાખશે. આ ટીમમાં રાજદૂતો સામેલ નથી. જયશંકરે કહ્યું કે અફઘાનિસ્તાનની સ્થિતિને જોતા ભારતીય રાજદ્વારીઓએ ગયા વર્ષે ઓગસ્ટમાં અફઘાનિસ્તાનમાં દૂતાવાસ છોડી દીધુ હતું અને હવે રાજદ્વારીઓનો એક સમૂહ પાછો ગયો છે. વિદેશ મંત્રીના જણાવ્યા અનુસાર ત્યાં તૈનાત અફઘાન કર્મચારીઓ અકબંધ છે અને ભારત તેમને પગાર આપશે.
