ભારતની મહિલા ટીમને મળશે પુરૂષ ટીમ જેટલી જ મેચ ફી : પરંતુ ગ્રેડ પે માં હજુ પણ અસમાનતા
આજે ભારતીય ક્રિકેટ કંટ્રોલ બોર્ડ (BCCI)ના સચિવ જય શાહે એક મહત્વની જાહેરાત કરી છે કે હવેથી ભારતીય ટીમની મહિલા ક્રિકેટરોને પુરૂષ ટીમ જેટલી જ મેચ ફી આપવામાં આવશે. BCCIના સત્તાવાર ટ્વિટર હેન્ડલ પર શાહે કહ્યું- મેં વચન આપ્યું હતું કે BCCI પુરૂષ અને મહિલા ક્રિકેટ ટીમના ખેલાડીઓની મેચ ફી સમાન કરવામાં આવશે. તે દિશામાં લેવાયેલું આ પગલું છે.
I’m pleased to announce @BCCI’s first step towards tackling discrimination. We are implementing pay equity policy for our contracted @BCCIWomen cricketers. The match fee for both Men and Women Cricketers will be same as we move into a new era of gender equality in ???????? Cricket. pic.twitter.com/xJLn1hCAtl
— Jay Shah (@JayShah) October 27, 2022
આ પણ વાંચો : નેધરલેન્ડ સામે ભારતની 56 રનથી જીત : ગ્રુપ 2નાં ટેબલમાં નંબર-1 પર પહોંચ્યું ભારત
જાણો હવે કેટલી ફી મળશે
હાલમાં સેન્ટ્રલ કોન્ટ્રાક્ટમાં સામેલ મહિલા ખેલાડીઓને ટેસ્ટ મેચ માટે 4 લાખ રૂપિયા મળે છે. તે જ સમયે, ODI અને T20 બંને માટે મેચ ફી એક લાખ રૂપિયા છે. આ નિર્ણય બાદ હવે નવા ફી માળખા મુજબ હવે ટેસ્ટ મેચની ફી 15 લાખ રૂપિયા હશે. તે જ સમયે, વનડે માટે 6 લાખ રૂપિયા અને ટી-20 માટે 3 લાખ રૂપિયાની મેચ ફી આપવામાં આવશે.
ગ્રેડ પે માં હજુ પણ અસમાનતા
ભલે BCCIની સેન્ટ્રલ કોન્ટ્રાક્ટ લિસ્ટમાં સામેલ મહિલા ક્રિકેટરોને પુરૂષ ટીમના ખેલાડીઓ જેટલી જ ફી મળશે તેવી જાહેરાત કરી હોય,પરંતુ ગ્રેડ પે માં હજુ પણ અસમાનતા છે. વાસ્તવમાં, વાર્ષિક સેન્ટ્રલ કોન્ટ્રાક્ટ કોઈ ફેરફાર કરવામાં આવ્યો નથી. વાર્ષિક કોન્ટ્રાક્ટમાં હજુ પણ મહિલા ક્રિકેટરોની માત્ર 3 કેટેગરી છે. બીજી તરફ પુરૂષ ક્રિકેટરોની 4 કેટેગરી છે. તેનાથી પણ વધુ નવાઈની વાત એ છે કે A ગ્રેડની મહિલા ક્રિકેટરોને મળનારી રકમ C ગ્રેડના પુરૂષ ક્રિકેટરો કરતા પણ ઓછી છે.
વાસ્તવમાં મહિલાઓમાં A ગ્રેડની ખેલાડીઓને વાર્ષિક 50 લાખ રૂપિયા મળે છે. બીજી તરફ પુરુષોના C ગ્રેડમાં સામેલ ખેલાડીઓને એક કરોડ રૂપિયા મળે છે. સરળ શબ્દોમાં કહીએ તો, ઉચ્ચ ગ્રેડ હોવા છતાં, પુરૂષ ક્રિકેટરોની સરખામણીમાં મહિલાઓને માત્ર અડધા પૈસા મળે છે. મહિલાઓમાં B ગ્રેડની ખેલાડીઓને 30 લાખ અને C ગ્રેડની ખેલાડીઓને 10 લાખ મળે છે. A+ ગ્રેડ પુરૂષો માટેની ચાર કેટેગરીમાં ટોચ પર છે. આમાં સામેલ ખેલાડીઓને 7 કરોડ મળે છે. A ગ્રેડના ખેલાડીઓને 5 કરોડ, B ગ્રેડના ખેલાડીઓને 3 કરોડ અને C ગ્રેડના ખેલાડીઓને 1 કરોડ મળે છે.
