પેરિસ પેરાલિમ્પિક્સમાં ભારતને રેકોર્ડ 21મો મેડલ મળ્યો, સચિન ખિલારીએ જીત્યો સિલ્વર

• સચિન સર્જેરાવ ખિલારીએ 16.32 મીટરના શ્રેષ્ઠ થ્રો સાથે જીત મેળવી હતી

નવી દિલ્હી, 4 ઓગસ્ટ: પેરિસ પેરાલિમ્પિક્સમાં ભારતીય ખેલાડીઓનું રેકોર્ડબ્રેક પ્રદર્શન ચાલુ છે. ગેમ્સના 7મા દિવસે એટલે કે આજે બુધવારે ભારતને આ વખતે 21મો મેડલ પણ મળ્યો છે. ભારતના સચિન ખિલારીએ પુરુષોની શોટ પુટ F46 કેટેગરીમાં દેશ માટે મેડલ જીત્યો છે. તેણે એશિયન રેકોર્ડ સાથે સિલ્વર મેડલ જીત્યો છે. સચિન સર્જેરાવ ખિલારીએ 16.32 મીટરના શ્રેષ્ઠ થ્રો સાથે જીત મેળવી હતી. તેની પાસે ગોલ્ડ મેડલ જીતવાની પણ તક હતી, પરંતુ તે માત્ર 0.06 મીટરથી ચૂકી ગયો.

 

Congratulations to Sachin Khilari for his incredible achievement at the #Paralympics2024! In a remarkable display of strength and determination, he has won a Silver medal in the Men’s Shotput F46 event. India is proud of him. #Cheer4Bharat pic.twitter.com/JNteBI7yeO

— Narendra Modi (@narendramodi) September 4, 2024

સચિન ખિલારીનું મોટું પરાક્રમ

પુરૂષોના શોટ પુટ F46 કેટેગરીની ફાઇનલમાં સચિનનો પ્રથમ પ્રયાસ 14.72 મીટર, બીજો પ્રયાસ 16.32 મીટર, ત્રીજો પ્રયાસ 16.15 મીટર, ચોથો પ્રયાસ 16.31 મીટર, પાંચમો પ્રયાસ 16.03 મીટર અને છઠ્ઠો પ્રયાસ 15.95 મીટરનો કર્યો હતો. 16.32 મીટરનો બીજો પ્રયાસ નવો એશિયન રેકોર્ડ છે. જોકે આ પહેલા પણ આ રેકોર્ડ સચિનના નામે જ હતો. તેણે મે 2024માં જાપાનમાં યોજાયેલી વર્લ્ડ પેરા-એથ્લેટિક્સ ચેમ્પિયનશિપમાં ગોલ્ડ મેડલ જીત્યો અને એશિયન રેકોર્ડ બનાવ્યો. જ્યારે કેનેડાના ગ્રેગ સ્ટુઅર્ટે 16.38 મીટર સાથે ગોલ્ડ મેડલ જીત્યો હતો. એટલે કે સચિન માત્ર 0.06 મીટર પાછળ રહી ગયો હતો. તે જ સમયે, તે જ ઇવેન્ટમાં, ભારતના મોહમ્મદ યાસર આઠમા અને રોહિત કુમાર નવમા સ્થાને છે.

34 વર્ષનો સચિન ખિલારી મહારાષ્ટ્રના સાંગલી જિલ્લાનો છે. તે 30 વર્ષમાં પેરાલિમ્પિક મેડલ જીતનાર પ્રથમ ભારતીય પુરૂષ શોટ પુટર બન્યો છે. ઉલ્લેખનીય છે કે, F46 કેટેગરી એ એથ્લેટ્સ માટે છે જેમના હાથમાં નબળાઈ, સ્નાયુઓ નબળા હોય અથવા હાથ હલનચલન ન થઈ શકે. આમાં, રમતવીરો ઉભા રહીને સ્પર્ધા કરે છે. સચિન વિશે વાત કરવામાં આવે તો, નવ વર્ષની ઉંમરે તે સાયકલ અકસ્માતમાં ઘાયલ થયો હતો, જેના કારણે તેના ડાબા હાથમાં ફ્રેક્ચર થયું હતું.

ભારતનું રેકોર્ડ બ્રેકિંગ પ્રદર્શન

પેરાલિમ્પિક્સના ઈતિહાસમાં આ પહેલીવાર છે જ્યારે ભારતે એક સાથે આટલા બધા મેડલ જીત્યા હોય. અગાઉ ટોક્યો પેરાલિમ્પિક્સ 2020માં ભારતે 5 ગોલ્ડ, 8 સિલ્વર અને 6 બ્રોન્ઝ મેડલ સાથે કુલ 19 મેડલ જીત્યા હતા. આ વખતે અત્યાર સુધીમાં ભારતે 3 ગોલ્ડ, 7 સિલ્વર અને 11 બ્રોન્ઝ મેડલ જીત્યા છે. હવે તેમાં વધુ વધારો થઈ શકે છે.

આ પણ જૂઓ: VIDEO: PM મોદીએ ફરી એકવાર વગાડ્યો ઢોલ, સિંગાપોરમાં બતાવ્યું પોતાનું કૌશલ્ય