WI સામેની પ્રથમ વન-ડેમાં ભારતનો ત્રણ રનથી વિજય, વેસ્ટ ઈન્ડિઝમાં સતત ચોથી જીત

ભારત અને વેસ્ટ ઈન્ડિઝ વચ્ચેની ત્રણ વનડે શ્રેણીની શરૂઆત ગઈકાલે 22 જુલાઈ (શુક્રવાર)ના રોજ ત્રિનિદાદમાં થઈ હતી. જેમાં ટીમ ઈન્ડિયાએ પ્રથમ વનડે ત્રણ રનથી જીતીને શ્રેણીમાં 1-0ની સરસાઈ મેળવી લીધી છે. વેસ્ટ ઈન્ડિઝને છેલ્લી ઓવરમાં 15 રન બનાવવાના હતા, પરંતુ સિરાજે માત્ર 11 રન આપ્યા હતા.

ભારતનો પ્રથમ દાવ હતો, નિર્ધારિત 50 ઓવરમાં 308 રન કર્યા, શિખરે કર્યા 97

આ મેચમાં પ્રથમ બેટિંગ કરતા ભારતે 50 ઓવરમાં સાત વિકેટે 308 રન બનાવ્યા હતા. વેસ્ટ ઈન્ડિઝ 50 ઓવરમાં છ વિકેટે 305 રન જ બનાવી શકી હતી. ભારતીય કેપ્ટન શિખર ધવને 97 રનની ઇનિંગ રમી હતી. તે જ સમયે મોહમ્મદ સિરાજે દબાણમાં શાનદાર બોલિંગ કરી હતી. તેણે 10 ઓવરમાં 58 રન આપીને બે વિકેટ ઝડપી હતી. ધવનને સુકાનીપદની ઇનિંગ માટે પ્લેયર ઓફ ધ મેચ જાહેર કરવામાં આવ્યો હતો.

વેસ્ટ ઈન્ડીઝની સાતમી વિકેટની 33 બોલમાં અણનમ 53 રનની ભાગીદારી

છેલ્લી ઓવરમાં રોમારિયો શેફર્ડે 25 બોલમાં અણનમ 39 અને અકીલ હુસેને 32 બોલમાં અણનમ 33 રન બનાવ્યા હતા. બંનેએ સાતમી વિકેટ માટે 33 બોલમાં અણનમ 53 રનની ભાગીદારી કરીને મેચને રોમાંચક બનાવી દીધી હતી. શેફર્ડને જીતવા માટે છેલ્લા બોલ પર છગ્ગાની જરૂર હતી, પરંતુ તે તે કરી શક્યો નહીં. જો શેફર્ડે બાઉન્ડ્રી ફટકારી હોત તો મેચ સુપર ઓવરમાં ગઈ હોત.

શિખરના આઉટ થયા બાદ ભારતીય ટીમને સમયાંતરે લાગ્યા એક બાદ એક ઝટકા

ભારતીય ઇનિંગ્સની વાત કરીએ તો શિખર ધવન અને શુભમન ગિલે ટીમને શાનદાર શરૂઆત અપાવી હતી. બંનેએ પ્રથમ 10 ઓવરમાં 73 રનની ભાગીદારી કરી હતી. આ પછી બંનેએ અડધી સદી ફટકારી અને તેમની ભાગીદારીને 119 રન સુધી પહોંચાડી દીધી. આ સ્કોર પર ટીમ ઈન્ડિયાને પહેલો ઝટકો લાગ્યો હતો. 18મી ઓવરના ત્રીજા બોલ પર ગિલ નિકોલસ પૂરન દ્વારા શાનદાર થ્રો પર રનઆઉટ થયો હતો. ગિલ પોતાની ભૂલને કારણે આઉટ થયો હતો. તેણે ધવનને રન માટે કહ્યું, પરંતુ પોતે ધીમો દોડી રહ્યો હતો. આનો માર તેણે સહન કરવો પડ્યો. ગિલે 53 બોલમાં ચાર ચોગ્ગા અને બે છગ્ગાની મદદથી 64 રન બનાવ્યા હતા.