UNનું સભ્યપદ આપવાની પેલેસ્ટાઈનની માંગને ભારત આપ્યું સમર્થન, અમેરિકાએ કર્યો હતો વિરોધ
ન્યૂયોર્ક (અમેરિકા), 02 મે 2024: ભારતે સંયુક્ત રાષ્ટ્રના સભ્યપદની પેલેસ્ટાઈનની માંગને સમર્થન આપ્યું છે. ગયા મહિને અમેરિકાએ પેલેસ્ટાઈનની આ માંગનો વિરોધ કર્યો હતો. રુચિરા કંબોજે કહ્યું, ‘અમે આશા રાખીએ છીએ કે સંયુક્ત રાષ્ટ્રમાં પેલેસ્ટાઈનના સભ્યપદ પર યોગ્ય સમયે પુનર્વિચાર કરવામાં આવશે અને પેલેસ્ટાઈનના સંયુક્ત રાષ્ટ્રના સભ્ય બનવાના પ્રયાસને સમર્થન આપવામાં આવશે.’ નોંધનીય છે કે વર્ષ 1974માં ભારત પેલેસ્ટાઈન લિબરેશન ઓર્ગેનાઈઝેશનને પેલેસ્ટિનિયન લોકોના એકમાત્ર અને કાયદેસરના પ્રતિનિધિ તરીકે માન્યતા આપનાર પ્રથમ બિન-આરબ દેશ હતો.
ગાઝામાં માનવીય સંકટ પર ભારતે યુએનમાં ચિંતા વ્યક્ત કરી
“…India is committed to supporting a Two-State solution where the Palestinian people are able to live freely in an independent country within secure borders, with due regard to the security needs of Israel…”
– PR at #UNGA Meeting on Gaza today pic.twitter.com/3znI9sn0FF
— India at UN, NY (@IndiaUNNewYork) May 1, 2024
ઈઝરાયેલ અને ગાઝા વચ્ચે ચાલી રહેલા યુદ્ધને કારણે પેલેસ્ટાઈનના લોકો માટે સુરક્ષા સંકટ ઉભું થયું છે. ઈઝરાયેલે દક્ષિણ ગાઝાના રફાહ શહેરમાં હુમલાની ચેતવણી જ નથી આપી પરંતુ તેની તૈયારીઓ પણ કરી લીધી છે. આ દરમિયાન ઈઝરાયેલની સેનાએ પણ ગાઝાના લોકોને વહેલી તકે વિસ્તાર ખાલી કરવાની અપીલ કરી હતી. વાસ્તવમાં, રફાહ એ વિસ્તાર છે જ્યાં મોટી સંખ્યામાં પેલેસ્ટિનિયનોએ આશરો લીધો છે. આ મુદ્દે સંયુક્ત રાષ્ટ્ર (યુએન)માં એક બેઠક યોજાઈ હતી. આ બેઠકમાં યુએનમાં ભારતના સ્થાયી સભ્ય રુચિરા કંબોજે જણાવ્યું હતું કે ભારત બે-રાજ્ય ઉકેલને સમર્થન આપવા માટે પ્રતિબદ્ધ છે, જ્યાં પેલેસ્ટિનિયન લોકો ઈઝરાયેલની સુરક્ષા જરૂરિયાતોને ધ્યાનમાં લઈને સુરક્ષિત સરહદોની અંદર સ્વતંત્ર દેશમાં મુક્તપણે રહે છે.
ભારતે UNGA બ્રિફિંગમાં સંયુક્ત રાષ્ટ્રમાં સભ્યપદ માટે પેલેસ્ટાઈનની અરજી મંજૂર ન થવાનો મુદ્દો ઉઠાવ્યો હતો. ભારતે કહ્યું કે અમારા ધ્યાનમાં આવ્યું છે કે પેલેસ્ટાઈનની સભ્યપદની અરજીને સુરક્ષા પરિષદ દ્વારા વીટોના કારણે મંજૂર કરવામાં આવી નથી. તેમણે આશા વ્યક્ત કરી હતી કે તેમની અરજી પર પુનર્વિચાર કરવામાં આવશે. ભારતે કહ્યું કે ગાઝામાં છેલ્લા છ મહિનાથી સંઘર્ષ ચાલી રહ્યો છે. જેના કારણે માનવીય સંકટ ઊભુ થયું છે. ભારતે કહ્યું કે ઈઝરાયેલ અને ગાઝા વચ્ચે ચાલી રહેલા સંઘર્ષમાં મોટી સંખ્યામાં મહિલાઓ અને બાળકોના મૃત્યુ સ્વીકાર્ય નથી. ભારત સંઘર્ષમાં નાગરિકોના જીવ ગુમાવવાની નિંદા કરે છે. ભારત માને છે કે આંતરરાષ્ટ્રીય કાયદા અને આંતરરાષ્ટ્રીય માનવતાવાદી કાયદાનું દરેકે દરેક પરિસ્થિતિમાં સન્માન કરવું જોઈએ.
ગાઝા પર યુએનમાં ભારતની ચિંતા
આ પહેલા પણ ભારત ગાઝામાં માનવીય સંકટ પર ચિંતા વ્યક્ત કરી ચૂક્યું છે. યુએનજીએની બ્રીફિંગમાં યુએનમાં ભારતના સ્થાયી સભ્ય રૂચિરા કંબોજે કહ્યું હતું કે ગાઝામાં લાંબા સમયથી ચાલી રહેલા સંઘર્ષથી ભારત પરેશાન છે. ઈઝરાયેલ અને ગાઝા વચ્ચે ચાલી રહેલા સંઘર્ષમાં મોટા પાયે નાગરિકો, ખાસ કરીને મહિલાઓ અને બાળકોના જાનહાનિને લઈને ભારત ચિંતિત છે. આ માનવતા પર સંકટ સમાન છે. આ સાથે તેમણે ગાઝાના લોકો માટે માનવતાવાદી સહાય વધારવા પર પણ ભાર મૂક્યો હતો.
આ પણ વાંચો: હમાસ સાથે યુદ્ધ વચ્ચે ઈઝરાયેલ એમ્બેસીની ભારતમાં સુરક્ષા કવાયત
