મહિલા એશિયા કપની ફાઇનલમાં પહોંચ્યું ભારત, સેમિફાઇનલમાં બાંગ્લાદેશને 10 વિકેટે હરાવ્યું

નવી દિલ્હી, 26 જુલાઈ : મહિલા એશિયા કપ T20ની પ્રથમ સેમિફાઇનલમાં ભારતનો સામનો બાંગ્લાદેશ સામે થયો હતો. આ મેચ દાંબુલાના રંગીરી દામ્બુલા ઈન્ટરનેશનલ સ્ટેડિયમમાં રમાઈ હતી. ભારતીય ટીમ સતત નવમી વખત મહિલા એશિયા કપની ફાઇનલમાં પહોંચી છે. સેમિફાઇનલમાં તેણે બાંગ્લાદેશને 10 વિકેટે હરાવ્યું હતું.

પ્રથમ બેટિંગ કરતા બાંગ્લાદેશે 81 રનનો આપ્યો હતો ટાર્ગેટ

મળતી માહિતી મુજબ ભારતીય મહિલા ટીમે વિમેન્સ એશિયા કપ T20ની સેમી ફાઇનલમાં બાંગ્લાદેશને 10 વિકેટે હરાવી દીધું છે. આજે શુક્રવારે દામ્બુલામાં રમાયેલી સેમિફાઇનલ મેચમાં બાંગ્લાદેશે ટોસ જીતીને પ્રથમ બેટિંગ કરતા 20 ઓવરમાં આઠ વિકેટ ગુમાવીને 80 રન બનાવ્યા હતા. જવાબમાં ટીમ ઈન્ડિયાએ આ લક્ષ્યાંક 11 ઓવરમાં કોઈ વિકેટ ગુમાવ્યા વિના હાંસલ કરી લીધો હતો. સ્મૃતિ મંધાના 39 બોલમાં 55 રન બનાવીને અણનમ રહી જયારે શેફાલી વર્મા 26 રન બનાવીને અણનમ રહી હતી. મંધાનાએ પોતાની ઈનિંગમાં નવ ચોગ્ગા અને એક છગ્ગો ફટકાર્યો હતો જ્યારે શેફાલીએ બે ચોગ્ગા ફટકાર્યા હતા. આ જીત સાથે ભારતીય ટીમ નવમી વખત મહિલા એશિયા કપની ફાઇનલમાં પહોંચી ગઈ છે.

આ પણ વાંચો : ગેંગસ્ટરે જેલમાંથી છૂટવાની ખુશીમાં એવી રેલી યોજી કે ફરી પાછું જવું પડ્યું જેલ! વીડિયો વાયરલ

ભારતીય ટીમ આઠમો એશિયા કપ ટાઇટલ જીતવાના મિશન પર

મહિલા એશિયા કપની શરૂઆત 2004માં થઈ હતી અને ટીમ ઈન્ડિયા ત્યારે ચેમ્પિયન બની હતી. ભારતીય મહિલા ક્રિકેટ ટીમ તેનો આઠમો એશિયા કપ ટાઇટલ જીતવાના મિશન પર છે. તેણે ODI ફોર્મેટમાં ચાર અને T20 ફોર્મેટમાં ત્રણ ટાઇટલ જીત્યા છે. 2008 સુધી, આ ટુર્નામેન્ટ ODI ફોર્મેટમાં રમાતી હતી. તે જ સમયે, 2012 થી તે T20 ફોર્મેટમાં રમાઈ રહી છે. આ નવમી આવૃત્તિ છે અને ભારતે સાત વખત (2004, 2005, 2006, 2008, 2012, 2016, 2022) ટાઇટલ જીત્યું છે. બાંગ્લાદેશ (2018) મહિલા એશિયા કપ ટાઇટલ જીતનારી એકમાત્ર બીજી ટીમ બની છે.

આ પણ વાંચો : કોરિયોગ્રાફર ફરાહ ખાનની માતા મેનકાનું નિધન, બહુ મુશ્કેલી ઉછેર્યા હતા બાળકો