ICC નોકઆઉટ મેચોમાં ભારતે અત્યાર સુધી ચાર વખત ઓસ્ટ્રેલિયાને હરાવ્યું

• ICC વર્લ્ડ કપ 2023ની ફાઈનલ મેચમાં ભારતીય ટીમનો સામનો ઓસ્ટ્રેલિયન ટીમ સાથે થશે. અત્યાર સુધી આઈસીસીની વિવિધ ટૂર્નામેન્ટમાં કાંગારૂ ટીમનું પ્રદર્શન અન્ય ટીમો કરતા ઘણું સારું રહ્યું છે.

India vs Australia Final: જ્યારે ભારતીય ટીમે 8 ઓક્ટોબરે ODI વર્લ્ડ કપ 2023માં ઓસ્ટ્રેલિયા સામે તેની પ્રથમ મેચ રમી ત્યારે કોઈએ વિચાર્યુ પણ નહી હોય કે આ વર્લ્ડ કપની ફાઈનલ મેચ પણ આ બંને ટીમો વચ્ચે રમાશે. હવે 19 નવેમ્બરે અમદાવાદના નરેન્દ્ર મોદી સ્ટેડિયમમાં રમાનારી ફાઈનલ મેચમાં ભારતનો મુકાબલો ઓસ્ટ્રેલિયાની ટીમ સાથે થશે, ઓસ્ટ્રેલિયાની ટીમે અત્યાર સુધી 5 વખત આ ટ્રોફી જીતી છે.

20 years later, they meet again in the Men’s CWC Final 🏆

All about the #CWC23 Final ➡️ https://t.co/2X2VTOnX35 pic.twitter.com/cWOvXV1n8y

— ICC Cricket World Cup (@cricketworldcup) November 18, 2023

આઈસીસી નોકઆઉટ મેચોમાં ઓસ્ટ્રેલિયાનો રેકોર્ડ અત્યાર સુધી ઘણો સારો રહ્યો છે અને તેથી જ ભારતીય ટીમ માટે તેને હરાવવું બિલકુલ આસાન નહીં હોય. જો કે, ટીમ ઈન્ડિયા અત્યાર સુધી આઈસીસી નોકઆઉટ મેચોમાં ઓસ્ટ્રેલિયાને ચાર વખત હરાવ્યું છે.

ભારતે ઓસ્ટ્રેલિયાને ODIમાં ત્રણ વખત અને T20 નોકઆઉટમાં એકવાર હરાવ્યું છે

ICC નોકઆઉટ મેચોમાં ઓસ્ટ્રેલિયાનો સામનો કરવો કોઈપણ ટીમ માટે સરળ નથી. જોકે, ICCની વિવિધ ઈવેન્ટની નોકઆઉટ મેચોમાં ભારતે ચાર વખત કાંગારૂ ટીમને હરાવ્યું છે. 1998માં જ્યારે ચેમ્પિયન્સ ટ્રોફીની ક્વાર્ટર ફાઈનલ મેચમાં ભારતનો સામનો ઓસ્ટ્રેલિયા સામે થયો હતો ત્યારે ટીમ ઈન્ડિયાએ 44 રને મેચ જીતી હતી. આ પછી બીજી વખત ભારતે ICC નોકઆઉટમાં 2000માં ચેમ્પિયન્સ ટ્રોફીની ક્વાર્ટર ફાઇનલમાં ઓસ્ટ્રેલિયાને 20 રને હરાવ્યું.

2007 T20 વર્લ્ડ કપની સેમિફાઇનલમાં ભારતીય ટીમનો સામનો મજબૂત ઓસ્ટ્રેલિયન ટીમ સામે થયો હતો. આ મેચમાં યુવરાજ સિંહે શાનદાર ઇનિંગ રમી હતી, જેના કારણે ભારતીય ટીમે મેચ જીતી લીધી હતી અને ફાઇનલમાં પણ જગ્યા બનાવી લીધી હતી. છેલ્લી વખત ભારતે ICC નોકઆઉટમાં ઓસ્ટ્રેલિયાને 2011 વર્લ્ડ કપની ક્વાર્ટર ફાઇનલમાં અમદાવાદના આ જ મેદાન પર 5 વિકેટે હરાવ્યું હતું.

બધાની નજર રોહિત અને કોહલી પર ટકેલી

ઓસ્ટ્રેલિયા સામે વર્લ્ડકપની ફાઇનલમાં ભારતીય ટીમના બે મુખ્ય ખેલાડીઓ કેપ્ટન રોહિત શર્મા અને વિરાટ કોહલીના પ્રદર્શન પર તમામની નજર ટકેલી છે. અત્યાર સુધી બંને ખેલાડીઓએ ટૂર્નામેન્ટમાં શાનદાર પ્રદર્શન કર્યું છે, જેમાં કોહલીએ 700થી વધુ રન બનાવ્યા છે જ્યારે રોહિતે પણ 500થી વધુ રન બનાવ્યા છે.

આ પણ વાંચો: વડાપ્રધાન મોદી આવતીકાલે રાજસ્થાનથી સીધા જ અમદાવાદ આવશે, સાંજે મેચ જોવા જશે