કેનેડાએ ફરી ભારત વિરુદ્ધ ઝેર ઓક્યું, હવે નિજ્જર હત્યાકાંડ પછી ચૂંટણીમાં દખલ કરવાનો આરોપ


કેનેડા, 25 જાન્યુઆરી 2024: ગયા વર્ષથી ભારત અને કેનેડા વચ્ચેના સંબંધો સારા નથી. આ દરમિયાન વધુ એક વિવાદ સર્જાયો છે. કેનેડિયન ફેડરલ ચૂંટણી 2019 અને 2021માં વિદેશી હસ્તક્ષેપની તપાસ કરી રહેલા કમિશને કેનેડિયન સરકારને ભારત સંબંધિત ઘણી માહિતી પ્રદાન કરવા કહ્યું છે. એક પ્રેસ રિલીઝ જારી કરીને તપાસ પંચે કહ્યું કે તેણે કેનેડા સરકારના દસ્તાવેજ આર્કાઇવ્સ વિભાગને 2019 અને 2021ની ચૂંટણીઓ સંબંધિત ભારત દ્વારા કથિત હસ્તક્ષેપ સંબંધિત તમામ માહિતી પ્રદાન કરવા વિનંતી કરી છે.

કેનેડાની ચૂંટણીમાં વિદેશી હસ્તક્ષેપની તપાસ કરવામાં આવી રહી છે. તપાસ પંચને સપ્ટેમ્બર 2023માં જવાબદારી સોંપવામાં આવી હતી. જોકે, તેણે ત્યારે સ્પષ્ટ ઉલ્લેખ કર્યો હતો કે તે ચીન અને રશિયાની દખલગીરીની તપાસ કરશે, પરંતુ હવે ભારતનું નામ પણ સામે આવી રહ્યું છે. જારી કરાયેલી પ્રેસ રિલીઝ અનુસાર, જજની આગેવાની હેઠળના પંચે પણ ભારતની ભૂમિકા પર શંકા વ્યક્ત કરી છે.
વર્ષના અંતમાં રિપોર્ટ સબમિટ કરવામાં આવશે
તપાસ પંચે વિનંતી કરી છે કે કેનેડા સરકાર તેના સંદર્ભની શરતોના ફકરા (A)(i)(A) અને (A)(i)(B) સંબંધિત દસ્તાવેજો પ્રદાન કરે. તેમાં 2019 અને 2021ની ચૂંટણીમાં ભારત દ્વારા કથિત હસ્તક્ષેપ સંબંધિત માહિતી અને દસ્તાવેજો છે.
નિજ્જર વિવાદ બાદ ભારતમાંથી કેનેડાએ પોતાના 41 રાજદ્વારીઓને પાછા બોલાવ્યા
ક્વિબેક જજ મેરી-જોસી હોગ આ તપાસ સમિતિનું નેતૃત્વ કરી રહ્યા છે. 2019 અને 2021ની સંઘીય ચૂંટણીમાં વિદેશી હસ્તક્ષેપ શોધવા માટે તેમને આ જવાબદારી સોંપવામાં આવી છે. કમિશનનો આદેશ ફેડરલ સરકારની ચૂંટણીમાં વિદેશી હસ્તક્ષેપને શોધવા, અટકાવવા અને તેનો સામનો કરવાની ક્ષમતાનું મૂલ્યાંકન કરવાનો છે અને પછી તેનો અંતિમ તપાસ રિપોર્ટ 3 મે, 2024 સુધીમાં પૂર્ણ કરવાનો છે. આ પછી, તે 31 ડિસેમ્બર, 2024 સુધીમાં તેનો અંતિમ અહેવાલ સરકારને સોંપશે.
કેનેડાના વડા પ્રધાન જસ્ટિન ટ્રુડો દ્વારા નિવેદન
ગયા સપ્ટેમ્બરમાં કેનેડાના વડા પ્રધાન જસ્ટિન ટ્રુડોએ સાર્વજનિક રીતે ભારત પર ખાલિસ્તાની આતંકવાદી હરપ્રીત સિંહ નિજ્જરની હત્યા પાછળ હોવાનો આરોપ મૂક્યો હતો, જેને ભારતે ફગાવી દીધો હતો. હવે ટ્રુડો સરકાર ભારત પર વધુ એક આરોપ લગાવી રહી છે.