વેસ્ટઈન્ડિઝને ત્રીજી વનડેમાં 119 રનથી હરાવી ભારતે સીરીઝ 3-0થી કબજે કરી, 39 વર્ષમાં પહેલી વખત કેરેબિયનનો તેના જ ગ્રાઉન્ડમાં ક્લીન સ્વિપ
ટીમ ઈન્ડિયાએ પોર્ટ ઑફ સ્પેન ખાતે રમાયેલા સિરિઝના ત્રીજા અને આખરી વનડેમાં વેસ્ટઇન્ડિઝને ડકવર્થ લુઈસ નિયમ પ્રમાણે 119 રનથી હરાવીને 3-0થી ક્લિન સ્વિપ કરીને ઈતિહાસ રચ્યો છે. ભારતીય ટીમ 39 વર્ષથી વેસ્ટઇન્ડિઝમાં વનડે સિરિઝ રમી રહ્યુ છે, અને પ્રથમ વખત વેસ્ટઇન્ડિઝને તેની જ ધરતી પર ક્લિન સ્વિપ કરીને સિરિઝ કબ્જે કરી લીધી છે.
સૌથી વધુ રન શુભમને ગિલે ફટકાર્યા
ત્રીજા વનડે મેચમાં ભારતે ટૉસ જીતીને પ્રથમ બેટિંગ કરવાનો નિર્ણય કર્યો હતો. વરસાદના કારણે મેચ 36 ઓવર જ રમાઈ હતી. પ્રથમ બેટિંગ કરતા ભારતે 36 ઓવરમાં 3 વિકેટ ગુમાવીને 225 રન કર્યા હતા. શુભમન ગિલ 98 રને નોટઆઉટ રહ્યો હતો. ધવને 58 રન કર્યા. જ્યારે શ્રેયસ અય્યરે 44 અને સૂર્યકુમાર યાદવે 8 રન કર્યા હતા. સેમસન 6 રને નોટઆઉટ રહ્યો હતો.
4 વિકેટ ચહલના નામે
ડકવર્થ લુઈસના નિયમ પ્રમાણે વેસ્ટઇન્ડિઝને 35 ઓવરમાં 257 રન ચેઝ કરવાના હતા. પરંતુ કેરેબિયન ટીમ 26 ઓવરમાં 137 રનમાં જ ખખડી ગઈ હતી. બ્રેન્ડન કિંગ અને નિકોલસ પૂરને 42-42 રન કર્યા હતા. ભારત તરફથી સૌથી વધુ યુઝવેંદ્ર ચહલે 4 વિકેટ ઝડપી હતી. મોહમ્મદ સિરાજ અને શાર્દૂલ ઠાકુરે 2-2 વિકેટ લીધી હતી. તો અક્ષર પટેલ અને પ્રસિદ્ધ કૃષ્ણાને 1-1 વિકેટ મળી હતી.
ગિલ પ્લેયર ઑફ ધ મેચ
ત્રીજી વનડેમાં 98 રનની શાનદાર ઇનિંગ માટે શુભમન ગિલને પ્લેયર ઑફ ધ મેચ બનાવવામાં આવ્યો હતો. તેણે 98 બોલમાં 98 રન કર્યા હતા. તેની આ ઇનિંગ દરમિયાન 7 ચોગ્ગા અને 2 છગ્ગા આવ્યા હતા. તો પૂરી સિરિઝમાં દમદાર પ્રદર્શન કરવા બદલ તેને પ્લેયર ઑફ ધ સિરિઝ પણ બનાવવામાં આવ્યો હતો. તેણે 3 મેચમાં કુલ 205 રન ફટકાર્યા હતા.
ભારતીય ઓપનરો દ્વારા શાનદાર શરૂઆત
શિખર ધવને સિરિઝની બીજી અને પોતાના કરિયરની 37મી અર્ધસદી ફટકારી હતી. તે 58 રને આઉટ થયો હતો. તો શુભમન ગિલે પણ શાનદાર ફિફ્ટી મારી હતી. તેણે પોતાના કરિયરની બીજી ફિફ્ટી મારી હતી.
બન્ને ઓપનરો વચ્ચે 138 બોલમાં 113 રનની ભાગીદારી થઈ હતી. આ ભાગીદારીમાં ધવનનું 58 રનનું યોગદાન છે, જ્યારે ગિલનું 51 રનનું યોગદાન છે.
