INDIA ગઠબંધનને વધુ એક ઝટકો લાગશે ! RLD ભાજપ સાથે જોડાઈને ચૂંટણી લડે તેવી શક્યતા
નવી દિલ્હી, 6 ફેબ્રુઆરી : લોકસભા ચૂંટણીમાં ભાજપની હેટ્રિક રોકવાની તૈયારી કરી રહેલા INDIA ગઠબંધનને વધુ એક મોટો ફટકો પડી શકે છે. કારણ કે, જયંત ચૌધરી ભાજપ સાથે ગઠબંધનમાં જોડાઈ શકે છે. સૂત્રોનું માનીએ તો ભાજપે યુપીમાં આરએલડીને ચાર લોકસભા સીટો ઓફર કરી છે. આ પછી ચર્ચા ચાલી રહી છે કે આરએલડી અને સમાજવાદી પાર્ટીનું ગઠબંધન તૂટી શકે છે.
ભાજપે કઈ 4 સીટની ઓફર કરી ?
સૂત્રોના જણાવ્યા અનુસાર ભાજપે આરએલડીને જે 4 સીટો ઓફર કરી છે તેમાં કૈરાના, બાગપત, મથુરા અને અમરોહાનો સમાવેશ થાય છે. જ્યારે સમાજવાદી પાર્ટી ઇચ્છતી હતી કે તેના ઉમેદવારો મુઝફ્ફરનગર, કૈરાના અને બિજનૌર લોકસભા સીટ પર આરએલડીના સિમ્બોલ પર ચૂંટણી લડે. જેના કારણે આરએલડી અને સપાનું ગઠબંધન તૂટવાનું કારણ લાગી રહ્યું છે.
અગાઉ 7 બેઠકો માટે સહમતી થઈ હતી
ઉલ્લેખનીય છે કે ઘણા સમય પહેલા લખનૌમાં જયંત ચૌધરી અને અખિલેશ યાદવની બેઠક બાદ સાત સીટો પર ડીલ થઈ હતી. આ 7 સીટોમાંથી બાગપત, મુઝફ્ફરનગર, કૈરાના, મથુરા અને હાથરસ નક્કી છે પરંતુ બે સીટો પર નામો અંગે હજુ શંકા હતી. અત્યારે એ નક્કી કરવું શક્ય નથી કે મેરઠ, બિજનૌર, અમરોહા, નગીના અને ફતેહપુર સીકરીમાંથી કઈ વધુ સીટો આરએલડીને આપવામાં આવશે.
એક સીટ માટે બંને પક્ષમાં લડાઈ
મુઝફ્ફરનગરમાં ઉમેદવારને લઈને સપા અને આરએલડી વચ્ચે ટક્કર પણ થઈ હતી. સમાજવાદી પાર્ટી ઈચ્છે છે કે હરેન્દ્ર મલિક ત્યાંથી આરએલડીના ચિહ્ન પર ચૂંટણી લડે. આરએલડીના ઘણા સ્થાનિક નેતાઓ આની વિરુદ્ધ છે અને તેઓ નથી ઈચ્છતા કે હરેન્દ્ર મલિકને મુઝફ્ફરનગર સીટ આપવામાં આવે. કારણ એ છે કે ચૌધરી પરિવાર સાથે જૂની દુશ્મનાવટ છે જ્યારે હરેન્દ્ર મલિક કોંગ્રેસમાં હતા અને મુઝફ્ફરનગર બેઠક ચૌધરી પરિવારની મુખ્ય બેઠક માનવામાં આવે છે.
