Ind vs Eng : પ્રથમ T20 મેચમાં અભિષેક શર્માની તાબડતોબ ફિફ્ટી સાથે ભારતની જીત

• 133 રનના ટાર્ગેટને માત્ર 3 વિકેટ ગુમાવી હાંસલ કર્યો
• ઓપનર અભિષેક શર્માએ રમી 79 રનની ઈનિંગ
• 5 T20 મેચની સીરીઝમાં 1-0થી આગળ ભારત

કોલકાતા, 22 જાન્યુઆરી : ભારતીય ટીમ અને ઈંગ્લેન્ડ વચ્ચે 5 મેચની T20 શ્રેણીની પ્રથમ મેચ કોલકાતાના ઈડન ગાર્ડન્સમાં રમાઈ રહી છે. જેમાં ભારતે 7 વિકેટે આસાન જીત મેળવી છે. ભારતીય ઓપનર અભિષેક શર્માની તાબડતોબ ફિફ્ટીની મદદથી આ સ્કોર ચેઝ કરવામાં ભારત સફળ રહ્યું છે.

અગાઉ આ મેચમાં ભારતીય કેપ્ટન સૂર્યકુમાર યાદવે ટોસ જીતીને પ્રથમ બોલિંગ કરવાનો નિર્ણય કર્યો હતો. આ પછી, ઇંગ્લેન્ડની ટીમે ભારતીય બોલરો સામે સંપૂર્ણ રીતે આત્મસમર્પણ કર્યું. ટીમ ઈન્ડિયાને મેચ જીતવા માટે 133 રનનો આસાન ટાર્ગેટ મળ્યો હતો.

અર્શદીપ અને વરુણની સામે ઈંગ્લેન્ડની ટીમે હાર માની

ટોસ હારીને પ્રથમ બેટિંગ કરવા ઉતરેલી ઈંગ્લેન્ડની ટીમની શરૂઆત ખૂબ જ ખરાબ રહી હતી. અર્શદીપ સિંહ શરૂઆતથી જ ઇંગ્લિશ ટીમ પર સંપૂર્ણ રીતે વર્ચસ્વ ધરાવતો દેખાતો હતો. તેણે પહેલી જ ઓવરમાં ફિલ સોલ્ટને પોતાનો શિકાર બનાવ્યો હતો. આ પછી બેન ડકેટ ઇનિંગની ત્રીજી ઓવરમાં રિંકુ સિંહના હાથે કેચ આઉટ થયો હતો.

આ રીતે ઈંગ્લેન્ડની ટીમે 17 રનમાં બીજી વિકેટ ગુમાવી દીધી હતી પરંતુ કેપ્ટન જોસ બટલરે ટીમની કમાન સંભાળી લીધી અને સ્કોર 50થી આગળ લઈ ગયો. અહીં આવતાની સાથે જ સ્પિનર ​​વરુણ ચક્રવર્તીએ એક જ ઓવરમાં હેરી બ્રુક અને લિયામ લિવિંગસ્ટોનને 65 રન પર આઉટ કરીને ચોથો ઝટકો આપ્યો હતો.

આ બધાની વચ્ચે બટલરે 34 બોલમાં પોતાની ફિફ્ટી પૂરી કરી. અંતે બટલર 44 બોલમાં 68 રન બનાવીને આઉટ થયો હતો. ઈંગ્લેન્ડના 7 બેટ્સમેન બે આંકડાને સ્પર્શી શક્યા ન હતા. અંતમાં ઈંગ્લેન્ડની ટીમ 132 રનમાં સમેટાઈ ગઈ હતી. ભારતીય બોલરોમાં વરુણ ચક્રવર્તીએ સૌથી વધુ 3 વિકેટ લીધી હતી. જ્યારે અર્શદીપ સિંહ, હાર્દિક પંડ્યા અને અક્ષર પટેલને 2-2 સફળતા મળી હતી.

આ પણ વાંચો :- Microsoftનું આ કેવું અપડેટ? જો તમે ઓફિસ કોમ્પ્યુટરનો ઉપયોગ કરો છો તો રહેજો સાવધાન