IND vs AUS: સિડની ટેસ્ટ પહેલા ટીમ ઈન્ડિયાને મોટો ફટકો, સ્ટાર ખેલાડી બહાર થયો

• ઓસ્ટ્રેલિયાએ બોર્ડર-ગાવસ્કર ટ્રોફીની છેલ્લી અને 5મી ટેસ્ટ મેચ રમવાની જાહેરાત કરી દીધી

નવી દિલ્હી, 2 જાન્યુઆરી: ઓસ્ટ્રેલિયાએ સિડની ટેસ્ટના એક દિવસ પહેલા તેની પ્લેઈંગ ઈલેવનની જાહેરાત કરી છે. ઓસ્ટ્રેલિયાએ બોર્ડર-ગાવસ્કર ટ્રોફી 2024-25ની છેલ્લી અને 5મી ટેસ્ટ મેચ રમવાની જાહેરાત કરી છે, જેમાં મિશેલ માર્શ નથી. માર્શના સ્થાને 31 વર્ષીય ઓલરાઉન્ડર બ્યૂ વેબસ્ટરને પ્રથમ વખત પ્લેઈંગ ઈલેવનમાં તક આપવામાં આવી છે. વેબસ્ટર ભારત સામે સિડની ટેસ્ટમાં ટેસ્ટ ડેબ્યૂ કરતો જોવા મળશે. આ દરમિયાન ભારતની પ્લેઈંગ ઈલેવનને લઈને પણ મોટો ખુલાસો થયો છે. ભારતીય ટીમના મુખ્ય કોચે ભારતીય ટીમના પ્લેઈંગ ઈલેવન વિશે મોટી માહિતી આપી છે. મુખ્ય કોચના જણાવ્યા અનુસાર, ફાસ્ટ બોલર આકાશ દીપ સિડની ટેસ્ટમાં રમી શકશે નહીં.

ભારતના સ્ટાર બોલરને શું થયું?

ભારતીય ઝડપી બોલર આકાશ દીપ ગુરુવારે પીઠ જકડાઈ જવાને કારણે ઓસ્ટ્રેલિયા સામે 3 જાન્યુઆરીથી શરૂ થનારી પાંચમી અને અંતિમ ટેસ્ટમાંથી બહાર થઈ ગયો છે. આકાશ દીપ બ્રિસ્બેન અને મેલબોર્ન ટેસ્ટની પ્લેઈંગ ઈલેવનનો ભાગ હતો અને તેણે પાંચ વિકેટ પોતાના નામે કરી હતી. તે થોડો કમનસીબ હતો કારણ કે આ બે ટેસ્ટ મેચ દરમિયાન તેની બોલિંગમાં ઘણા કેચ છોડવામાં આવ્યા હતા.

મુખ્ય કોચે પુષ્ટિ કરી

ભારતના કોચ ગૌતમ ગંભીરે સિડની ટેસ્ટ મેચ પહેલા પ્રેસ કોન્ફરન્સમાં કહ્યું હતું કે, આકાશ દીપ પીઠની સમસ્યાને કારણે બહાર છે. તેણે કહ્યું કે, પિચ જોઈને પ્લેઈંગ ઈલેવન નક્કી કરવામાં આવશે. 28 વર્ષીય જમણા હાથના ફાસ્ટ બોલરે બે ટેસ્ટ મેચમાં કુલ 87.5 ઓવર ફેંકી હતી અને તે તેની પીઠની સમસ્યાનું કારણ બની શકે છે. આકાશના સ્થાને હર્ષિત રાણા અથવા પ્રસિદ્ધ કૃષ્ણાને પ્લેઈંગ ઈલેવનમાં સામેલ કરી શકાય છે. ભારત પાંચ મેચોની શ્રેણીમાં 1-2થી પાછળ છે અને બોર્ડર-ગાવસ્કર ટ્રોફીને જાળવી રાખવા માટે તેને કોઈપણ ભોગે પાંચમી અને અંતિમ મેચ જીતવી પડશે. હવે એ જોવાનું રસપ્રદ રહેશે કે છેલ્લી ટેસ્ટમાં ટીમ ઈન્ડિયાની પ્લેઈંગ ઈલેવનમાં કયા બોલરને તક મળે છે.

ભારત સામેની પાંચમી ટેસ્ટ માટે ઓસ્ટ્રેલિયાની પ્લેઈંગ ઈલેવન: સેમ કોન્સ્ટાસ, ઉસ્માન ખ્વાજા, માર્નસ લાબુશેન, સ્ટીવ સ્મિથ, ટ્રેવિસ હેડ, બ્યુ વેબસ્ટર, એલેક્સ કેરી (વિકેટ-કીપર), પેટ કમિન્સ (કેપ્ટન), મિશેલ સ્ટાર્ક, નાથન લિયોન, સ્કોટ બોલેન્ડ.

આ પણ જૂઓ: સિડની ટેસ્ટ માટે ઓસ્ટ્રેલિયાની ટીમની જાહેરાત, મિશેલ માર્શ બહાર, આ ખેલાડી ડેબ્યૂ કરશે