ભારતીય ટીમે આજે ઘરઆંગણે ઓસ્ટ્રેલિયા સામે 5 મેચની T20 સીરીઝની શરૂઆત કરી છે. બંને ટીમો વચ્ચે પ્રથમ મેચ વિશાખાપટ્ટનમમાં રમાઈ રહી છે. આ મેચમાં ભારતીય ટીમે ટોસ જીતીને પ્રથમ બોલિંગ કરવાનો નિર્ણય કર્યો હતો. આ સિરીઝ માટે ભારતીય ટીમની કપ્તાની સૂર્યકુમાર યાદવને સોંપવામાં આવી છે. જ્યારે ઓસ્ટ્રેલિયાની ટીમની કમાન વિકેટકીપર બેટ્સમેન મેથ્યુ વેડના હાથમાં છે. બંને સુકાની પહેલી મેચ જીતીને શ્રેણીમાં મજબૂત શરૂઆત કરવાના ઈરાદા સાથે મેદાનમાં ઉતર્યા છે. ઉલ્લેખનીય છે કે, તાજેતરમાં ICC ODI વર્લ્ડ કપ 2023 સમાપ્ત થયો છે. આ ટૂર્નામેન્ટની ફાઇનલ મેચ 19 નવેમ્બરના રોજ રમાઈ હતી, જેમાં ઓસ્ટ્રેલિયાએ રોહિત શર્માની કપ્તાનીવાળી ભારતીય ટીમને 6 વિકેટથી હરાવ્યું હતું. આવી મેચમાં સૂર્યાની કપ્તાની હેઠળની ભારતીય ટીમ પાસે તે હારનો બદલો લેવાની તક છે.
ટી-20માં ભારતીય ટીમ ઓસ્ટ્રેલિયા પર ભારે છે
જો T20 ઇન્ટરનેશનલ મેચોમાં એકબીજા સામે બંને ટીમોના રેકોર્ડ પર નજર કરીએ તો તેમાં ભારતીય ટીમનો દબદબો દેખાય છે. અત્યાર સુધી બંને ટીમો વચ્ચે કુલ 26 T20 મેચ રમાઈ છે, જેમાં ભારતીય ટીમે 15માં જીત મેળવી છે. જ્યારે 10 મેચ હારી હતી અને એક મેચ અનિર્ણિત રહી હતી. ઘરઆંગણે કાંગારૂ ટીમ સામે ભારતીય ટીમનો રેકોર્ડ પણ મજબૂત રહ્યો છે. ભારતની ધરતી પર બંને ટીમો વચ્ચે અત્યાર સુધીમાં 10 મેચ રમાઈ છે, જેમાંથી ભારતે 6માં જીત મેળવી છે. જ્યારે ઓસ્ટ્રેલિયાએ 4 મેચ જીતી છે. બંને ટીમો વચ્ચે આ 11મી T20 આંતરરાષ્ટ્રીય મેચ છે.
T20 ઇન્ટરનેશનલમાં ભારત Vs ઓસ્ટ્રેલિયા
કુલ મેચ: 26
ભારત જીત્યું: 15
ઓસ્ટ્રેલિયા જીત્યું: 10
અનિર્ણિત: 1
ભારતમાં બંને ટીમો વચ્ચે T20 રેકોર્ડ
કુલ મેચ: 10
ભારત જીત્યું: 6
ઓસ્ટ્રેલિયા જીત્યું: 4
આ મેચમાં બંને ટીમોની પ્લેઈંગ-11
ભારતીય ટીમઃ ઋતુરાજ ગાયકવાડ, યશસ્વી જયસ્વાલ, ઈશાન કિશન (વિકેટકીપર), સૂર્યકુમાર યાદવ (કેપ્ટન), તિલક વર્મા, રિંકુ સિંહ, અક્ષર પટેલ, રવિ બિશ્નોઈ, અર્શદીપ સિંહ, પ્રસિદ્ધ કૃષ્ણ અને મુકેશ કુમાર.
ઓસ્ટ્રેલિયન ટીમઃ સ્ટીવ સ્મિથ, મેથ્યુ શોર્ટ, એરોન હાર્ડી, જોશ ઈંગ્લિસ, માર્કસ સ્ટોઈનિસ, ટિમ ડેવિડ, મેથ્યુ વેડ (વિકેટ, કેપ્ટન), સીન એબોટ, નાથન એલિસ, જેસન બેહરેનડોર્ફ અને તનવીર સંઘા.
