આવકવેરા વિભાગે વિદ્યાર્થીને મોકલી 46 કરોડ રૂપિયાની નોટિસ, જાણો શું છે મામલો

ગ્વાલિયર (મધ્યપ્રદેશ), 30 માર્ચ: મધ્યપ્રદેશના ગ્વાલિયરમાં રહેતા એક વિદ્યાર્થી સાથે છેતરપિંડીનો મામલો સામે આવ્યો છે. તેને ખ્યાલ પણ ન હતો કે તેના પાન કાર્ડનો દુરુપયોગ કરીને કરોડોના વ્યવહારો કરવામાં આવી રહ્યા છે. આ બાબતની જાણ થતાં તેણે પોલીસમાં ફરિયાદ નોંધાવી હતી. એક કોલેજ સ્ટુડન્ટે ગ્વાલિયર જિલ્લા પોલીસમાં તેના બેંક ખાતામાંથી 46 કરોડ રૂપિયાની લેવડદેવડ અંગે ફરિયાદ નોંધાવી હતી, એક પોલીસ અધિકારીએ આ માહિતી આપી હતી. ફરિયાદીની ઓળખ ગ્વાલિયરના રહેવાસી 25 વર્ષીય પ્રમોદ કુમાર દાંડોટિયા તરીકે થઈ છે.

વિદ્યાર્થીને આવકવેરાની નોટિસ મળી

આવકવેરા અને GST વિભાગ તરફથી નોટિસ મળ્યા બાદ તેને આ બાબતની જાણ થઈ હતી. આવકવેરા વિભાગ અને GST વિભાગે નોટિસ પાઠવીને જાણ કરી હતી કે વર્ષ 2021માં વિદ્યાર્થીના પાન કાર્ડ દ્વારા એક કંપની નોંધવામાં આવી હતી, જે દિલ્હી અને મુંબઈમાં ચાલી રહી છે.

વારંવારની ફરિયાદ બાદ પણ સુનાવણી ન થઈ

સ્ટુડન્ટ પ્રમોદે કહ્યું કે જ્યારે તેને ઈન્કમટેક્સ તરફથી આ બાબતની જાણકારી મળી તો તેણે સંબંધિત વિભાગ સાથે વાત કરી. આ પછી તેણે પોલીસમાં ફરિયાદ નોંધાવવાનો ઘણી વાર પ્રયાસ કર્યો પરંતુ કોઈ કાર્યવાહી થઈ ન હતી. શુક્રવારે તે ફરીથી અધિક પોલીસ અધિક્ષકની કચેરીએ પહોંચ્યો અને ફરી ફરિયાદ નોંધાવી. પોલીસ અધિકારીએ કહ્યું કે સમગ્ર મામલાની તપાસ કરવામાં આવી રહી છે.

આ પણ વાંચો: ગુજરાતના યુવાનો ચેતજો, વિદેશમાં જોબ અપાવવાના બહાને થાય છે લાખો રૂપિયાની છેતરપિંડી