બમ્પર નોકરીના સ્કોપ : Air India ચાલુ વર્ષે 4200 કેબિન ક્રૂ અને 900 પાયલોટની ભરતી કરશે

ટાટા ગ્રૂપની માલિકીની એરલાઇન એર ઇન્ડિયા તેના કાફલા અને કામગીરીનું વિસ્તરણ કરી રહી છે. આ શ્રેણીમાં, એરલાઇન આ વર્ષે 4,200 કેબિન ક્રૂ અને 900 પાયલોટની ભરતી કરવાની યોજના ધરાવે છે. આ જાહેરાત એવા સમયે કરવામાં આવી છે જ્યારે એરલાઈને બોઈંગ અને એરબસ પાસેથી 70 વાઈડબોડી એરક્રાફ્ટ સહિત 470 એરક્રાફ્ટનો ઓર્ડર આપ્યો છે.

Air Indiaને ગત વર્ષે TATA ગ્રુપે હસ્તગત કરી

એર ઈન્ડિયાને ટાટા ગ્રુપ દ્વારા જાન્યુઆરી 2022માં હસ્તગત કરવામાં આવી હતી. એરલાઇન 36 એરક્રાફ્ટ પણ લીઝ પર લેવાની યોજના ધરાવે છે. તેમાંથી બે B777-200LR પહેલેથી જ સામેલ કરવામાં આવ્યા છે. એર ઈન્ડિયા 2023 માં 4,200 નવા કેબિન ક્રૂ તાલીમાર્થીઓ અને 900 પાઈલટની ભરતી કરવાની યોજના ધરાવે છે, કારણ કે એરલાઈન નવા એરક્રાફ્ટને સામેલ કરે છે અને તેની સ્થાનિક અને આંતરરાષ્ટ્રીય કામગીરીમાં વધારો કરે છે, એમ એર ઈન્ડિયા દ્વારા શુક્રવારે જારી કરાયેલા એક પ્રકાશનમાં જણાવાયું છે.

અગાઉ પણ 1900 કેબિન ક્રૂની ભરતી કરી હતી

ગત મે 2022 અને ફેબ્રુઆરી 2023 ની વચ્ચે એરલાઈને 1,900 કેબિન ક્રૂની ભરતી કરી હતી. છેલ્લા સાત મહિનામાં (જુલાઈ 2022 અને જાન્યુઆરી 2023 વચ્ચે) 1,000 થી વધુ ક્રૂ સભ્યોને તાલીમ આપવામાં આવી છે અને છેલ્લા ત્રણ મહિનામાં એરલાઈને લગભગ 500 ક્રૂ સભ્યોને ઉડાન ભરવા માટે મુક્ત કર્યા છે. એર ઈન્ડિયામાં ઈન્ફ્લાઈટ સેવાઓના વડા સંદીપ વર્માએ જણાવ્યું હતું કે નવી પ્રતિભાઓને સામેલ કરવાથી એરલાઈનમાં સાંસ્કૃતિક પરિવર્તનની ગતિને વેગ મળશે અને એરલાઈન પાઈલટ અને મેન્ટેનન્સ ઈજનેરોની ભરતીમાં વધારો કરવા પણ વિચારી રહી છે.