નવી દિલ્હી રેલવે સ્ટેશન ઉપર થયેલી નાસભાગમાં તંત્રની જ બેદરકારી, RPF ના રિપોર્ટમાં ધડાકો

નવી દિલ્હી, 18 ફેબ્રુઆરી : નવી દિલ્હી રેલવે સ્ટેશન પર શનિવારે રાત્રે થયેલી નાસભાગ અંગે આરપીએફએ રિપોર્ટ તૈયાર કર્યો છે. રિપોર્ટમાં જણાવવામાં આવ્યું છે કે રેલવેની જાહેરાત બાદ પ્લેટફોર્મ નંબર 12-13 થી 16 સુધી મુસાફરોની ભીડ દોડવા લાગી હતી, જેના કારણે પ્લેટફોર્મ નંબર 12, 13, 14, 15, 16 તરફ જતા રસ્તાઓ સંપૂર્ણ રીતે બ્લોક થઈ ગયા હતા.

સ્ટેશન પર સતત વધી રહેલી ભીડને ધ્યાનમાં રાખીને RPF ઇન્સ્પેક્ટરે સ્ટેશન ડાયરેક્ટરને સ્પેશિયલ ટ્રેન ઝડપથી દોડાવવાની સલાહ આપી હતી. અહેવાલમાં જણાવાયું છે કે નાસભાગ રાત્રે 8:48 કલાકે થઈ હતી. નાસભાગ બાદ રાહત સહાય પૂરી પાડવામાં 40 મિનિટથી વધુનો વિલંબ થયો હતો.

આરપીએફના રિપોર્ટમાં જણાવવામાં આવ્યું છે કે શનિવારે રાત્રે 8 વાગ્યે પ્લેટફોર્મ નંબર 12 પરથી શિવગંગા એક્સપ્રેસ રવાના થયા બાદ પ્લેટફોર્મ પર મુસાફરોની ભારે ભીડ એકઠી થવા લાગી, જેના કારણે પ્લેટફોર્મ નંબર 12, 13, 14, 15,16 તરફ જતા રસ્તાઓ સંપૂર્ણપણે જામ થઈ ગયા હતા.

આ પછી, RPF ઇન્સ્પેક્ટરે સ્ટેશન ડિરેક્ટરને સ્પેશિયલ ટ્રેન ઝડપથી ચલાવવાની સલાહ આપી અને પ્રયાગરાજ માટે દર કલાકે 1500 ટિકિટ વેચતી રેલવે ટીમને તરત જ ટિકિટનું વેચાણ બંધ કરવા કહ્યું હતું. આરપીએફના રિપોર્ટમાં કહેવામાં આવ્યું છે કે સીસીટીવી ફૂટેજમાં વધતી ભીડ જોયા બાદ સ્ટેશન ડાયરેક્ટરને ટિકિટ આપવાનું બંધ કરવા માટે કહેવામાં આવ્યું હતું.

નાસભાગની માહિતી સ્ટેશન ઈન્ચાર્જને આપવામાં આવી

રિપોર્ટ અનુસાર, જ્યારે RPF સ્ટાફ 8:45 વાગ્યે ગીચ FOB 2 અને 3 ને ખાલી કરવાનો પ્રયાસ કરી રહ્યો હતો, ત્યારે એક જાહેરાત કરવામાં આવી હતી કે કુંભ સ્પેશિયલ ટ્રેન પ્લેટફોર્મ નંબર 12 થી રવાના થશે. થોડા સમય પછી, સ્ટેશન પર ફરીથી જાહેરાત થઈ કે કુંભ સ્પેશિયલ ટ્રેન પ્લેટફોર્મ નંબર 16 પરથી રવાના થશે. જે બાદ મુસાફરોમાં નાસભાગ મચી ગઈ હતી. આરપીએફના જણાવ્યા અનુસાર, ડ્યુટી સ્ટેશન ઈન્ચાર્જને રાત્રે 8:48 કલાકે નાસભાગની જાણ થઈ હતી.

જાહેરાત બાદ મુસાફરો દોડવા લાગ્યાઃ અહેવાલ

રેલ્વે દ્વારા કરવામાં આવેલી જાહેરાત સાંભળીને, પ્રયાગરાજ સ્પેશિયલના મુસાફરોએ પ્લેટફોર્મ 12-13 અને 14-15 પરથી સીડીઓ દ્વારા ફૂટ ઓવર બ્રિજ 2 અને 3 પર ચઢવા માટે દોડવાનું શરૂ કર્યું હતું.  દરમિયાન બીજી ટ્રેનના મુસાફરો સીડી પરથી ઉતરી રહ્યા હતા, ત્યારે તેમની વચ્ચે બોલાચાલી થઈ હતી અને આ અંધાધૂંધીમાં કેટલાક લોકો લપસીને પડી ગયા હતા, જેના કારણે નાસભાગ મચી ગઈ હતી. આ અકસ્માત રાત્રે 8.48 કલાકે થયો હતો.

આ નાસભાગ પછી રાહત સહાય આપવામાં 40 મિનિટથી વધુનો વિલંબ થયો હતો. દિલ્હી ફાયરનું કહેવું છે કે તેમને રાત્રે 9:55 વાગ્યે દિલ્હી પોલીસ તરફથી નાસભાગની પ્રથમ માહિતી મળી હતી. જો કે, રેલવેએ તેના સત્તાવાર સંદેશાવ્યવહારમાં જણાવ્યું છે કે નાસભાગ રાત્રે 9:15 વાગ્યે થઈ હતી.

આ સિવાય આજતકે વિલંબ વિશે જાણવા માટે ઉત્તર રેલવેના મુખ્ય જનસંપર્ક અધિકારીનો સંપર્ક કર્યો હતો, પરંતુ હજુ સુધી કોઈ જવાબ મળ્યો નથી. મહત્વનું છે કે, નવી દિલ્હી રેલ્વે સ્ટેશન પર શનિવારે રાત્રે થયેલી નાસભાગમાં 18 મુસાફરોના શ્વાસ રૂંધાવાથી મોત થયા હતા, જ્યારે ઘણા લોકો ઘાયલ થયા હતા. મૃતકોમાં 9 મહિલા, 4 પુરૂષ અને 5 બાળકોનો સમાવેશ થાય છે. આ તમામ લોકો બિહાર, દિલ્હી અને હરિયાણાના રહેવાસી હતા.

આ પણ વાંચો :- સ્થાનિક સ્વરાજની ચૂંટણી: તળાજામાં રિકાઉન્ટિંગમાં ભાજપની જીત, ખેડબ્રહ્મામાં રિકાઉન્ટિંગની માંગ