મુંબઈ જતા વાહનચાલકો માટે મહત્વના સમાચાર, 1 એપ્રિલથી ફાસ્ટેગ સંબંધિત આ નિયમો બદલાશે

મુંબઈ, 18 માર્ચ : ફાસ્ટેગ સંબંધિત નિયમો આગામી થોડા દિવસોમાં બદલાવા જઈ રહ્યા છે, મહારાષ્ટ્ર રાજ્ય માર્ગ વિકાસ નિગમ દ્વારા તાજેતરમાં જ માહિતી આપવામાં આવી છે કે 1 એપ્રિલ, 2025થી મુંબઈના તમામ ટોલ પ્લાઝામાં માત્ર ફાસ્ટટેગ સિસ્ટમ લાગુ કરવામાં આવી રહી છે. આ પગલા પાછળનો મુખ્ય ઉદ્દેશ ટોલ ચુકવણીને સુવ્યવસ્થિત કરવાનો અને ટોલ બૂથ પર ટ્રાફિકની ભીડ ઘટાડવાનો છે.

ડિજિટલ ટોલ પેમેન્ટ સિસ્ટમમાં સંક્રમણથી ટોલ ટ્રાન્ઝેક્શન પ્રક્રિયા ઝડપી થવાની અપેક્ષા છે. મહત્વનું છે કે જે લોકો ફાસ્ટેગ વિના ટોલ પ્લાઝા પરથી પસાર થાય છે તેઓએ ટોલની બમણી રકમ ચૂકવવી પડશે. તમે રોકડ, ક્રેડિટ/ડેબિટ કાર્ડ અથવા UPI દ્વારા ડબલ ટોલ ચૂકવી શકશો.

આ લોકોને છૂટ મળશે

મીડિયા રિપોર્ટ્સ અનુસાર, આ નિયમ સ્કૂલ બસ, લાઇટ મોટર વ્હીકલ અને સ્ટેટ ટ્રાન્સપોર્ટ બસો પર લાગુ નથી.  આ તમામ વાહનોને મુંબઈમાં પ્રવેશતા પાંચ મુખ્ય સ્થળોએ ફાસ્ટેગમાંથી મુક્તિ આપવામાં આવી છે જેમાં મુલુંડ પશ્ચિમ, મુલુંડ પૂર્વ, ઐરોલી, દહિસર અને વાશીના ટોલ પ્લાઝાનો સમાવેશ થાય છે. ઉલ્લેખનીય છે કે મુંબઈ-પુણે એક્સપ્રેસવે, જૂના મુંબઈ-પુણે હાઈવે અને મુંબઈ-નાગપુર સમૃદ્ધિ એક્સપ્રેસવે જેવા મુખ્ય હાઈવે પર ફાસ્ટેગ સિસ્ટમનો કડક અમલ કરવામાં આવશે.

ફાસ્ટેગ ક્યાં ખરીદશો?

ફાસ્ટેગ Paytm, Amazon અથવા કોઈપણ બેંકિંગ એપ અથવા વેબસાઈટ દ્વારા ખરીદી શકાય છે.  ફાસ્ટેગ ખરીદ્યા પછી, તમે ફોન પે, ગૂગલ પે, એમેઝોન પે સહિત કોઈપણ પેમેન્ટ એપ્લિકેશન દ્વારા તમારા ફાસ્ટેગને સરળતાથી રિચાર્જ કરી શકશો.

આ કેસમાં પણ ડબલ ટોલ વસૂલવામાં આવશે

ફાસ્ટેગનો ઉપયોગ કરતા પહેલા, તમારે એ પણ ધ્યાન રાખવું જોઈએ કે જો તમારું ફાસ્ટેગ કોઈ કારણસર બ્લેકલિસ્ટ કરવામાં આવે છે અને જો તમે ફાસ્ટેગ રિચાર્જ કરો છો, તો પણ તમારા ફાસ્ટેગમાં સ્ટેટસ અપડેટ કરવામાં થોડો સમય લાગે છે.

જો સ્ટેટસ અપડેટ ન થયું હોય તો પણ ફાસ્ટેગમાંથી પેમેન્ટ કાપવામાં આવતું નથી અને તમારે ડબલ ટોલ ચૂકવવો પડી શકે છે, તેથી જો તમારો ફાસ્ટેગ બ્લેકલિસ્ટેડ હોય તો ઘર છોડતા પહેલા ફાસ્ટેગને રિચાર્જ કરો જેથી ટોલ પહોંચે ત્યાં સુધીમાં સ્ટેટસ અપડેટ થઈ જાય અને તમે ડબલ ટોલ ચૂકવવાનું ટાળી શકો.

આ પણ વાંચો :- લાલુ પ્રસાદ યાદવને EDનું સમન્સ, રાબડી દેવી અને તેજ પ્રતાપને પણ બોલાવ્યા