ISISમાં જોડાવા જઈ રહ્યો હતો IIT-ગુવાહાટીનો વિદ્યાર્થી, આસામમાં ઝડપાયો

• આસામના કામરૂપ જિલ્લામાં હાજો પાસે IIT-ગુવાહાટીનો એક વિદ્યાર્થી ઝડપાયો હતો. પોલીસે જણાવ્યું કે વિદ્યાર્થી ISISમાં જોડાવા જઈ રહ્યો હતો

આસામ, 24 માર્ચ: IIT-ગુવાહાટીનો એક વિદ્યાર્થી આતંકવાદી સંગઠનમાં જોડાવા જઈ રહ્યો હતો. શનિવારે રાત્રે આસામના કામરૂપ જિલ્લાના હાજો નજીકથી તેની અટકાયત કરવામાં આવી હતી. પોલીસે આ અંગે માહિતી આપી હતી. આસામના પોલીસ મહાનિર્દેશક જી.પી. સિંહે જણાવ્યું હતું કે IIT-ગુવાહાટીના વિદ્યાર્થી જેણે આઈએસઆઈએસ પ્રત્યે વફાદારીનું વચન આપ્યું હતું, તેની યાત્રા દરમિયાન અટકાયત કરવામાં આવી છે અને આગળની કાયદેસરની કાર્યવાહી કરવામાં આવશે.

વિદ્યાર્થીએ મેલ લખ્યો

એડિશનલ સુપરિન્ટેન્ડેન્ટ ઑફ પોલીસ (STF) કલ્યાણ કુમાર પાઠકે જણાવ્યું હતું કે, “ઈમેલ મળ્યા પછી અમે સામગ્રીની સત્યતાની પુષ્ટિ કરી અને તપાસ શરૂ કરી. વિદ્યાર્થીએ ઈમેલ લખીને કહ્યું કે તે ISISમાં જોડાવા જઈ રહ્યો છે.” પાઠકના જણાવ્યા અનુસાર, IIT-ગુવાહાટીના સત્તાવાળાઓને તરત જ જાણ કરવામાં આવી હતી કે સંબંધિત વિદ્યાર્થી “ગુમ” થઈ ગયો છે અને તેનો ફોન પણ સ્વીચ ઑફ કરી દેવામાં આવ્યો છે.

વિદ્યાર્થી દિલ્હીનો રહેવાસી

પોલીસ અધિકારીએ જણાવ્યું કે વિદ્યાર્થી દિલ્હીના ઓખલાનો રહેવાસી છે અને ચોથા વર્ષનો વિદ્યાર્થી છે. પોલીસના જણાવ્યા અનુસાર, સર્ચ ઓપરેશન શરૂ કર્યા પછી વિદ્યાર્થીને સ્થાનિક લોકોની મદદથી ગુવાહાટીથી લગભગ 30 કિલોમીટર દૂર હાજો વિસ્તારમાંથી મળી આવ્યો હતો. પાઠકે કહ્યું, “પ્રારંભિક પૂછપરછ બાદ તેને STF ઓફિસ લઈ જવામાં આવ્યો હતો. અમે ઈમેલની ચકાસણી કરી રહ્યા છીએ.” તેમના જણાવ્યા અનુસાર વિદ્યાર્થીના હોસ્ટેલના રૂમમાંથી કથિત રીતે ISISના ધ્વજ સાથે ભળતો એક કાળો ધ્વજ મળ્યો હતો.

આ પણ વાંચો: CM કેજરીવાલને હાઈકોર્ટનો ઝટકો, તત્કાલ સુનાવણીનો ઈન્કાર